சீராக் ஆகமம் - பழைய ஏற்பாடு

¹ மகனே, பாவம் செய்தாயோ, திரும்பவும் செய்யாதே. ஆனால், செய்தவைகள் உனக்கு மன்னிக்கப்படும்படி மன்றாடு.

² பாம்பை விட்டு விலகுவது போலப் பாவத்தை விட்டு விலகு. அவைகளின் அண்மையில் போனாயானால், அவைகள் உன்னைத் தம் வயப்படுத்தும்.

³ சிங்கத்தின் பற்களைப் போல் அவற்றின் பற்கள் மனிதருடைய ஆன்மாவைக் கொலைப்படுத்தும்.

⁴ எல்லா அக்கிரமங்களும் இரு புறமும் கூர்மையான கத்தி போல் இருக்கின்றன. அதன் காயங்கள் ஆறமாட்டா.

⁵ நிந்தனையும் அநியாயங்களும் செல்வத்தை அழிக்கின்றன. திரண்ட செல்வமுள்ள குடும்பம் அகந்தையால் கெடும். இவ்வண்ணமே அகந்தையுள்ளவனுடைய சொத்து அழிந்து போகும்.

⁶ வறியவனது வேண்டுதல் அவன் வாயினின்று கடவுளுடைய செவிகள் வரையிலும் சேரும்@ அவனுக்கு நியாயம் விரைவில் கிடைக்கும்.

⁷ கண்டனத்தைப் பகைக்கிறவன் பாவியினுடைய காலடியைப் பின்பற்றுகிறான். கடவுளுக்குப் பயந்து நடக்கிறவன் மனந்திரும்புகிறான்.

⁸ துணிவுள்ளவனுடைய வலுத்த நாவு தூரத்தினின்றே அறியப்படுகின்றது. அறிவாளி அதினின்று தப்பிக் கொள்ளும் வழி அறிவான்.

⁹ பிறருடைய செலவில் தன் வீட்டைக் கட்டுகிறவன் மாரிகாலத்தில் தன் கற்களை அடுக்குகிறவன் போல் இருக்கிறான்.

¹⁰ பாவிகளுடைய கூட்டம் சேர்த்து வைக்கப்பட்ட சிம்புகளைப் போலவும், அவர்களுடைய முடிவோ மூட்டப்பட்ட நெருப்பைப் போலவும் இருக்கின்றன.

¹¹ பாவிகளின் வழி கற்கள் பரப்பப்பட்ட தரையாய் இருக்கின்றது. ஆனால் அவர்களுக்கு முடிவில் நரகம், இருள் ஆகிய தண்டனைகளே இருக்கின்றன.

¹² நீதியைக் காப்பாற்றுகிறவன் அதன் நெறியைக் கடைப்பிடிப்பான்.

¹³ ஞானமும் அறிவும் தெய்வ பயத்தின் பலன்.

¹⁴ நன்மையான காரியங்களில் ஞானியாய் இராதவன் உயர்ந்தவனாக மாட்டான்.

¹⁵ தீமையிலும் ஒருவித ஞானம் மிகுந்திருக்கிறது. மனக்கசப்பு உள்ள இடத்தில் புரிந்து கொள்ளும் தன்மை இராது.

¹⁶ ஞானியினுடைய கலை வெள்ளத்தைப் போல மிகுந்திருக்கும். அவனுடைய யோசனை வாழ்வின் ஊற்றைப் போல நிலைத்திருக்கும்.

¹⁷ மூடனுடைய இதயம் உடைந்த பாத்திரத்தைப் போல் இருக்கின்றது. அவன் ஞானத்தை முழுவதும் அடக்கி வைத்திரான்.

¹⁸ அறிவுள்ளவன் எந்த ஞானமான வார்த்தையைக் கேட்கிறானோ அதைப் புகழ்ந்து, அதைத் தன்னிடம் சேர்த்துக் கொள்வான். தீநெறியாளன் அதைக் கேட்டால், அது அவனுக்கு விருப்பப்படாது. அவன் அதைத் தனக்குப் பின்னால் எறிந்து விடுவான்.

¹⁹ மூடனுடைய உரையாடல் வழியில் பாரமூட்டையைப் போல இருக்கின்றது. ஆனால், அறிவாளியின் பேச்சு விரும்பப்படுகின்றது.

²⁰ விவேகியினுடைய வார்த்தை சபையில் தேடப்படுகின்றது. அவனுடைய வார்த்தைகளை அவர்கள் தங்கள் இதயங்களில் நினைப்பார்கள்.

²¹ ஞானம் மூடனுக்கு இடிந்து போன வீட்டைப் போல் இருக்கின்றது. அறிவிலியினுடைய கலை விபரீத வார்த்தைகளில் அடங்கியிருக்கின்றது.

²² கால்களில் தடைகளும், வலக் கையில் விலங்குகளும் போல மூடனுக்கு நற்போதனை இருக்கின்றது.

²³ மூடன் சிரிக்கையில் உரத்த சத்தம் செய்கிறான். விவேகியோ ஓசைபடாமல் அரிதாய்ச் சிரிக்கிறான்.

²⁴ நன்னெறி விவேகிக்குப் பொன் அணி போலவும், வலக்கையின் காப்புப் போலவும் இருக்கின்றது.

²⁵ மூடனுடைய கால் அயலானுடைய மனையில் எளிதில் புகுகின்றது. ஆனால், பட்டறிவு உடைய மனிதன் பலவானைச் சந்திப்பதற்கு நாணம் கொள்கிறான்.

²⁶ மூடன் சன்னல் வழியாக வீட்டிற்குள் எட்டிப் பார்ப்பான். அறிவுள்ளவனோ வெளியில் நிற்பான்.

²⁷ கதவண்டை ஒற்றுக் கேட்பது மனிதனுடைய மூடத்தனம். விவேகியோ அதை மதிப்புக் குறைவென்று எண்ணுவான்.

²⁸ விவேகமற்றவர்களுடைய உதடுகள் மூடத்தனமான காரியங்களைச் சொல்கின்றன. விவேகிகளுடைய வார்த்தைகளோ தராசில் நிறுக்கப்படுகின்றன.

²⁹ மூடர்களுடைய இதயம் அவர்களுடைய வாயில் இருக்கின்றது. ஞானிகளுக்கோ அவர்களுடைய வாய் இதயத்தில் இருக்கின்றது.

³⁰ பாவி பேயைச் சபிக்கும் போது தன் ஆன்மாவையே சபித்துக் கொள்கிறான்.

³¹ அவதூறு சொல்கிறவன் தன் ஆன்மாவை அசுத்தப்படுத்துகிறான். அவன் அனைவராலும் பகைக்கப்படுவான்@ அவனுடன் தங்குகிறவனும் பகைக்கு உகந்தவனாவான். ஆனால் மௌனமாய் இருப்பவனும் அறிவாளி என்று மதிக்கப்படுவான்.