நான்காம் திருமுறை-தேவாரப் பதிகங்கள் - 4.022.கோயில்

இத்தலம் சோழநாட்டிலுள்ளது.

சுவாமிபெயர் - திருமூலத்தானநாயகர் (எ) சபாநாதர்.
தேவியார் - சிவகாமியம்மை.

218

செஞ்சடைக் கற்றை முற்றத் திளநிலா வெறிக்குஞ் சென்னி நஞ்சடை கண்ட னாரைக் காணலா நறவ நாறு மஞ்சடை சோலைத் தில்லை மல்குசிற் றம்ப லத்தே துஞ்சடை யிருள் கிழியத் துளங்கெரி யாடு மாறே.

4.022.1

சிவந்த சடைக்கற்றையாகிய முன்னிடத்தில் பிறை ஒளிவீசும் திருமுடியை உடைய, விடம் பொருந்திய கழுத்தினராகிய சிவபெருமானை, மேக மண்டலம் வரை வளர்ந்த தேன் மணம் கமழும் சோலைகளை உடைய தில்லைப் பதியிலே விளங்குகின்ற சிற்றம் பலத்திலே, செறிந்து பரவியுள்ள இருள் நீங்குமாறு கையில் அசைகின்ற தீயோடு கூத்து நிகழ்த்தும் நிலையில் காணலாம்.

219

ஏறனா ரேறு தம்பா லிளநிலா வெறிக்குஞ் சென்னி ஆறனா ராறு சூடி யாயிழை யாளோர் பாக நாறுபூஞ் சோலைத் தில்லை நவின்றசிற் றம்ப லத்தே நீறுமெய் பூசி நின்று நீண்டெரி யாடு மாறே.

4.022.2

காளையை வாகனமாகவுடையவராய், பிறை ஒளிவீசும் தலையிலே கங்கையாற்றை உடையவராய், கங்கையைச் சூடிக்கொண்டு, பார்வதி ஒருபாகமாக, நறுமணம் கமழும் சோலைகளை உடைய தில்லை நகரிலே தாம் பலகாலும் பழகிய சிற்றம்பலத்திலே உடலில் திருநீறு பூசிக்கொண்டு பலகாலம் ஞானத்தீயிடைக் கூத்தாடுமாற்றைக் காணலாம்.

220

சடையனார் சாந்த நீற்றர் தனிநிலா வெறிக்குஞ் சென்னி யுடையனா ருடை தலை(ய்)யி லுண்பதும் பிச்சை யேற்றுக் கடிகொள்பூந் தில்லை தன்னுட் கருதுசிற் றம்ப லத்தே அடிகழ லார்க்க நின்று வனலெரி யாடு மாறே.

4.022.3

சடையை உடையவராய்த் திருநீற்றையே சந்தனமாகப் பூசியவராய், ஒரேபிறை ஒளிவீசும் தலையை உடையவராய், மண்டையோட்டில் பிச்சை ஏற்று உண்பதனை உடையவராய், நறுமணம் கமழும் பூக்கள் நிறைந்த தில்லை நகரில் சிறப்பாகக் கருதப்படும் சிற்றம்பலத்திலே, திருவடிகளிலே வீரக்கழல் ஆரவாரம் செய்ய நின்று, ஒளிவீசும் ஞானத் தீயிடையே கூத்து நிகழ்த்துமாற்றைக் காணலாம்.

221

பையர வசைத்த வல்குற் பனிநிலா வெறிக்குஞ் சென்னி மையரிக் கண்ணி யாளும் மாலுமோர் பாக மாகிச் செய்யரி தில்லை தன்னுட் டிகழ்ந்தசிற் றம்ப லத்தே கையெரி வீசி நின்று கனலெரி யாடு மாறே.

4.022.4

குளிர்ந்த பிறை ஒளி வீசும் தலையிலே படம் எடுக்கும் பாம்பை வருத்தும் வனப்புடைய அல்குலை உடைய, செவ்வரி கருவரி பரந்த மை தீட்டிய கண்களை உடைய கங்கையோடு, திருமால் ஒருபாகமாக அமைய, வயலிலே தானியங்கள் அறுவடை செய்யப்படுகின்ற தில்லையம்பதியிலே விளங்கும் சிற்றம்பலத்திலே சிவபெருமான் கையில் ஏந்திய நெருப்பினை வீசிக்கொண்டு நின்றவராய், ஒளிவீசும் ஞானத் தீயிடையே கூத்து நிகழ்த்துமாற்றைக் காணலாம்.

222

ஓதினார் வேதம் வாயா லொளிநிலா வெறிக்குஞ் சென்னி பூதனார் பூதஞ் சூழப் புலியுரி யதள னார்தாம் நாதனார் தில்லை தன்னு ணவின்றசிற் றம்ப லத்தே காதில்வெண் குழைகள் தாழக் கனலெரி யாடு மாறே.

4.022.5

ஐம்பூதங்களாக இருக்கும் பெருமான், தம் வாயால் வேதம் ஓதினராய்ப் பிறை ஒளிவீசும் சென்னியராய்ப் புலித்தோலை அணிந்தவராய்த் தாம் எல்லோருக்கும் தலைவராய்ப் பூதங்கள் சூழத் தில்லையம்பதியில் பலகாலும் பழகிய சிற்றம்பலத்திலே காதிலணிந்த வெண்குழைகள் தொங்குமாறு ஒளிவீசும் ஞானத் தீயிடையே கூத்து நிகழ்த்துமாற்றைக் காணலாம்.

223

ஓருடம் பிருவ ராகி யொளிநிலா வெறிக்குஞ் சென்னிப் பாரிடம் பாணி செய்யப் பயின்றவெம் பரம மூர்த்தி காரிடந் தில்லை தன்னுட் கருதுசிற் றம்ப லத்தே பேரிடம் பெருக நின்று பிறங்கெரி யாடு மாறே.

4.022.6

ஒரே உடம்பில்தாமும் பார்வதியுமாக இருவராகி, ஒளிவீசும் பிறையின் ஒளி பரவிய சென்னியராய், பூதக்கூட்டங்கள் தாளம் போட, கூத்தாடுதலின் பழகிய எம் மேம்பட்ட பெருமான், மேகங்கள் தங்கும் தில்லையிலே சிறப்பாகக் கருதப்படும் சிற்றம்பலத்திலே அகண்டமாய் வளருமாறு நின்று, விளங்குகின்ற ஞானத் தீயிடையே கூத்து நிகழ்த்துமாற்றைக் காணலாம்.

224

முதற்றனிச் சடையை மூழ்க முகிழ்நிலா வெறிக்குஞ் சென்னி மதக்களிற் றுரிவை போர்த்த மைந்தரைக் காண லாகு மதர்த்துவண் டறையுஞ் சோலை மல்குசிற் றம்ப லத்தே கதத்ததோ ரரவ மாடக் கனலெரி யாடு மாறே.

4.022.7

முதன்மையும் ஒப்பற்ற தன்மையும் உடையசடைமுழுதும் பிறை தன் ஒளியைப் பரப்பும் சென்னியை ய், மதம் பொருந்திய யானையை கொன்று அதன் தோலைப் போர்த்திய வலிமை உடையவராய், தேன் உண்டு களித்து வண்டுகள் ஒலிக்கும் சோலைகள் நிறைந்த சிற்றம்பலத்தில் கோபம் கொண்ட பாம்பு படமெடுத்து ஆடச் சிவபெருமான் ஒளிவீசும் ஞானத் தீயிடையே கூத்து நிகழ்த்துமாற்றைக் காணலாம்.

225

மறையனார் மழுவொன் றேந்தி மணிநிலா வெறிக்குஞ் சென்னி இறைவனா ரெம்பி ரானா ரேத்துவா ரிடர்க டீர்ப்பார் சிறைகொணீர்த் தில்லை தன்னுட் டிகழ்ந்தசிற் றம்ப லத்தே அறைகழ லார்க்க நின்று வனலெரி யாடு மாறே.

4.022.8

வேதம் ஓதுபவராய், மழுப்படை ஒன்றை ஏந்தியவராய், அழகிய பிறை நிலவொளி வீசும் சென்னியராய், எல்லோர் உள்ளத்தும் தங்கியிருப்பவராய், எங்கள் தலைவராய், தம்மைத் துதிப்பவர்களுடைய துயரங்களை நீக்குபவராய், நீர்ப் பாசனத்துக்காகத் தேக்கி வைக்கப்பட்டுள்ள தில்லையம்பதியிலே விளங்குகின்ற சிற்றம்பலத்திலே, சிவபெருமான் தம் கழல் ஒலி செய்ய நின்று ஞானத் தீயிடையே கூத்து நிகழ்த்துமாற்றைக் காணலாம்.

226

விருத்தனாய்ப் பால னாகி விரிநிலா வெறிக்குஞ் சென்னி நிருத்தனார் நிருத்தஞ் செய்ய நீண்டபுன் சடைக டாழக் கருத்தனார் தில்லை தன்னுட் கருதுசிற் றம்ப லத்தே அருத்தமா மேனி தன்னோ டனலெரி யாடு மாறே.

4.022.9

ஆண்டில் மூத்தவராகவும், மிக இளையராகவும் காட்சி வழங்குபவராய், பிறை விரிந்த ஒளியைப் பரப்பும் சென்னியராய்க் கூத்து நிகழ்த்துபவராய், நீண்ட சிவந்த சடைகள் தொங்கக் கூத்தாடுதலால் அடியவர் உள்ளத்தில் என்றும் தங்கியிருப்பவராய், தில்லையம்பதியிலே சிறப்பாகக் கருதப்படுகின்ற சிற்றம்பலத்திலே பார்வதிபாகமான திருமேனியோடு ஒளிவீசும் ஞானத் தீயிடைச் சிவபெருமான் கூத்தாடும் காட்சியைக் காணலாம்.

227

பாலனாய் விருத்த னாகிப் பனிநிலா வெறிக்குஞ் சென்னிக் காலனைக் காலாற் காய்ந்த கடவுளார் விடையொன் றேறி ஞாலமாந் தில்லை தன்னுள் நவின்றசிற் றம்ப லத்தே நீலஞ்சேர் கண்ட னார்தா நீண்டெரி யாடு மாறே.

4.022.10

பாலனாகவும் மூத்தோனாகவும் காட்சி வழங்கிக் குளிர்ந்த பிறை ஒளிவீசும் சென்னியராய்க் காலனை காலான் வெகுண்ட பெருமானார் காளையை இவர்ந்து உலகவர் கூடி வணங்கும் தில்லையம்பதியில் சிறப்பாகப் போற்றப்படும் சிற்றம்பலத்திலே நீலகண்டராய் விரிவாக ஞானத் தீயிடைக் கூத்து நிகழ்த்தும் காட்சியைக் காணலாம்.

228

மதியிலா வரக்க னோடி மாமலை யெடுக்க நோக்கி நெதியன்றோ ணெரிய வூன்றி நீடிரும் பொழில்கள் சூழ்ந்த மதியந்தோய் தில்லை தன்னுள் மல்குசிற் றம்ப லத்தே அதிசயம் போல நின்று வனலெரி யாடு மாறே.

4.022.11

அறிவற்ற அரக்கனாகிய இராவணன் விரைந்து சென்று பெரிய கயிலை மலையைப் பெயர்க்க, அதனை மனத்தால் நோக்கிச் செல்வனான அவனுடைய தோள்கள் நெரியுமாறு கால்விரல் ஒன்றனை ஊன்றி, நீண்ட பொழில்கள் சூழ்ந்த தில்லையுள் விளங்கும் சிற்றம்பலத்திலே சிவபெருமான் எல்லோரும் வியக்குமாறு குறுகிய இடத்தில் நின்று ஒளிவீசும் ஞானத் தீயிடைக் கூத்து நிகழ்த்தும் காட்சியைக் காணலாம்.