சீராக் ஆகமம் - பழைய ஏற்பாடு

¹ தெய்வ பயமுள்ளவனுக்குத் தீமைகள் நேரிடா. ஆனால், சோதனையில் கடவுள் அவனைக் காத்து, தீமையினின்று மீட்பார்.

² ஞானமுள்ளவன் கட்டளைகளையும் நீதி மொழிகளையும் பகைக்க மாட்டான்@ புயலில் கப்பலைப் போல் உடைபட மாட்டான்.

³ அறிவுள்ள மனிதன் கடவுளுடைய கட்டளைக்குப் பிரமாணிக்கமாய் நடக்கிறான். கட்டளையும் அவனுக்குப் பிரமாணிக்கத்துடன் இருக்கின்றது.

⁴ கேள்விக்குத் தெளிவான மறுமொழி சொல்கிறவன் மறுமொழியைத் தயார் செய்வான்@ இப்படி மன்றாடின பிறகு கேட்கப்படுவான்@ போதகத்தைக் காப்பாற்றுவான்@ அப்போது மறுமொழி சொல்வான்.

⁵ மூடனுடைய மனம் வண்டியின் சக்கரத்தைப் போல் இருக்கின்றது@ அவன் எண்ணம் சுழலும் அச்சுப் போல் இருக்கின்றது.

⁶ கேலி செய்யும் நண்பன், தன் மேல் யார் ஏறி உட்கார்ந்தாலும் கனைக்கும் அடங்காக் குதிரைக்கு ஒத்தவனாவான்.

⁷ ஒரு நாள் மற்றொரு நாளை விடவும், ஒரு நேரம் மற்றொரு நேரத்தை விடவும், ஓர் ஆண்டு மற்றோர் ஆண்டை விடவும் நல்லது என்பதற்குக் காரணம் என்ன?

⁸ கதிரவன் படைக்கப்பட்டுக் கடவுளுடைய ஏற்பாட்டை நிறைவேற்றும் போது, அவருடைய கட்டளையால் அவை சிறப்படைந்தன.

⁹ அவரே காலங்களையும், அவைகளின் திருநாட்களையும் நியமித்தார். குறிக்கப்பட்ட நேரத்தில் அந்தந்த நாட்களில் மக்கள் திருநாட்களைக் கொண்டாடினார்கள்.

¹⁰ அந்நாட்களில் சிலவற்றைக் கடவுள் உயர்த்தி மகிமைப்படுத்தினார்@ சிலவற்றைச் சாதாரண நாட்களின் கணக்கில் வைத்தார். ஆதாம் உண்டாக்கப்பட்ட சேற்றிலும் மண்ணிலுமிருந்து, உண்டான மனிதர் யாவரும் அவ்வண்ணமே.

¹¹ பலவித ஒழுங்குகளால் ஆண்டவர் அவர்களைப் பிரித்தார்@ அவர்கள் வழிகளை மாற்றினார்.

¹² அவர் சிலரை ஆசீர்வதித்து உயர்த்தினார்@ சிலரைப் புனிதமாக்கித் தம்முடன் சேர்த்துக் கொண்டார்@ சிலரைச் சபித்துத் தாழ்த்தி, அவர்களே பிரிந்து போன பிறகு அவர்களை விட்டு விட்டார்.

¹³ குயவன் கையில் களிமண் மிருதுவாகி உருவாகிறது போல,

¹⁴ மனிதன் வழிகளெல்லாம் கடவுள் விருப்பப்படியே அமைகின்றன. ஏனெனில் மனிதனை உண்டாக்கித் தமது தீர்மானத்தின்படியே நடத்துகிறவருடைய கையில் அவன் இருக்கிறான்.

¹⁵ தீமைக்கு எதிரானது நன்மை@ சாவுக்கு எதிரானது வாழ்வு. அது போலவே, நீதிமானுக்கு எதிராகப் பாவி இருக்கிறான். இவ்வண்ணமே உன்னதமானவரின் எல்லாச் செயல்களிலும் இரண்டு இரண்டாகவும், அவை ஒன்றுக்கொன்று எதிரானவையுமாய் இருக்கக் காண்பாய்.

¹⁶ நானும் கடைசியாக விழித்தேன்@ அறுத்தவர்கள் பின்னால் தப்பிய கொடி முந்திரிப் பழங்களைச் சேகரிக்கிறவன் போல் ஆனேன்.

¹⁷ ஆண்டவர் அருளை நான் நம்பினேன்@ அறுக்கிறவன் போலத் தொட்டியை நிரப்பினேன்.

¹⁸ எனக்காக மட்டுமல்ல- ஆனால், நன்னெறியைத் தேடும் எல்லாருக்காகவும் உழைத்தேனென்று கண்டு கொள்ளுங்கள்.

¹⁹ பெரியோரே, அனைத்து மக்களே, நான் சொல்வதைக் கேளுங்கள். சபையின் தலைவர்களே, எனக்குச் செவிகொடுங்கள்.

²⁰ புதல்வனுக்கும் மனைவிக்கும் சகோதரனுக்கும் நண்பனுக்கும் உன் வாழ்நாளில் உன் மேல் அதிகாரம் கொடாதே. பிறகு நீ மன வருத்தப்படாதபடிக்கும், உனக்குத் தேவையானவைகளைக் கெஞ்சாதபடிக்கும் உன் செல்வத்தை மற்றொருவனுக்குக் கொடுத்து விடாதே.

²¹ நீ உயிரோடிருந்து ஆவியை விடும் வரையிலும் எவனும் உன்னை மாற்றாதிருக்கட்டும்.

²² உன் மக்களுடைய கைகளை எதிர்பார்ப்பதை விட உன் மக்கள் உன்னைக் கேட்பது நலம்.

²³ உன் எல்லாச் செயல்களிலும் முதன்மையாய் இரு.

²⁴ உன் மகிமைக்குப் பழுது வருவிக்காதே. உன் வாழ்க்கையின் முடிவு நாளில், நீ சாகிற நேரத்தில் உன் செல்வத்தைப் பங்கு பிரித்து விடு.

²⁵ வைக்கோலும் அடியும் சுமையும் கழுதைக்கு@ உணவும் கண்டிப்பும் வேலையும் அடிமைக்கு.

²⁶ அவன் கண்டிப்பில் வேலை செய்கிறான்@ ஓய்வு தேடுகிறான். அவனைக் கைசோரவிடு@ அப்பொழுது தன் விருப்பத்தைத் தேடுவான்.

²⁷ நுகத்தடியும் வடமும் முரட்டுக் கழுத்தை வளைக்கின்றன. ஓயாத வேலைகள் அடிமையை அடக்குகின்றன.

²⁸ கெட்ட மனமுள்ள அடிமைக்கு வேதனையும் விலங்குகளும். சோம்பேறியாய் இராதபடி அவனுக்கு வேலை ஏவு.

²⁹ சோம்பல் மிகுந்த கெடுதிக்குக் காரணமாயிற்று.

³⁰ வேலைகளில் அவனை நிறுத்து@ அதுதான் அவனுக்குத் தகுதி. கேளாவிட்டால், விலங்குகளினால் அவனை வளைத்துப்போடு. ஆனால், எவன் மீதும் மிதமிஞ்சி நடவாதே. உண்மையாகவே முக்கியமான யாதொன்றையும் யோசனையில்லாமல் செய்யாதே.

³¹ உன் அடிமை உனக்குப் பிரமாணிக்கமுள்ளவனானால், அவன் உன் ஆன்மாவைப் போல் உனக்கு இருக்கக் கடவான்@ சகோதரனைப் போல் அவனை நடத்து. ஏனென்றால், உன் ஆன்ம இரத்தத்தினால் அவனைக் கண்டடைந்தாய்.

³² அவனை நீ அநியாயமாய் நோகச் செய்தால் ஓடி விடுவான்.

³³ ஆத்திரப்பட்டு ஓடிப்போவானேயாகில், நீ தேடுகிறவனை எவ்விடத்தில் தேடுகிறதென்று நீ அறியாய்.