சீராக் ஆகமம் - பழைய ஏற்பாடு

¹ ஓ சாவே, தன் செல்வங்களில் ஆர்வம் வைத்திருக்கும் மனிதனுக்கு உன் நினைவு எவ்வளவோ கசப்பாய் இருக்கிறது!

² எல்லாவற்றிலும் தப்பின்றித் தன் வழிகளைச் செலுத்தும் அமைதியுள்ள மனிதனுக்கும், இன்னும் உணவு உட்கொள்ள வலுவுள்ள மனிதனுக்கும் எவ்வளவோ கசப்பானது!

³ ஆனால், ஓ சாவே, வறுமையுள்ள மனிதனுக்கும், வலிமை குன்றியவனுக்கும் உன் தீர்மானம் நலமாய் இருக்கின்றது.

⁴ வயதால் தளர்ந்தவனுக்கும், எல்லாவற்றிலும் கவலையுள்ளவனுக்கும், நம்பிக்கையற்றவனுக்கும், பொறுமையை இழந்தவனுக்கும் நலமாய் இருக்கின்றது.

⁵ சாவின் தீர்மானத்திற்கு அஞ்சாதே. உனக்கு முன் இருந்தவர்களையும், உனக்குப் பிறகு வரப்போகிறவர்களையும் நினைத்துக் கொள். இந்தத் தீர்மானம் எல்லா மனிதருக்குமே ஆண்டவரால் விதிக்கப்பட்டது.

⁶ உன்னத கடவுளின் திருவுளத்தின் முன் உன்னால் நடக்கப்போவது என்ன? பத்து அல்லது நூறு அல்லது ஆயிரம் ஆண்டுகள் வாழ்ந்தாலும் என்ன?

⁷ மறுவுலகத்தில் வாழ்க்கையைப் பற்றிக் குற்றம் சாட்ட முடியாது.

⁸ பாவிகளின் சந்ததியாரும் அக்கிரமிகளின் வீடுகளில் வாழ்கிறவர்களும் வெறுப்புக்குரிய மக்களாவர்.

⁹ பாவிகளுடைய மக்களின் உரிமை அழிந்து போகும். அவர்களுடைய சந்ததியில் தீராத நிந்தையே இருக்கும்.

¹⁰ தீய நெறியுடைய தந்தையைப் பற்றிப் பிள்ளைகள் முறையிடுகிறார்கள்@ ஏனென்றால், அவனால் இவர்கள் நிந்தைக்கு ஆளானார்கள்.

¹¹ உன்னத ஆண்டவருடைய கட்டளையை விட்டு விட்ட அக்கிரமிகளான மனிதரே, உங்களுக்குக் கேடாம்.

¹² நீங்கள் பிறக்கையில் சாபத்தில் பிறக்கிறீர்கள்@ நீங்கள் சாகும் போது சாபத்தை உரிமையாக்கிக் கொள்வீர்கள்.

¹³ மண்ணினின்று உண்டாகிறதெல்லாம் மண்ணுக்கே திரும்பும். அவ்வாறே அநீதரும் சாபத்தினின்று அழிவுக்கு உள்ளாவார்கள்.

¹⁴ மனிதருடைய துக்கம் அவர்கள் உடலில் உள்ளது. ஆனால், அக்கிரமிகளுடைய பெயர் அழிக்கப்படும்.

¹⁵ நல்ல பெயரைப் பற்றிக் கவலைப்படு. ஏனென்றால், ஆயிரம் பெரிய விலையுயர்ந்த செல்வங்களை விட அது உனக்கு அதிகம் நிலைத்திருக்கும்.

¹⁶ இன்பம் அனுபவிக்கும் வாழ்நாட்கள் கொஞ்சமானவை. நல்ல பெயரோ நித்தியத்திற்கும் நிலைத்திருக்கும்.

¹⁷ மக்களே, நன்னெறியை அமைதியுடன் காப்பாற்றுங்கள். ஏனென்றால், காணப்படா ஞானமும் புதைக்கப்பட்ட செல்வமும் பயனற்றவை.

¹⁸ தன் ஞானத்தை மறைக்கும் மனிதனை விடத் தன் மூடத்தனத்தை மறைக்கிறவன் சிறந்தவன்.

¹⁹ ஆதலால், என் வாயினின்று புறப்படுகிறவைகளைக் கேட்டு நாணம் அடையுங்கள்.

²⁰ ஏனென்றால், எல்லாவற்றிலும் நாணத்தை ஏற்றுக்கொள்வது நன்றன்று. உண்மையாகவே எல்லாருக்குமே எல்லாம் விரும்பப்படுவன அல்ல.

²¹ தாய் தந்தையருக்கு முன்பாக விபசாரத்தைப் பற்றியும், வல்லவனிடத்திலும் தலைவரிடத்திலும் பொய்யைப் பற்றியும் வெட்கப்படுங்கள்.

²² பிரபு இடத்திலும் நீதிபதி இடத்திலும் குற்றத்தைப் பற்றியும், செபக்கூடத்திலும் மக்களிடத்திலும் அநீதியைப் பற்றியும்,

²³ தோழனிடத்திலும் நண்பனிடத்திலும் அநியாயத்தைப் பற்றியும்,

²⁴ நீ வாழும் இடத்திலே, திருட்டைப் பற்றியும், பொய்யாணை, பொய் உடன்படிக்கையைப் பற்றியும், சாப்பாட்டு மேசையில் சாய்வதைப் பற்றியும், கொடுக்கல் வாங்கலில் மோசடியைப் பற்றியும்,

²⁵ வணக்கம் செய்பவர்களுக்கு மௌனத்தைப் பற்றியும், விபசாரப் பெண்ணை நோக்குவது பற்றியும், உறவினனுக்கு முகத்தைத் திருப்பிக் கொள்வதைப் பற்றியும் வெட்கப்படுங்கள்.

²⁶ அயலானிடத்தினின்று உன் முகத்தைத் திருப்பிக் கொள்ளாதே@ அவனுக்குச் சொந்தமானதை அபகரித்த பிறகு ஈடு செய்யாமல் இராதே.

²⁷ அயலானுடைய மனைவியை நோக்காதே@ அவன் ஊழியக்காரியுடன் தகாத பழக்கம் வைத்துக் கொள்ளாதே@ அவள் கட்டிலின் கிட்ட நிற்காதே.

²⁸ நண்பரிடம் நிந்தைக்குரிய வார்த்தைகளைச் சொல்ல வெட்கப்படு. நீ அவர்களுக்குக் கொடுத்ததைப் பற்றி அவர்களை நிந்தியாதே.