1 மக்கபே ஆகமம் - பழைய ஏற்பாடு

¹ அப்பொழுது நிக்கானோரும் அவன் படைகளும் தோல்வியுற்றதைத் தெமெத்தரியுஸ் கேள்விப்பட்டு, பாக்கீதையும் ஆல்சிமுசையும் தன் வலப்படைப் பிரிவோடு திரும்பவும் யூதேயா நாட்டுக்கு அனுப்பினான்.

² அவர்கள் கல்கலா வழியாய்ச் சென்று, அர்பெல்லாவில் இருக்கும் மசாலோத்தில் பாளையம் இறங்கினர்@ அந்நகரத்தைப் பிடித்துப் பலரைக் கொலைசெய்தனர்.

³ அவர்கள் நூற்றைம்பத்திரண்டாம் ஆண்டு முதல் மாதத்தில் யெருசலேம் மீது படையெடுத்தார்கள்.

⁴ இருபதினாயிரம் காலாட்படைகளும் இரண்டாயிரம் குதிரை வீரரும் பேரேயாவில் இறங்கினார்கள்.

⁵ லியிசாவில் யூதாஸ் பாளையம் இறங்கினார். தேர்ந்தெடுக்கப்பட்ட வீரர்கள் அவரோடு இருந்தார்கள்.

⁶ அவர்கள் பகைவரின் படைத்திரளைக் கண்டு மிகவும் பயந்தார்கள்@ பலர் பாளையத்தினின்று ஓடி விட்டார்கள்@ எண்ணுறு பேர் மட்டும் நிலைத்திருந்தார்கள்.

⁷ தம் படை குறைந்துபோவதை யூதாஸ் கண்டு, சண்டை நெருங்கியிருப்பதையும் உணர்ந்து, அவர்களை ஒன்று சேர்ப்பதற்கு நேரமில்லாததால் மனம் தத்தளித்துத் திடனற்றுப்போனார்.

⁸ அவர் தம்முடன் நிலைத்திருந்தவர்களை நோக்கி: நம்மால் எதிர்த்துச் சண்டை செய்யக்கூடுமானால் பகைவருடன் போர்தொடுப்போம் என்றார்.

⁹ அவர்களோ அவரைத் தடுத்து: நம்மில் வெகு சிலரே எஞ்சியிருப்பதால் நம்மால் முடியாது@ ஆனால், இப்போது உயிருடன் நம் சகோதரரிடம் திரும்புவோம்@ பிறகு, பகைவர்களை எதிர்ப்போம் என்றார்கள்.

¹⁰ அதற்கு யூதாஸ்: அவர்களுக்குப் புறமுதுகு காட்டி ஓடுவதென்பது நமக்கு அழகன்று@ நமது காலம் வந்து விட்டதேயானால், நம் சகோதரருக்காகத் துணிவுடன் சாவோம்@ நமது புகழுக்கு இழுக்கு நேராவண்ணம் செய்வோம் என்றார்.

¹¹ எதிர்ப்படையினர் பாளையத்தை விட்டுப் புறப்பட்டு அவர்களுக்கு எதிரில் வந்தனர். குதிரை வீரர் இரு பிரிவுகளாகப் பிரிந்தனர். கவணெறிவோரும் அம் பெய்கிறவர்களும் படைக்குமுன் சென்றார்கள். படையின் முன் வரிசையில் இருந்தவர்கள் மாவீரர்.

¹² பாக்கீது வலப்பக்கத்தில் இருந்தான். படை இரு பிரிவுகளாய்ச் சென்றது. அவர்கள் எக்காளம் ஊதினார்கள்.

¹³ யூதாஸ் பக்கம் இருந்தவர்களும் எக்காளம் ஊதினார்கள். படை ஓசையால் பூமி அதிர்ந்தது. காலை முதல் மாலை வரை போர் நடந்தது.

¹⁴ பாக்கீதின் படை வலப்பக்கத்தில் வலிமை மிக்கதாயிருக்கிறதென்று யூதாஸ் கண்டு, தம் வீரரோடு அதைத் தாக்கினார்.

¹⁵ வலப்பக்கத்துப் படை சிதறுண்டு போகவே, அதை அசோத்துஸ் மலை வரை பின்தொடர்ந்து போனார்.

¹⁶ வலப்பக்கத்துப் படை முறியடிக்கப்பட்டதைக் கண்ட இடப்பக்கத்துப் படை யூதாசையும் அவருடன் இருந்தவர்களையும் பின்தொடர்ந்து சென்றது.

¹⁷ சண்டை வலுப்பெறவே, இரு தரப்பிலும் பலர் காயப்பட்டு மாண்டனர்.

¹⁸ யூதாசும் மாண்டார்@ மற்றவர்களோ ஓடி விட்டார்கள்.

¹⁹ யோனத்தாசும் சீமோனும் தங்கள் சகோதரர் யூதாசைத் தூக்கிக் கொண்டு போய் மோதின் நகரத்தில் தங்கள் முன்னோர் கல்லறையில் அடக்கம் செய்தார்கள்.

²⁰ இஸ்ராயேல் மக்களெல்லாரும் அவரைப் பற்றி வெகு துக்கம் கொண்டாடி, பலநாள் அழுது புலம்பினார்கள்:

²¹ இஸ்ராயேல் மக்களைக் காப்பாற்றி வந்த அந்த மாவீரர் எப்படி மாண்டார் என்றார்கள்.

²² யூதாஸ் புரிந்த பிற போர்களைப்பற்றியும், அவர் வலிமை, புகழ் பற்றியும் இவ்விடத்தில் எழுதப்படவில்லை. ஏனென்றால், அது அதிகமாய் விரிந்துபோகும்.

²³ யூதாஸ் இறந்த பின் தீயவர் இஸ்ராயேலின் எல்லைகளெங்கும் நடமாடினார்கள்.

²⁴ தீயவர்கள் நாலா பக்கத்திலும் தலைகாட்டினார்கள். அக்காலத்தில் பெரியதொரு பஞ்சம் உண்டாகவே, நாட்டு மக்கள் அனைவரும் பாக்கீதுக்குத் தங்களைத் தாமே கையளித்தார்கள்.

²⁵ பாக்கீது தீயவரைத் தேர்ந்துகொண்டு, அவர்களை நாட்டுக்குத் தலைவர்களாக நியமித்தான்.

²⁶ அவர்கள் யூதாசின் நண்பரைத் தேடிப்பிடித்துப் பாக்கீதிடம் கூட்டி வந்தார்கள். அவன் அவர்கள் மீது பழி சுமத்தி அவர்களை இகழ்ந்தான்.

²⁷ இஸ்ராயேலில் இறைவாக்கினர் ஒருவரும் காணப்படாமையால், அதுவரை நேர்ந்திராப் பெரும் கலக்கம் அவர்களுக்கு அப்போது உண்டானது.

²⁸ யூதாசின் நண்பரெல்லாரும் கூடி யோனத்தாசை நோக்கி:

²⁹ உன் சகோதரர் இறந்த நாள் முதல் நம் பகைவர் மீதும் பாக்கீதின் மீதும், நம் இனத்தைப் பகைக்கிறவர்கள் மீதும், எதிர்த்துப் போராட அவரை ஒத்தவன் ஒருவனும் இல்லை.

³⁰ ஆதலால், இன்று உன்னையே எங்கள் தலைவராகவும் படைத்தளபதியாகவும் தேர்ந்துகொண்டோம் என்று கூறினார்கள்.

³¹ அப்பொழுது யோனத்தாசும் தம் சகோதரர் யூதாசுக்குப் பதிலாய்த் தலைமை ஏற்றார்.

³² இதை அறிந்த பாக்கீது அவரைக் கொல்லத் தேடினான்.

³³ யோனத்தாசும் அவர் சகோதரன் சீமோனும் அவரோடு இருந்தவர்களும் இதைக் கேள்வியுற்று, தேக்குவா எனும் பாலைவனத்திற்கு ஓடிப்போய், ஆஸ்பார் ஏரிக்கரையின் ஓரமாய்த் தங்கினார்கள்.

³⁴ இதை அறிந்த பாக்கீது தன் படைகளோடு யோர்தானைக் கடந்து, ஓய்வுநாளில் வந்து சேர்ந்தான்.

³⁵ யோனத்தாஸ் மக்கட்தலைவனாகத் தம் சனோதரனை அனுப்பி, தம் நண்பராகிய நபுதேயரிடமிருந்த திரளான ஆயுதச் சேமிப்புகளைத் தமக்கு இரவலாகக் கொடுக்கும்படி கேட்டார்.

³⁶ யாம்ரியின் மக்கள் மதாபாவினின்று புறப்பட்டு அருளப்பனைப் பிடித்து, அவனிடம் இருந்தவற்றை எல்லாம் எடுத்துக் கொண்டார்கள்.

³⁷ அதன் பிறகு யாம்ரியின் மக்கள் சிறப்பான திருமணங்கள் செய்கிறார்களென்றும், மிகச் சிறப்பாய் கானான் நாட்டுப் பெரிய பிரபுக்களுள் ஒருவரின் மகளைப் பெண் கொள்கிறார்களென்றும் யோனத்தாசுக்கும் அவர் சகோதரன் சீமோனுக்கும் தெரிய வந்தன.

³⁸ அவர்கள் தங்கள் சகோதரன் அருளப்பன் கொலையுண்டதை நினைத்து, மலையில் மறைவாய் ஒளிந்து கொண்டிருந்தனர்.

³⁹ தங்கள் கண்களை ஏறெடுத்துப் பார்த்தனர். வெகு ஆடம்பர ஆரவாரம் தெரிந்தது. மணவாளனும், அவன் நண்பர், சகோதரரும் மேள வாத்தியங்களோடும் ஆயுதம் தாங்கியவர்களோடும் தங்கள் எதிரில் வரக் கண்டார்கள்.

⁴⁰ தாங்கள் பதுங்கியிருந்த இடத்தினின்று எழுந்து அவர்களைக் கொன்று பலரைக் காயப்படுத்தவே, மற்றவர்கள் மலைகளுக்கு ஓடிப் போனார்கள். அவர்கள் பொருட்களையும் கொள்ளையடித்தார்கள்

⁴¹ திருமணக் கொண்டாட்டம் துக்கமாக மாறினது. மேள வாத்தியங்களும் அழுகைக் குரலாய் மாறின.

⁴² தங்கள் சகோதரனுடைய இரத்தத்துக்காக அவர்கள் பழிவாங்கினார்கள், பின்னர் யோர்தான் நதிக் கரைக்குத் திரும்பினார்கள்.

⁴³ இதைக் கேள்விப்பட்ட பாக்கீதும் பெரும்படையோடு யோர்தான் கரைக்கு ஓய்வு நாளில் வந்து சேர்ந்தான்.

⁴⁴ யோனத்தாஸ் தம்முடன் இருந்தவர்களை நோக்கி: எழுந்து நம்முடைய பகைவேராடு சண்டை செய்வோம். ஏனென்றால், இன்று நேற்றைப் போலவும் அல்ல, அதற்கு முந்தின நாளைப் போலவும் அல்ல.

⁴⁵ முன்னால் பகைவர்களும், பின்னால் யோர்தான் நதியும், அங்குமிங்கும் சதுப்பு நிலங்களும் காடுகளும் இருக்கின்றன. நாம் தப்பிப்போக இடமில்லை.

⁴⁶ நம்முடைய பகைவர் கைகளினின்று நம்மைக் காப்பாற்ற விண்ணை நோக்கிக் கூக்குரல் எழுப்புங்கள் என்று சொல்லிப் போர்தொடுத்தார்.

⁴⁷ பாக்கீதைத் தாக்க யோனத்தாஸ் கையை நீட்டினார்.

⁴⁸ அவனோ பின்னடைந்தான். யோனத்தாசும் அவரோடு இருந்தவர்களும் யோர்தான் நதியில் குதித்து, அதை நீந்திக் கடந்தார்கள்.

⁴⁹ அன்று பாக்கீது படையில் ஆயிரம் பேர் மாண்டார்கள்@ எஞ்சியவர் யெருசலேம் திரும்பினர்.

⁵⁰ அவர்கள் யூதேயாவில் வலிமை மிக்க கோட்டைகளைக் கட்டினார்கள். யெரிக்கோ, அம்மாவும், பெத்தோரோன், பேத்தேல், தாம் நாத்தா, பாரா, தோப்போ முதலிய நகரங்களில் இருந்த கோட்டைகளையும் மதில்களினாலும் கதவுகளினாலும் பூட்டுகளினாலும் வலுப்படுத்தினார்கள்.

⁵¹ பாக்கீது இஸ்ராயேலரைத் துன்பப்படுத்த அந்தக் கோட்டைகளில் காவலரையும் வைத்தான்.

⁵² பெத்சூராவிலும் காசாராவிலும் கோட்டையையும் வலுப்படுத்தி, காவலரையும் நியமித்து, அவர்களுடைய உணவுக்கும் ஏற்பாடு செய்தான்.

⁵³ அந்நகரங்களிலுள்ள பிரபுக்களின் மக்களைப் பிணையாளிகளாகக் கொண்டு, அவர்களை யெருசலேம் கோட்டைக்குள் காவலில் வைத்தான்.

⁵⁴ நூற்றைம்பத்து மூன்றாம் ஆண்டு இரண்டாம் மாதம் ஆல்சிமுஸ் என்பவன் கடவுள் ஆலயத்தின் உட்சுவர்களை இடிக்கவும், இறைவாக்கினார்கள் செய்தவற்றை அழிக்கவும் கட்டளையிட்டான்@ அழிக்கவும் ஆரம்பித்தான்.

⁵⁵ அப்பொழுது ஆல்சிமுஸ் கடவுளால் தண்டிக்கப்பட்டான். அவன் துவக்கின அலுவல்கள் நின்று போயின. அவன் வாய் அடைபட்டது. பாரிசவாயுவினால் பீடிக்கப்பட்டு, ஒன்றும் பேசமுடியாமலும், தன் குடும்ப காரியங்களை ஒழுங்குபடுத்த முடியாமலும் இருந்தான்.

⁵⁶ இவ்வாறு மிகவும் துன்பப்பட்டு ஆல்சிமுஸ் இறந்தான்.

⁵⁷ ஆல்சிமுஸ் இறந்ததைக் கண்டு பாக்கீது அரசனிடம் திரும்பினான். நாடு இரண்டாண்டுக் காலம் அமைதியாய் இருந்தது.

⁵⁸ தீயவர் தங்களுக்குள்: யோனத்தாசும் அவனோடு இருக்கிறவர்களும் நம்பிக்கையுடன் அமைதியோடு வாழ்கிறார்கள். இப்போது நாம் பாக்கீதை அழைத்து வருவோமேயானால், ஒரே இரவில் அவன் அவர்கள் எல்லாரையும் பிடித்துக் கொள்வான் என்று எண்ணி,

⁵⁹ அவனிடம் சென்று அவனுக்கு ஆலோசனை கொடுத்தார்கள்.

⁶⁰ அவன் பெரும் படையோடு வரத் தலைப்பட்டான். யோனத்தாசையும் அவரோடு இருந்தவர்களையும் பிடிக்கும்படி இரகசியமாகத் தன் தோழர்களுக்குக் கடிதம் அனுப்பினான். அவர்களுடைய திட்டம் வெளியாகி விட்டதால், அவர்களால் ஒன்றும் செய்யக் கூடவில்லை.

⁶¹ யோனத்தாஸ் அத்தீய எண்ணத்திற்குக் காரணமாய் இருந்த அந்நாட்டு மனிதரில் ஐம்பது பேரைப் பிடித்துக் கொலைசெய்தார்.

⁶² யோனத்தாசும் சீமோனும் அவர்களோடு இருந்தவர்களும் பாலைவனத்தில் இருந்த பெத்பேசன் எனும் இடம் சேர்ந்து, இடிக்கப்பட்டவைகளைக் கட்டி வலுப்படுத்தினார்கள்.

⁶³ பாக்கீது இதை அறிந்து, படை முழுவதையும் கூட்டி, யூதேயோவில் இருந்தவர்களுக்குத் தெரிவித்தான்.

⁶⁴ பெத்பேசனுக்கு மேல்புறம் பாளையம் இறங்கி, பலநாள் முற்றுகை போட்டிருந்தான்@

⁶⁵ யோனத்தாஸ் தன் சகோதரன் சீமோனை நகரில் விட்டுவிட்டு, நாட்டுக்குள் சென்று பெரும்படையோடு வந்தார்.

⁶⁶ ஓதாரன் என்பவனையும், அவன் சகோதரனையும், பாசெரோன் மக்களையும் அவர்கள் கூடாரங்களில் தாக்கி, அவர்களை அழிக்கத் தொடங்கினார்.

⁶⁷ வீரத்திலும் அதிகரித்தார். சீமோனும் அவனோடு இருந்தவர்களும் நகரை விட்டுப் புறப்பட்டுப் பகைவரின் போர்க்கருவிகளைக் கொளுத்திவிட்டார்கள்.

⁶⁸ பாக்கீதை எதிர்த்துச் சண்டை செய்து, அவனைத் தோற்கடித்தார்கள். அவன் எண்ணங்களையும் திட்டங்களையும் அழித்து, அவனை மிகுந்த துன்பத்துக்கு உட்படுத்தினார்கள்.

⁶⁹ அந்நாட்டிற்கு வரும்படி தனக்கு ஆலோசனை கூறியிருந்த தீயவர் மேல் கோபம் கொண்டு, அவர்களில் பலரைப் பாக்கீது கொன்றான்@ தானும் மற்றவர்களோடு தன் நாட்டிற்குத் திரும்பிப்போகவும் நினைத்தான்.

⁷⁰ அதை அறிந்த யோனத்தாஸ் அவனுடன் சமாதானம் செய்வதற்கும், சிறையில் அடைபட்டவர்களை விடுவிப்பதற்கும் தூதர்களை அனுப்பினார்.

⁷¹ பாக்கீது நன்மனத்தோடு ஏற்றுக்கொண்டு, அவர் கேட்டதற்கு இசைந்து தன் வாழ்நாள் முழுவதும் அவருக்குத் தீமையே செய்வதில்லையென்று ஆணையிட்டுக் கூறினான்.

⁷² முன்பு தான் யூதேயா நாட்டில் சிறைப்படுத்தினவர்களை விடுவித்தான்@ தன் நாடு திரும்பிப்போய், இனி மேல் வருவதில்லையென்று தீர்மானம் செய்து கொண்டான்.

⁷³ இஸ்ராயேலில் போர் ஒழிந்தது, யோனத்தாஸ் மக்மாசில் வாழ்ந்திருந்து மக்களுக்கு நீதி செலுத்தி வந்தார்@ இஸ்ராயேலில் தீயவரை அழித்தொழித்தார்.