1 மக்கபே ஆகமம் - பழைய ஏற்பாடு

¹ உரோமையர் மிக்க வலிமை வாய்ந்தவர்களென்றும், கேட்பதற்கெல்லாம் அவர்கள் சம்மதிக்கிறார்களென்றும் யூதாஸ் கேள்விப் பட்டார். அவர்கள் மிக்க வீரம் உள்ளவர்களாதலால், அவர்களை அண்டிப் போனவர்கள் எல்லாரும், அவர்களோடு நட்பு கொண்டார்கள்.

² அவர்கள் கலாசியாவைக் கைப்பற்றி அதைத் தங்களுக்குத் திறைகட்டும்படி செய்ததையும், அதற்காக அவர்கள் செய்த போர்களையும், அதற்கு அவர்கள் செய்த நன்மைகளையும் அவர் கேள்விப்பட்டார்.

³ அவர்கள் இஸ்பானியாவில் எவ்வளவு செய்தார்களென்றும், அந்நாட்டிலிருந்த பொன், வெள்ளிச் சுரங்கங்களை எவ்விதம் தங்கள் வயப்படுத்தினார்களென்றும், தங்கள் புத்திக் கூர்மையினாலும் பொறுமையினாலும் எல்லா இடங்களையும் கைப்பற்றினார்களென்றும்,

⁴ தங்களுக்கு அதிகத் தொலைவிலிருந்த நாடுகளைப் பிடித்து, பூமியின் எல்லைகளினின்று அந்நாடுகளைக் கீழ்ப்படுத்தவந்த அரசர்களை வென்று பெரிதும் சேதப்படுத்தினார்களென்றும், மற்ற அரசர்கள் ஆண்டு தோறும் அவர்களுக்குத் திறை செலுத்தி வருகிறார்களென்றும்,

⁵ தங்களுக்கு எதிராய்ப் படையெடுத்து வந்த பிலிப்புவையும், சேத்தையர் அரசனான பெர்சனையும், தங்களுக்கு எதிராய் ஆயுதம் தாங்கி வந்த மற்றவர்களையும் முறியடித்துக் கீழ்ப்படுத்தினார்களென்றும்,

⁶ ஆசியாவின் அரசனான பெரிய அந்தியோக்கஸ் நூற்றிருபது யானைகளோடும் குதிரை வீரரோடும் தேர்களோடும் பெரும்படையோடும் அவர்களை எதிர்த்து வந்த போது தோற்கடிக்கப்பட்டானென்றும்,

⁷ அவனை உயிரோடு பிடித்து, அவனும், அவனுக்குப் பிறகு அரசாள்பவர்களும் தங்களுக்குத் திறை செலுத்தும்படியாகவும், பிணைகள் கொடுக்கும்படியாகவும் ஏற்பாடு செய்தார்களென்றும்,

⁸ அவர்கள் நாடுகளில் மிகவும் செழிப்பான இந்தியா, மேதியா, லிதோஸ் நாடுகளை அவர்களிடமிருந்து கைப்பற்றி எயுமேன் அரசனுக்குக் கொடுத்தார்களென்றும்,

⁹ கிரேசியா நாட்டார் அவர்களை கீழ்ப்படுத்த எண்ணியிருந்த போது அவர்கள் அதை அறிந்து,

¹⁰ படைத்தலைவன் ஒருவனை அவர்களுக்கு எதிராய் அனுப்பி, அவர்களோடு போர் செய்து அவர்களில் பலரைக் கொன்று, அவர்கள் மனைவி மக்களைச் சிறைப் படுத்தி, பொருட்களையும் பறித்து, நாட்டையும் கைப்பற்றி, சுவர்களைத் தகர்த்துடைத்து, அவர்களை அந்நாள் வரை அடிமைத்தனத்தில் அடக்கி வைத்தார்களென்றும்,

¹¹ தங்களை எதிர்த்து வந்த மற்ற நாடுகளையும் தீவுகளையும் அழித்துத் தங்கள் ஆளுகைக்கு உட்படுத்தினார்களென்றும்,

¹² ஆனால், தங்களோடு சமாதானமாயிருந்த தங்கள் நண்பரோடு நட்பைக் காப்பாற்றினார்களென்றும், அண்மையிலும் தொலைவிலுமிருந்த நாடுகளைத் தங்கள் கைவசப்படுத்தினார்களென்றும், அவர்கள் பெயரைக் கேட்ட யாவரும் அவர்களுக்கு அஞ்சினார்களென்றும்,

¹³ யார் யார் அரசாள வேண்டுமென்று மனம் வைத்து உதவி செய்தார்களோ அவர்களை அரசாளச் செய்தும், யார் யாரை நீக்க வேண்டுமென்று எண்ணினார்களோ அவர்களை நீக்கியும் வந்தார்களென்றும், மிகவும் வலிமை வாய்ந்தவர்களென்றும்,

¹⁴ இத்தகைய புகழிலும் அவர்களுக்குள் மற்றவர்களை விடப் பெரியவன் என்று காண்பிக்க முடிதரித்தவனும் அரசவுடை அணிந்தவனும் யாரும் இல்லையென்றும்,

¹⁵ தங்கள் தகைமைக்கு ஏற்ற காரியங்களை ஆய்ந்து நடத்த ஒரு சங்கம் ஏற்பாடு செய்து, சங்கத்தாராகிய முந்நூற்றிருபது பேருடைய கருத்துகளை நாள்தோறும் கேட்டார்களென்றும்,

¹⁶ தங்கள் நாடெங்கும் ஆட்சி செய்ய ஆண்டுதோறும் ஒரே மனிதனுக்கு அதிகாரமனைத்தும் கொடுத்தார்களென்றும், தங்களுக்குள் பொறாமையில்லாமலும் கறுவில்லாமலும் ஒருவனுக்கே கீழ்ப்படிந்து வந்தார்களென்றும் கேள்விப்பட்டார்.

¹⁷ ஆதலால், யூதாஸ், யாக்கோபு மகன் அருளப்பனின் புதல்வன் எயுபோலமுசையும், எலேயாசார் புதல்வன் யாசோனையும் தேர்ந்தெடுத்து, உரோமையரோடு சமாதானமும் நட்பும் செய்து கொள்வதற்காகவும்,

¹⁸ இஸ்ராயேல் நாட்டை அடிமைப்படுத்திய கிரேக்கருடைய கொடுமையினின்று தங்களை விடுவிக்கக் கேட்கும்படியாகவும் உரோமைக்கு அவர்களை அனுப்பினார்.

¹⁹ அவர்கள் வெகுதூரம் கடந்து உரோமைக்குச் சென்று, சங்கத்தில் நுழைந்து:

²⁰ யூதாஸ் மக்கபேயுசும் அவர் சகோதரரும் யூத மக்களும் உங்களோடு நட்பும் சமாதானமும் செய்து கொள்வதற்கும், எங்களை உங்கள் கூட்டாளிகளாகவும் நண்பர்களாகவும் நீங்கள் ஏற்றுக்கொள்ளும் படியாகவும் எங்களை அனுப்பினார்கள் என்றார்கள்.

²¹ அவர்கள் சொல்லியது அனைவருக்கும் பிடித்திருந்தது.

²² சமாதானத்தினுடையவும் உடன்படிக்கையினுடையவும் நினைவாக அவர்கள் எழுதி, திரும்பவும் அவற்றைச் செப்புத் தகடுகளில் எழுதி யெருசலேமுக்கு அனுப்பினார்கள்.

²³ அதாவது: என்றென்றும் கடலிலும் தரையிலும் உரோமையருக்கும் யூத இனத்தாருக்கும் நன்மை உண்டாவதாக, வாளும், பகைவரும் அவர்களை விட்டு விலகி இருக்கட்டும்.

²⁴ உரோமையருக்கு எதிராக, அல்லது அவர்கள் நாடுகளில் அவர்களைச் சேர்ந்தவர்களுக்கு எதிராகப் பகைவர் சண்டை செய்தால்,

²⁵ யூத இனத்தார் காலத்துக்குத் தகுந்தபடி முழுமனத்தோடு அவர்களுக்கு உதவி செய்ய வேண்டும்.

²⁶ உரோமையருடைய ஏற்பாட்டின்படி, சண்டை செய்கிறவர்களுக்குத் தானியமோ படைக்கருவிகளோ பணமோ கப்பல்களோ கொடுத்தல் கூடாது. ஆனால், அவர்களிடத்தில் ஒன்றும் வாங்காமலே அவர்களுக்கு உதவவேண்டும்.

²⁷ இவ்விதமே யூத இனத்தாருக்கு எதிராகச் சண்டை நடக்குமாயின், காலத்துக்குத் தகுந்தபடி உரோமையர் அவர்களுக்கு உதவி செய்ய வேண்டும்.

²⁸ உரோமையர் ஏற்பாட்டின்படி, சண்டை செய்கிறவர்களுக்குத் தானியமோ படைக்கருவிகளோ பணமோ கப்பல்களோ கொடுத்தல் கூடாது. ஆனால், கபடில்லாமல் அவர்கள் கட்டளைகளை அனுசரிக்க வேண்டும்.

²⁹ இதுதான் உரோமையர் யூத மக்களோடு செய்துகொண்ட உடன்படிக்கை.

³⁰ இதில் எழுதப்பட்டிருப்பதைப் பிற்காலத்தில் அவர்களேனும் இவர்களேனும் ஏதாகிலும் கூட்டவோ குறைக்கவோ வேண்டுமாயின், இரு திறத்தாரின் சம்மதத்தின் மேல் செய்யலாம். குறைக்கப்படுவதும் சேர்க்கப்படுவதும் எதுவோ அதனை உறுதியாகக் கடைபிடிக்க வேண்டும் என்று எழுதப்பட்டிருந்தது.

³¹ தெமெத்திரியுஸ் அரசன் யூத இனத்தாருக்குச் செய்த கொடுமைகளைப் பற்றியோவென்றால், நாங்கள் அவனுக்கு: எங்கள் நண்பர்களும் கூட்டாளிகளுமான யூதரை நீ ஏன் கொடுமைப் படுத்தினாய்?

³² திரும்பவும் அவர்கள் எங்களிடம் முறையிடுவார்களாயின், உனக்கு எதிராய் அவர்களுக்கு எல்லா உதவியும் செய்து, கடலிலும் தரையிலும் உன்னை எதிர்த்துச் சண்டை செய்வோம் என்று எழுதியிருக்கிறோம் என்றார்கள்.