சீராக் ஆகமம் - பழைய ஏற்பாடு

¹ நீ கேள்விப்பட்டதை வெளியே சொல்லாதே. இரகசியமாய் இருக்கிறதை வெளிப்படுத்தாதே. அப்போது தான் வெட்கமடைய மாட்டாய்@ எல்லா மனிதருக்கும் முன்பாக நேர்மையாளனாக மதிக்கப்படுவாய். நான் சொல்லப் போகிறவைகளைப் பற்றி வெட்கப்படாதே.

² முகத் துதியினால் தவற்றில் விழாதே. உன்னத கடவுளுடைய கட்டளையைப் பற்றியும் உடன்படிக்கையைப் பற்றியும் வெட்கப்படாதே. அக்கிரமியை நீதிமானாக்கும் தீர்மானத்திற்கு இடம் கொடாதே.

³ தோழர்களோடும் வழிப்போக்கரோடும் உரையாடுவதிலும், நண்பருக்குச் சேரவேண்டிய உரிமைகளிலும்,

⁴ தராசினுடையவும் நிறையினுடையவும் சமனைப் பற்றியும், அதிக, சொற்பச் சம்பாத்தியத்தைப் பற்றியும்,

⁵ கொள்வதிலும் கொடுப்பதிலும் நடக்கும் மோசடியைப் பற்றியும், மக்களைக் கண்டிப்பாய் நடத்துவதிலும், கெட்ட ஊழியனை இரத்தம் வர அடிப்பதிலும் நீதியாய் நடந்து கொள்வதற்கு அஞ்சாதே.

⁶ கெட்ட பெண்ணை அடைத்து வைத்திருப்பது நலம்.

⁷ எவ்விடம் பல கைகளுண்டோ அவ்விடம் பூட்டி வை. கொடுப்பதெல்லாவற்றையும் கணக்கிட்டு நிறுத்துக் கொடு. கொடுத்தது வாங்கினவற்றையெல்லாம் குறித்து வை.

⁸ மூடனுடையவும் பேதையினுடையவும் நெறியைப் பற்றியும், இளைஞரால் தீர்ப்பிடப்படுகிற முதியவரைப் பற்றியும் கவனி. எல்லாவற்றிலும் அறிவுடையவனாய் நடந்து கொள்வாய். அப்பொழுது எல்லாருக்கும் முன்பாக ஏற்றுக் கொள்ளப்படுவாய்.

⁹ மகள் தந்தையின் தனிக் கவலையாய் இருக்கிறாள். அவளைப் பற்றிய கவலை அவன் தூக்கத்தை நீக்கி விடுகின்றது. ஏனென்றால், இளம் பருவத்திலேயே அவளுக்குக் கன்னிப் பருவம் வந்து விடக் கூடும்@ அவள் ஆடவனோடு இருப்பதில் சிலவேளை வெறுக்கப்படுவாள்.

¹⁰ அவள் தன் கன்னிமையில் அசுத்தப்படாதபடிக்கும், தன் தந்தையின் வீட்டிலேயே கருவுற்றவளாய்க் காணப்படாதபடிக்கும், கணவனோடு வாழ்கையில் கட்டளையை மீறாதபடிக்கும், அல்லது மலடியாகவே ஆகாதபடிக்கும் கவனமாய் இரு.

¹¹ காம வெறியுள்ள மகளின் மேல் கண்ணும் கருத்துமாய் இரு. உன் பகைவர் முன் உனக்கு நிந்தை வரும்படியாகவும், ஊரில் புறணியும் மக்களிடையே வெறுப்பும் வரும்படியாகவும் அவள் செய்யாதிருக்கக்கடவாள்@ மக்கட் கூட்டத்திற்கு முன்பாக உனக்கு வெட்கம் வருவியாதிருக்கக்கடவாள்.

¹² எவரிடத்திலும் அழகைப் பாராதே. பெண்கள் நடுவில் தாமதித்து நில்லாதே.

¹³ ஆடையினின்று பூச்சி புறப்படுகின்றது. பெண்ணிடமிருந்து ஆண் பிள்ளையின் தீச்செயல் உண்டாகின்றது.

¹⁴ உனக்கு நன்மை செய்யும் பெண்ணை விடவும், உன்னை நிந்தைக்கு உள்ளாக்கி வெட்கப்படுத்தும் பெண்ணை விடவும் ஆண் மகனின் கெட்ட குணம் தாவிளை.

¹⁵ ஆதலால், ஆண்டவருடைய செயல்களை நினைத்துக் கொள். நான் பார்த்தவைகளை அறிவிப்பேன். ஆண்டவருடைய வார்த்தைப்படியே அவர் உண்டாக்கினவை செய்கின்றன.

¹⁶ கதிரவன் அனைத்தையும் ஒளிர்வித்துப் பார்த்தது. ஆண்டவருடைய செயல் அவர் மகிமையால் நிறைந்திருக்கின்றது.

¹⁷ தமது மகிமையில் நிறுத்தி நிலைப்படுத்தின தம் எல்லா அதிசயங்களையும் புண்ணியவான்கள் அறிவிக்கும்படி எல்லாம் வல்ல ஆண்டவர் செய்யவில்லையா?

¹⁸ அவர் பாதாளத்தையும் மனிதர் இதயத்தையும் பரிசோதித்தார்@ அவர்களுடைய சூழ்ச்சி நிறை எண்ணங்களை அறிந்து கொண்டார்.

¹⁹ ஏனென்றால், ஆண்டவர் எல்லாக் கலைகளையும் அறிந்தவர்@ யுகங்களின் அடையாளங்களைக் கண்டவர். அவர் கடந்தவைகளையும் வருங்காரியங்களையும் அறிவிக்கிறார்@ மறைக்கப் பட்டவைகளின் குறிப்புகளைத் தெரிவிக்கிறார்.

²⁰ எவ்வித எண்ணமும் அவருக்குத் தெரியாமல் போவதில்லை@ எவ்வித வார்த்தையும் அவரிடத்தினின்று தன்னை மறைப்பதில்லை.

²¹ அவர் தமது ஞானத்தின் மகத்துவங்களை அலங்கரித்தார். அவரே யுகங்களுக்கு முன்னும் நித்திய காலத்திற்கும் இருக்கிறவர். யாதொன்றும் அவருக்குச் சேர்க்கப்படவில்லை@ குறைக்கப்படுவதில்லை.

²² மற்றவர்களுடைய அறிவுரையும் அவருக்குச் வேண்டுவதில்லை.

²³ அவருடைய செயல்கள் யாவும் எவ்வளவோ விரும்பத்தக்கவை. ஆனால், அவைகளைப் பற்றி நாம் சிந்திப்பதோ ஒரு துளி அளவேயாம்.

²⁴ இவை யாவும் வாழ்ந்திருக்கின்றன@ என்றும் நிலைத்திருக்கின்றன. தேவையான போது, எல்லாம் அவருக்குக் கீழ்ப்படிகின்றன.

²⁵ எல்லாம் இரட்டையாயும் ஒன்றுக்கொன்று எதிரானவையாயும் இருக்கின்றன. அவர் யாதொன்றையும் குறைவாய்ச் செய்யவில்லை.

²⁶ ஒவ்வொன்றின் நன்மையையும் அவர் நிலைப்படுத்தினார். அவருடைய மகிமையைக் கண்டு சலித்துப்போகிறவன் யார்?