சீராக் ஆகமம் - பழைய ஏற்பாடு

¹ உன்னுடன் சேர்ந்து வாழும் பெண்ணின் மீது சந்தேகம் கொள்ளாதே@ ஏனென்றால், கெட்ட நடத்தையின் அக்கிரமத்தை அவள் உன் மீது செலுத்துவாள்.

² உன் அதிகாரத்தைப் பெண் அபகரித்துக் கொள்வதால் நீ வெட்கம் அடையாதபடிக்கு உன் மன அதிகாரத்தை அவளுக்குக் கொடுத்து விடாதே.

³ பல காரியங்களை ஆசிக்கும் பெண்ணின் வலைகளில் நீ சிக்கிக் கொள்ளாதபடிக்கு அவளை ஏறெடுத்துப் பார்க்காதே.

⁴ நடன மாதோடு தொடர்பு கொள்ளாதே. அவள் மாய்கையினால் கெடாதபடி அவளுக்குச் செவி கொடாதே.

⁵ இளமங்கையின் அழகினால் நீ கெட்டுப் போகாதபடி அவளைக் கண்ணோக்காதே.

⁶ எக்காரியத்திலும் விலைமாதருக்கு உன் மனத்தைப் பறிகொடாதே. ஏனென்றால், உன்னையும் உன் சொத்துக்களையும் இழந்து போவாய்.

⁷ நகரின் தெருக்களில் சுற்றிப்பார்க்காதே@ அதன் மைதானங்களில் திரியாதே.

⁸ தன்னைத் தானே அழகுபடுத்தித் திரியும் பெண்ணினின்று உன் முகத்தைத் திருப்பிக் கொள். அழகுள்ள அன்னிய பெண்ணை நோக்காதே.

⁹ பெண்ணின் அழகினால் பலர் கெட்டழிந்துள்ளார்கள்@ அதனால் ஆசையுணர்வு நெருப்பைப் போல் பற்றி எரிகின்றது.

¹⁰ வேசியாய்த் திரியும் எவளும் பாதையிலுள்ள சகதியைப் போல் மிதிக்கப்படுவாள்.

¹¹ பிறன் மனைவியின் அழகைக் கண்டு அதிசயித்தவர்கள் பலர் தள்ளுண்டு போனார்கள். ஏனென்றால், அவள் உரையாடல் நெருப்பைப் போல் எரிகின்றது.

¹² பிறன் மனைவியோடு ஒரு போதும் உட்கார்ந்திராதே. முழங்கையூன்றிச் சாய்ந்து அவளுடன் மேசையில் அமராதே.

¹³ உன் மனம் அவள் மீது ஆசை கொள்ளாதபடிக்கும், அதனால் நீ இரத்தம் சிந்தி உயிர் இழக்காதபடிக்கும் அவளுடன் மது குடித்து உல்லாசமாய் உரையாடாதே.

¹⁴ பழைய நண்பனைக் கைவிடாதே. ஏனென்றால், புதியவன் அவனைப் போல் ஆகமாட்டான்.

¹⁵ புதிய மதுவைப் போலவே புதிய நண்பனும். மது பழமைப்பட்டால் அதை இன்பத்தோடு அருந்துவாய்.

¹⁶ பாவியினுடைய மகிமையையும் செல்வத்தையும் பற்றிப் பொறாமை கொள்ளாதே. ஏனென்றால், அவனுக்குப் பின்வரும் கேட்டை நீ அறியாய்.

¹⁷ தீயவன் மறுவுலகம் வரையிலும் விரும்பப்படுவதில்லை என்று நீ அறிந்திருக்கிறபடியால், நீதியற்றவனுடைய அநீதியை விரும்பாதே.

¹⁸ கொலை செய்யும் வலிமையுள்ள மனிதனை விட்டகன்று வெகு தூரத்தில் இரு. அப்போது மரணத்தின் பயங்கரம் உன்னை அணுகாது.

¹⁹ அவனிடம் நீ போவாயேயாகில், அவன் உன் உயிரை வாங்காதபடிக்கு யாதொன்றும் செய்யாதே.

²⁰ மரண நேரம் கிட்டியிருக்கிறதென்று அறிந்திரு. ஏனென்றால், கண்ணிகளின் நடுவே புகுகிறாய்@ கோபவெறி கொண்டவர்களுடைய ஆயுதங்களின் மேல் உலாவுகிறாய்.

²¹ உன் வலிமைக்குத் தக்க வண்ணம் பிறனோடு எச்சரிக்கையாய் இரு. ஞானிகளுடையவும் விவேகிகளுடையவும் யோசனையைக் கேள்.

²² நீதிமான்கள் உன்னுடன் பந்தியமரக் கடவார்கள். உன் மகிமை தெய்வ பயத்தில் அடங்கியிருக்கக்கடவது.

²³ உன் உள்ளத்தில் கடவுளைப் பற்றிய எண்ணம் இருக்கக்கடவது. உன் உரையாடலெல்லாம் உன்னத கடவுளின் கட்டளைகளைப் பற்றியதாய் இருக்கக்கடவது.

²⁴ தொழிலாளரின் கையினால் செய்யப்பட்ட வேலைகள் மதிப்படைகின்றன. மக்கள் தலைவன் தன் வார்த்தைகளின் ஞானத்தாலும், முதியோர் தம் மொழிகளின் கருத்தினாலும் புகழப்படுவார்கள்.

²⁵ வாயாடி தன் ஊரில் அஞ்சப்படத்தக்கவன். யோசனையில்லாமல் பேசுகிறவன் பகைக்கப்பட வேண்டியவன்.