சீராக் ஆகமம் - பழைய ஏற்பாடு

¹ எல்லா மனிதருக்கும் பெரும் வேலை ஏற்படுத்தப்பட்டிருக்கின்றது. ஆதாமின் மக்கள் மேல் அவர்கள் தாய் வயிற்றினின்று வெளிப்பட்ட நாள் முதல், எல்லாருக்கும் அன்னையாகிய (பூமியில்) அடக்கமாகும் நாள் வரையிலும் பாரச்சுமை வைக்கப்பட்டிருக்கின்றது.

² அவர்களுடைய எண்ணங்களும், இதயத்தின் பயங்கரமும், வருங்காரியங்களின் கவலையும், முடிவு நாளும் பாரச்சுமை போல் ஆகும்.

³ மகிமையின் அரியணையில் அமர்ந்திருப்பவன் முதல் தூசியிலும் சாம்பலிலும் தாழ்த்தப்பட்டவன் வரையில் எல்லாரும் இவ்வித ஏக்கமுள்ளவராகவே இருக்கிறார்கள்.

⁴ பட்டுடுத்தி முடி தரிப்பவன் முதல் முரட்டுத் துணியால் மூடப்பட்டவன் வரையில் எல்லாரும் கோபம், பொறாமை, கலகம், கலக்கம், சாவின் பயம், தீராத கோபம், சச்சரவு ஆகியவைகளுக்கு உள்ளாகிறார்கள்.

⁵ படுக்கையில், இளைப்பாற்றி நேரத்தில் இரவுத் தூக்கம் அவன் எண்ணத்தை மாற்றுகின்றது.

⁶ இளைப்பாற்றியில் சிறிதும் இளைப்பாற்றி இல்லை. தூக்கத்திலும் பகலிற் போலவே கவலை கொண்டிருக்கிறான்.

⁷ சண்டை நாளில் தப்பியோடினவனைப் போலத் தன் இதயப் பார்வையில் கவலை கொண்டிருக்கிறான்@ அவன் தன் மீட்புக் காலத்தில் எழுந்திருந்தான்@ பயமின்மையைப்பற்றி ஆச்சரியப்படுகிறான்.

⁸ இவ்வித ஏக்கம் எல்லாப் படைப்புகளிலும்- மனிதன் முதல் மிருகங்கள் வரையிலும்- உண்டு. ஆனால், பாவிகளிடத்திலோ அது ஏழு மடங்கு அதிகமாக இருக்கிறது.

⁹ மேலும் சாவு, இரத்தம், சண்டை, வாள், கொடுமைகள், பஞ்சம், அழிவு, கொள்ளைநோய்-

¹⁰ இவை யாவும் அக்கிரமிகளின் பொருட்டு உண்டாக்கப்பட்டன. அவர்களின் பொருட்டே வெள்ளப் பெருக்கும் உண்டானது.

¹¹ மண்ணினின்று தோன்றின யாவும் மண்ணாக மாற்றப்படும். நீர்த்திரளெல்லாம் கடலுக்குத் திரும்பி விடும்.

¹² எல்லா அநீத ஈகையும் அக்கிரமமும் அழித்தொழிக்கப்படும்@ விசுவாசமோ நித்தியத்திற்கும் நிலைத்திருக்கும்.

¹³ அநீதருடைய செல்வம் ஆற்றைப் போல் வற்றிப் போகும்@ மழையில் பெரிய இடியைப் போலக் காணப்படும்.

¹⁴ மனிதன் தன் கைகளைத் திறப்பதனால் மகிழ்ச்சி அடைவான். ஆனால், கட்டளைகளை மீறி நடக்கிறவர்கள் முடிவில் வேரறுக்கப்படுவார்கள்.

¹⁵ அக்கிரமிகளுடைய சந்ததியார் கிளைகளை அதிகரிக்கச் செய்யார்கள். அசுத்த வேர்கள் கற்பாறையின் உச்சியில் உலர்ந்து போகும்.

¹⁶ தண்ணீர் மேலும் ஆற்றங்கரையிலுமுள்ள எல்லாப் பசுஞ் செடிகளும் மற்றப் பயிர்ச் செடிகளுக்கு முன்பே பிடுங்கி எறியப்படும்.

¹⁷ தயாள குணம் ஆசியால் சிங்காரவனத்தைப் போல் இருக்கின்றது. இரக்கம் நித்தியத்திற்கும் நிலை நிற்கும்.

¹⁸ தனக்குப் போதுமான மட்டும் சம்பாதிக்கும் தொழிலாளியின் வாழ்க்கை இன்பமுள்ளதாய் இருக்கின்றது. அவன் அதில் செல்வத்தைக் காண்பான்.

¹⁹ ஒருவன் தன் பிள்ளைகள் மூலமும், நகரத்தைக் கட்டுவதன் மூலமும் பேரெடுப்பான். மாசற்ற மனைவியோ இவைகளுக்கு மேலாக மதிக்கப்படுவாள்.

²⁰ மதுவும் இன்னிசையும் இதயத்தை மகிழ்விக்கின்றன. ஞானத்தின் நேசமோ இவ்விரண்டுக்கும் மேலானது.

²¹ புல்லாங்குழல்களும் வீணையும் இனிய இசையை எழுப்புகின்றன. ஆனால், இனிய நாவு இவ்விரண்டுக்கும் மேலாக இருக்கின்றது.

²² அழகையும் எழிலையும் உன்னுடைய கண் நாடுகின்றது. இவைகளுக்கு மேலானது பசுமையான விளைச்சல்.

²³ நண்பனும் தோழனும் தக்க நேரத்தில் உதவுகிறார்கள். ஆனால், இவ்விருவருக்கும் மேலாவாள் கணவனோடு இருக்கிற மனைவி.

²⁴ துன்ப காலத்தில் சகோதரர் உதவி புரிகிறார்கள். இரக்கமோ அவர்களை விட அதிகமாய்க் காப்பாற்றும்.

²⁵ பொன்னும் வெள்ளியும் கால்களின் உறுதி. ஆனால், இவ்விரண்டையும் விட மேலானது பயனுள்ள அறிவுரை.

²⁶ செல்வமும் ஆற்றலும் இதயத்தை உயர்த்துகின்றன. தெய்வ பயமோ இவைகளை விட மேலானது.

²⁷ தெய்வ பயத்தில் குறை ஒன்றும் இல்லை. அதில் உதவி தேட வேண்டியதன் தேவை இல்லை.

²⁸ தெய்வ பயம் ஆசி நிறைந்த சிங்காரவனத்தைப் போல் இருக்கின்றது. எல்லா மகிமையையும் விடப் பெரிய மகிமையால் அவனை மூடினது.

²⁹ மகனே, உன் வாழ்நாளில் பிச்சை எடுக்காதே. ஏனென்றால், பிச்சை எடுப்பதை விடச் சாவது நல்லது.

³⁰ பிறரின் உணவை நாடுகின்றவனுடைய வாழ்க்கை வாழ்க்கையன்று. ஏனென்றால், அவன் பிறனுடைய உணவுப் பொருட்களால் தன் ஆன்மாவைப் பேணுகிறான்.

³¹ நன்னெறியும் கல்வியுமுள்ள மனிதன் தன்னைத் தானே காத்துக் கொள்கிறான்.

³² அவிவேகியின் வாயில் பிச்சையெடுத்தல் போற்றப்படும். அவனுடைய வயிற்றில் நெருப்பு பற்றி எரியும்.