நான்காம் திருமுறை-தேவாரப் பதிகங்கள் - 4.061.திருஇராமேச்சுரம்

இத்தலம் பாண்டிநாட்டிலுள்ளது.

சுவாமிபெயர் - இராமநாதேசுவரர்.
தேவியார் - பர்வதவர்த்தனி.

588

பாசமுங் கழிக்க கில்லா வரக்கரைப்படுத்துத் தக்க வாசமிக் கலர்கள் கொண்டு மதியினான்மால்செய் கோயில் நேசமிக் கன்பி னாலே நினைமினீர்நின்று நாளும் தேசமிக் கானி ருந்த திருவிரா மேச்சுரம்மே.

4.061.1

நீக்க வேண்டிய பாசத்தை நீக்கும் ஆற்றல் இல்லாத அரக்கர்களை அழித்து மேம்பட்ட சிவஞானத்தால் இராமனாய் அவதரித்த திருமால் அமைத்த கோயிலிலே ஒளிமிக்க சிவபெருமான் உகந்தருளியிருக்கும் திரு இராமேச்சுரத்தை வாசனை மிக்க பூக்களை அர்ப்பணித்து நாள்தோறும் நிலையாகப்பற்றுமிகுந்த அன்போடு எல்லீரும் விருப்புற்று நினையுங்கள்.

589

முற்றின நாள்க ளென்று முடிப்பதேகார ண(ம்)மாய் உற்றவன் போர்க ளாலே யுணர்விலாவரக்கர் தம்மைச் செற்றமால் செய்த கோயி றிருவிரா மேச்சுரத்தைப் பற்றிநீ பரவு நெஞ்சே படர்சடையீசன் பாலே.

4.061.2

நெஞ்சே! அரக்கர்கள் உயிர்வாழ்வதற்கு வகுத்த நாள்கள் முடிந்து விட்டதனால் அவர்களை அழிப்பதனையே காரணமாகக் கொண்டு ஏற்பட்ட வலியபோரினால் மெய்யுணர்வு இல்லாத அரக்கர்களை அழித்த இராமன் ஆகிய திருமால் அமைத்த இராமேச்சுரத்தை உகந்தருளியிருக்கும், பரவிய சடையை உடைய சிவபெருமானிடத்துப் பற்றினைக் கொண்டு நீ முன் நின்று போற்றுவாயாக.

590

கடலிடை மலைக டம்மா லடைத்துமால்கரும முற்றித் திடலிடைச் செய்த கோயிற் றிருவிரா மேச்சுரத்தைத் தொடலிடை வைத்து நாவிற் சுழல்கின்றேன்தூய்மை யின்றி உடலிடை நின்றும் பேரா வைவராட் டுண்டுநானே.

4.061.3

கடலிடத்தை மலைகளால் அடைத்துத் திருமால் தம் செயலை முடித்துப் பின் கடலை அடுத்த மேட்டில் செய்த இராமேச்சுரத்தை, இவ்வுடம்பினின்றும் நீங்காத ஐம்பொறிகளால் தம் விருப்பப்படி செயற்படுத்தப்பட்டு தூய்மையின்றி, நாவிடைவைத்துப் போற்று தலைச் செய்து தடுமாறுகின்றேன். (நாவில் தொடல் இடை - வாக்கு.)

591

குன்றுபோற் றோளு டைய குணமிலா வரக்கர்தம்மைக் கொன்றுபோ ராழி யம்மால் வேட்கையாற்செய்த கோயில் நன்றுபோ னெஞ்ச மேநீ நன்மையை யறிதி யாயில் சென்றுநீ தொழுதுய் கண்டாய் திருவிரா மேச்சுரம்மே.

4.061.4

நெஞ்சமே! நீ நன்மையை அறிவாயானால் மலைகளைப்போன்ற தோள்களையுடைய நற்பண்பு இல்லாத அரக்கர்களைக் கொன்று போரிடும் சக்கராயுதத்தை உடைய திருமால் விருப்பத்தோடு அமைத்த இராமேச்சுரக் கோயிலை, சென்று தொழுது கடைத்தேறுவாயாக. அறியாயாயின் நின் நிலை நன்றல்ல. (நன்று போல்).

592

வீரமிக் கெயிறு காட்டி விண்ணுற நீண்டரக்கன் கூரமிக் கவனைச் சென்று கொன்றுடன்கடற்ப டுத்துத் தீரமிக் கானி ருந்த திருவிரா மேச்சுரத்தைக் கோரமிக் கார்த வத்தாற் கூடுவார்குறிப்பு ளாரே.

4.061.5

கடலைச் சேது கட்டித்தடுத்து, வீரம் மேம்பட்டுக் கோரைப் பற்களை வெளியே காட்டிக் கொண்டு வானளாவ உயர்ந்த கொடுமைமிக்க அரக்கனாகிய இராவணனை இலங்கைக்குச் சென்று அங்கே கொன்று, மீண்டு பேராற்றலுடைய திருமால் கோயில் செய்து வழிபட்டிருந்த இராமேச்சுரத்தை, அஞ்சத்தகும் பான்மையுள்ள தீவிர சாதனைகளால் சென்றடைவார் தம் குறிக்கோள் நிரம்பப் பெறுவர்.

593

ஆர்வல நம்மின் மிக்கா ரென்றவவ்வரக்கர் கூடிப் போர்வலஞ் செய்து மிக்குப் பொருதவர்தம்மை வீட்டித் தேர்வலஞ் செற்ற மால்செய் திருவிரா மேச்சுரத்தைச் சேர்மட நெஞ்ச மேநீ செஞ்சடை யெந்தைபாலே.

4.061.6

மட நெஞ்சமே! 'நம்மை விட வலிமை மிக்கவர்யாவர்' என்று செருக்குற்ற அவ்வரக்கர்கள் ஒன்று கூடிப் போரிலே வெற்றியைக் கருதி வலிமைமிக்குப் போரிட்டாராக, அவர்களை அழித்து அவர்களுடைய தேர்ப்படையின் வலிமையையும் போக்கிய திருமால் அமைத்த இராமேச்சுரத்தை அணுகிச் செஞ்சடைப் பெருமான்பால் அடைவாயாக.

594

வாக்கினா லின்பு ரைத்து வாழ்கிலார்தம்மை யெல்லாம் போக்கினாற் புடைத்த வர்கள் உயிர்தனை யுண்டுமாறான் தேக்குநீர் செய்த கோயி றிருவிரா மேச்சு ரத்தை நோக்கினால் வணங்கு வார்க ணோய்வினை நுணுகு மன்றே.

4.061.7

இனிமையாகப் பேசுதற்கு அமைந்த வாயாலே இனிய சொற்களைப் பேசி வாழாத அரக்கர்களை அழிக்கத்தக்க படைகளால் தாக்கி அவர்கள் உயிரை உண்டு திருமால் கடல் நீரைத் தேக்கிய அணையின் கரையில் அமைத்த கோயிலாகிய இராமேச்சுரத்தை அகநோக்கிலும் புறநோக்கிலும் கண்டு தரிசித்துத் தலையால் வணங்குபவருடைய நோய்களும் வினைகளும் அழிந்துவிடும்.

595

பலவுநா டீமை செய்து பார்தன்மேற்குழுமி வந்து கொலைவிலார் கொடிய ராய வரக்கரைக்கொன்று வீழ்த்த சிலையினான் செய்த கோயி றிருவிரா மேச்சுரத்தைத் தலையினால் வணங்கு வார்கள் தாழ்வராந்தவம தாமே.

4.061.8

பலகாலமாக இவ்வுலகில் கூட்டமாகத் தோன்றித் தீமைகளையே செய்து கொல்லும் வில்லை ஏந்திய கொடியவர்களான அரக்கர்களைக் கொன்று வீழ்த்திய வில்லை ஏந்திய திருமால் அமைத்த இராமேச்சுரக் கோயிலைத் தலையினால் வணங்கும் அடியவர்கள் பின் உடம்பாலும் முழுமையாக விழுந்து வணங்குவார்கள். அச்செயல் தவப் பயனால் நிகழ்வதாகும்.

596

கோடிமா தவங்கள் செய்து குன்றினார்தம்மை யெல்லாம் வீடவே சக்க ரத்தா லெறிந்துபின்னன்பு கொண்டு தேடிமால் செய்த கோயி றிருவிரா மேச்சுரத்தை நாடிவாழ் நெஞ்ச மேநீ நன்னெறியாகு மன்றே.

4.061.9

நெஞ்சே! பல ஆண்டுகள் சிறந்த தவத்தைச் செய்து, ஒழுக்கக் கேடு உள்ள அரக்கர்களை எல்லாம் அவர்கள் அழியுமாறு சக்கரம் முதலிய படைகளால் அழித்துப் பின்தக்க இடத்தைத் தேடித் திருமால் அமைத்த இராமேச்சுரத்தை நீ விரும்பிச் சென்று வாழ்தி. அதுவே உனக்கு நன்னெறியாம்.

597

வன்கண்ணர் வாள ரக்கர் வாழ்வினையொன்ற றியார் புன்கண்ண ராகி நின்று போர்கள்செய்தாரை மாட்டிச் செங்கண்மால் செய்த கோயி றிருவிரா மேச்சுரத்தைத் தங்கணா லெய்த வல்லார் தாழ்வராந்தலைவன் பாலே.

4.061.10

அகத்தில் உள்ள வன்மையைப் புறத்தில் காட்டும் கண்களை உடைய கொடிய அரக்கர்கள் வாழும் செயலை அறியாராய்த் துன்புறுத்தும் இயல்பினராய் நின்று போர்களைச் செய்ய, அவரை அழித்துச் சிவந்த கண்களை உடைய திருமால் அமைத்த இராமேச்சுரக் கோயிலைத் தம் கண்ணால் தரிசிக்கும் நற்பேறு உடையவர்கள் சிவபெருமான் பக்கலிலேயே தங்கும் வாய்ப்பினைப் பெறுவர்.

598

வரைகளொத் தேயு யர்ந்த மணிமுடி யரக்கர்கோனை விரையமுற் றறவொ டுக்கி மீண்டுமால்செய்த கோயில் திரைகள்முத் தால்வ ணங்குந் திருவிரா மேச்சுரத்தை உரைகள்பத் தாலு ரைப்பா ருள்குவா ரன்பினாலே.

4.061.11

மலைகளை ஒத்து உயர்ந்த, மணிகள் வைத்து இழைக்கப்பட்ட கிரீடங்களை உடைய அரக்கர் தலைவனான இராவணனை விரைவாக அடியோடு அழித்துத் தமிழகம் திரும்பித் திருமால் செய்த கோயிலாய் அலைகள் முத்துக்களைச் சமர்ப்பித்து வணங்கும் திரு இராமேச்சுரத்தை முன்னைய இப்பத்துப் பாடல்களாலும் போற்றுபவர்கள் அன்பினாலே தியானித்து நற்பேறு பெறுபவராவர்.