பழமொழி நானூறு - பதினெண் கீழ்க்கணக்கு

குலத்துச் சிறயார், கலாம் தணிப்பான் புக்கு விலக்குவார் மேலும், எழுதல்-நிலத்து நிலை அழுங்க வேண்டிப் புடைத்தக்கால், வெண் மாத் தலை கீழாக் காதிவிடல்.

111

குலத்தினால் சிறியவர்கள் (பிறரிடம் கொண்ட) பகைமையை நீக்கும்பொருட்டு இடைப்புகுந்து விலக்குவாரிடத்தும் சினந்து எழுதல் அவ்விடத்தில் நிற்கின்ற நிலை நீங்கும் பொருட்டு (சாட்டையால்) அடித்தவிடத்து வெள்ளிய குதிரையானது சவாரி செய்யத் தெரியாதவனைத் தலைகீழாகத் தள்ளித் துன்புறுத்துவதோ டொக்கும்.

கருத்து: கீழ்மக்கள் தமக்கு நன்மை செய்வோரிடத்திலும் வெகுண்டுஎழுவார்கள்.

சொல் எதிர்ந்து, தம்மை வழிபட்டு ஒழுகலராய், கல் எறிந்தாற் போலக் கலாம் தலைக்கொள்வாரை இல் இருந்து, ஆற்ற முனிவித்தல்,-உள் இருந்து, அச்சாணி தாம் கழிக்குமாறு.

112

தாங்கூறும் அறிவுரைகளை யேற்றுக்கொண்டு தம்மை வழிபாடு செய்து ஒழுகாதவராய் கற்களை வீசினாற்போன்ற தீய சொற்களைச் சொல்லிப் பகைமையை மேற்கொள்வாரை அவர் வீட்டினுள்ளேயிருந்து மிகவும் அவரை முனிவித்தல் தேரின் உள்ளே இருந்து அச்சின் கண்சொருகும் ஆணியைத் தாமே நீக்கிவிடுவது போலாம்.

கருத்து: கீழ்மக்களது அருகில் இருந்து அவருக்குச் சின மூட்டுதல் தனக்குத் தீங்கினை விளைவித்துக்கொள்வதாக முடியும்.

நாணார், பரியார், நயன் இல செய்து ஒழுகும் பேணா அறிவு இலா மாக்களைப் பேணி, ஒழுக்கி, அவரோடு உடனுறைசெய்தல்- புழுப் பெய்து புண் பொதியுமாறு.

113

நன்மையில்லாத செயல்களைச் செய்து ஒழுகுகின்ற யாவரானும் விரும்பப்படாத அறிவு இல்லாத விலங்கு ஒப்பாரை விரும்பிநடத்தி அவருடன் கூடி வாழ்தலைச் செய்தல் புழுவினை உள்ளே இட்டுப் புண்ணைமூடிவைத்ததோடு ஒக்கும்.

கருத்து: தீயாரோடு உடனுறையின் தீமையே விளையும்.

பொல்லாத சொல்லி, மறைந்து ஒழுகும் பேதைகள் சொல்லாலே தன்னைத் துயர்ப்படுக்கும்;-நல்லாய்!- மணலுள் முழுகி மறைந்து கிடக்கும் நுணலும் தன் வாயால் கெடும்.

114

நற்குணமுடையாய்! மணலுள் பதிந்து மறைந்திருக்கும் தவளையும் தன்குரலைக் காட்டுதலால் தன் வாயாலேயே தன்னைத் தின்பார்க்கு அகப்பட்டு இறந்தொழியும் தீயனவற்றைக்கூறி ஒளித்து நிற்கும் அறிவிலான் தான்கூறும் சொற்களாலேயே தன்னைத் துன்பத்தின்கண்அகப்படுத்திக்கொள்வான்.

கருத்து:அறிவிலான் தன் வாயாலேயே தனக்குத் தீங்கு தேடிக்கொள்வான்.

தாக்குற்ற போழ்தில் தமரேபோல் நன்கு உரைத்து, போக்குற்ற போழ்தில் புறன் அழீஇ, மேன்மைக்கண் நோக்கு அற்றவரைப் பழித்தல் என்? என்னானும், மூக்கு அற்றதற்கு இல், பழி.

115

எப்படி ஆயினும் மூக்கு அறுபட்டதற்குப் பழிப்பு இல்லை (அதுபோல) ஒருவரைத் தலைப்பட்ட பொழுது தம் உறவினரைப்போல் அன்புடன் நன்றாகப் புகழ்ந்துரைத்து அவர் நீங்கிய இடத்து புறம் பேசுபவர்களைப் பற்றி அழித்துப் பேசுபவரால் மேன்மைக் குணத்தின்கண் கருத்து இல்லாதவர்களை இகழ்ந்துரைத்தல் ஏன்?

கருத்து: புறங்கூறுவார் என்றும் திருந்தார்.