1 மக்கபே ஆகமம் - பழைய ஏற்பாடு

¹ நூற்றைம்பத்தோராம் ஆண்டு செலேயுக்கஸ் புதல்வன் தெமெத்திரியுஸ் உரோமையினின்று புறப்பட்டு, சில மனிதரோடு கடற்கரை நகரம் சேர்ந்து அவ்விடத்தில் ஆண்டு வந்தான்.

² தன் முன்னோருடைய தலைநகருக்குள் அவன் புகுந்த போது, அவனுடைய படைவீரர் அந்தியோக்கஸ் என்பவனையும் லிசியாசையும் பிடித்து, அவனுக்கு முன் அவர்களைக் கூட்டி வந்தார்கள்.

³ அவன் அதைக் கேள்விப்பட்டு: அவர்களை என்முன் கொண்டு வராதீர்கள் என்றான்.

⁴ அவர்களைப் படைவீரர் கொன்று விட்டார்கள். தெமெத்திரியுசும் நாட்டில் அரியணை ஏறினான்.

⁵ இஸ்ராயேலில் தீயவரும் அக்கிரமிகளும் அவனிடம் வந்தார்கள். தலைமைக்குரு ஆக ஆசை கொண்ட அவர்களுடைய தலைவன் ஆல்சிமுசும் வந்தான்.

⁶ அவர்கள் அரசனிடம் இஸ்ராயேல் மக்கள் மேல் குற்றம் சாட்டி: உம்முடைய நண்பரெல்லாரையும் யூதாசும் அவன் சகோதரரும் கொன்று, எங்களையும் எங்கள் நாட்டை விட்டுத் துரத்தி விட்டார்கள்.

⁷ ஆதலால், இப்போது உமக்கு நம்பிக்கையுள்ள ஒரு மனிதனை அனுப்பும். அவன் போய் எங்களுக்கும் அரசருடைய நாடுகளுக்கும் அவர்கள் செய்துள்ள கொடுமைகளையெல்லாம் பார்க்கட்டும்@ அவர்களுடைய நண்பரையும், அவர்களுக்கு உதவி செய்தவர்களையும் தண்டிக்கட்டும் என்றார்கள்.

⁸ அரசன் தன் நண்பரில் பெரியாற்றுக்கு அப்பக்கம் இருந்த நாட்டில் பெரியவனும், அரசனிடம் உண்மை உள்ளவனுமாக இருந்து ஆண்டு வந்த பாக்கீது என்பவனைத் தேர்ந்து கொண்டு,

⁹ யூதாஸ் செய்த கொடுமைகளைப் பார்வையிட அவனை அனுப்பி வைத்தான்@ மேலும், கொடியவனான ஆல்சிமுஸ் என்பவனையும் குருவாக ஏற்படுத்தி, இஸ்ராயேல் மக்களைப் பழிவாங்கவும் கட்டளை கொடுத்தான்.

¹⁰ அவர்கள் பெரும் படையுடன் யூதேயா நாட்டுக்கு மிக விரைவாய் வந்தார்கள்@ யூதாசிடமும் அவர் சகோதரிடமும் தூதுவர்களை அனுப்பி, கபடமாய்ச் சமாதான வார்த்தைகளைப் பேசினார்கள்.

¹¹ ஆனால், அவர்கள் அவ்வார்த்தைகளுக்குச் செவிமடுக்கவில்லை. ஏனென்றால், பெரும் படையோடு வந்திருந்ததைக் கண்டனர்.

¹² மறை நூலறிஞர் கூடி, நியாயமானவைகளைக் கேட்க ஆல்சிமுசிடமும் பாக்கீதிடமும் சென்றார்கள்.

¹³ இஸ்ராயேல் மக்களில் அசிதேயர் முதன் முதல் அவர்களுடன் சமாதானம் செய்து கொள்ள முயன்றார்கள்.

¹⁴ ஏனென்றால், ஆரோன் கோத்திரத்தில் குரு ஒருவன் வந்திருக்கிறான்@ அவன் நம்மை மோசம் செய்ய மாட்டான் என்று சொல்லிக் கொண்டார்கள்.

¹⁵ அவனும் அவர்களுக்குச் சமாதான வார்த்தைகளைச் சொல்லி: உங்களுக்கும் உங்கள் நண்பருக்கும் தீங்கு செய்ய மாட்டோம் என்று ஆணையிட்டான்.

¹⁶ அவர்கள் அவனை நம்பினார்கள்@ அவன் அவர்களில் அறுபது பேரைப் பிடித்து ஒரே நாளில் கொன்றான்.

¹⁷ ஏனென்றால், மறைநூலில்: யெருசலேமைச் சுற்றிலும் உம் புனித ஊழியர்களுடைய உடலைச் சிதைத்தார்கள்@ அவர்களின் இரத்தத்தைச் சிந்தினார்கள்@ அவர்களை அடக்கம் செய்ய ஒருவருமில்லை என்று எழுதப்பட்டிருக்கிறது.

¹⁸ மக்கள் எல்லாரும் பயந்து நடுங்கினார்கள் ஏனெனில் அவர்களிடத்தில் உண்மையும் நீதியும் இல்லை@ தங்கள் வார்த்தையை மீறி, தாங்கள் ஆணையிட்டதற்கு எதிராக நடந்தார்கள் என்று சொல்லிக் கொண்டார்கள்.

¹⁹ பாக்கீது யெருசலேமை விட்டு அகன்று பெத்சேக்காவைத் தாக்கினான்@ ஆட்களை அனுப்பி, தன்னை விட்டு ஓடிப்போனவர்களைப் பிடித்து, மக்களில் சிலரைக் கொன்று ஒரு பெரும் கிணற்றில் போடும்படி செய்தான்.

²⁰ அந்த நாட்டை ஆல்சிமுசிடம் ஒப்புவித்து, அவனுக்கு உதவியாகச் சில படைகளை விட்டு விட்டு பாக்கீது அரசனிடம் சென்றான்.

²¹ ஆல்சிமுஸ் தன் குருத்துவத்தை நிலைநிறுத்தக் கூடுமான முயற்சி செய்தான்.

²² மக்களைக் கலகப்படுத்தினவர்கள் எல்லாரும் அவனோடு சேர்ந்து கொண்டு, யூதேயா நாட்டைக் கைப்பற்றி, இஸ்ராயேலுக்கு அதிகத் தீங்கு செய்தார்கள்.

²³ ஆல்சிமுசும் அவனுடன் இருந்தவர்களும் புறவினத்தார் செய்ததை விட அதிகமாக இஸ்ராயேல் மக்களுக்குச் செய்த கொடுந் துன்பங்களை யூதாஸ் கண்டு,

²⁴ யூதேயா நாட்டு எல்லைகளைச் சுற்றி வந்து, தம்மை விட்டுப் போனவர்களைப் பழிவாங்கினார். அதன் பிறகு ஒருவரும் தம் நாட்டை விட்டுப் போகவில்லை.

²⁵ யூதாசும் அவருடன் இருந்தவர்களும் அதிக வலிமை மிக்கவர்களென்று ஆல்சிமுஸ் கண்டு, அவர்களை எதிர்ப்பது கூடாதென்று அறிந்து, அரசனிடம் திரும்பிப் போய், அவர்கள் மீது பல குற்றங்களைச் சுமத்தினான்.

²⁶ அரசன் தலையான பிரபுக்களில் ஒருவனான நிக்கானோரை அனுப்பினான். இவன் இஸ்ராயேலின் பகைவன், அம்மக்களை அழித்தொழிக்கும்படி இவனுக்கு அரசன் கட்டளையிட்டான்.

²⁷ நிக்கோனார் பெரும் படையோடு யெருசலேம் வந்து, யூதாசுக்கும் அவர் சகோதரருக்கும் கபடமாய்ச் சமாதான வார்த்தைகளை சொல்லி அனுப்பி: எனக்கும் உங்களுக்குமிடையே சண்டை வேண்டாம்.

²⁸ சமாதானமாய்ச் சிலரோடு உங்களைப் பார்க்க வருவேன் என்று சொல்லி, யூதாசிடம் வந்து ஒருவரை ஒருவர் சமாதானமாய்க் கண்டு கொண்டார்கள்.

²⁹ ஆனால், பகைவர் யூதாசைப் பிடிக்கத் தயாராய் இருந்தார்கள்.

³⁰ அவன் தம்மைக் கபடமாய்ப் பிடித்துக் கொள்ள வந்தானென்று யூதாஸ் அறிந்து, அவனுக்கு அஞ்சி, அவனைத் திரும்பவும் பார்க்க மனமில்லாதவராய் இருந்தார்

³¹ நிக்கானோர் தன் எண்ணம் வெளியாகிவிட்டதை அறிந்து, காப்பார்சலாமா அருகில் யூதாசை எதிர்த்துப் போர் செய்யப் போனான்.

³² நிக்கானோர் படையில் ஏறக்குறைய ஐயாயிரம் பேர் மாண்டார்கள்@ மற்றவர்கள் தாவீதின் நகரத்துக்கு ஓடிப் போனார்கள்.

³³ இதன் பிறகு நிக்கானோர் சீயோன் மலையில் ஏறினான். மக்களுடைய குருக்களில் சிலர் அவனைச் சந்திக்கவும், அரசனுக்குக் கொடுக்கும் காணிக்கைகளை அவனிடம் கொடுக்கவும் சென்றார்கள்.

³⁴ அவன் அவர்களைக் கேலி செய்து நிந்தித்து இகழ்ந்தான்@ செருக்குடன் பேசினான்@ கோபமாய்ச் சபதம் கூறி:

³⁵ யூதாசும் அவன் படையும் என் கையில் காட்டிக் கொடுக்கப்படாமல் போனால், வெற்றி வீரனாய் நான் திரும்பி வரும் போது உங்கள் ஆலயத்தைக் கொளுத்தி விடுவேன் என்று சொல்லி, வெகு கோபமாய்ப் போய் விட்டான்.

³⁶ குருக்கள் உட்புகுந்து, பீடத்துக்கும் ஆலயத்துக்கும் முன்பாக நின்றுகொண்டு, அழுகையோடு:

³⁷ ஆண்டவரே, உம்முடைய பெயரைப் போற்றுவதற்கு இந்த ஆலயத்தைத் தேர்ந்துகொண்டீர். உம் மக்கள் உம்மை நோக்கி வேண்டவும், உமது உதவியை மன்றாடவும் ஏற்பட்ட இடமன்றோ இது?

³⁸ அந்த மனிதனையும் அவன் படைகளையும் பழிவாங்கும். அவர்கள் வாளுக்கு இரையாகக்கடவார்கள். அவர்கள் சொன்ன தெய்வ நிந்தைகளை நினைவு கூர்ந்து, அவர்கள் வாழும்படி விட்டுவிடாதீர் என்று மன்றாடினார்கள்.

³⁹ நிக்கானோர் யெருசலேமை விட்டு நீங்கிப் பெத்தோரோனில் பாளையம் இறங்கினான். அவ்விடத்தில் சீரியா படையும் அவனைச் சேர்ந்துகொண்டது.

⁴⁰ யூதாசும் மூவாயிரம் பேரோடு அதார்சாவில் பாளையம் இறங்கி, கடவுளை நோக்கி:

⁴¹ ஆண்டவரே, சொன்னாக்கெரியு என்னும் அரசனால் அனுப்பப்பட்டவர்கள் உம்மைத் தெய்வ நிந்தை சொன்னதால் வானதூதர் போய் அவர்களில் இலட்சத்து எண்பத்தையாயிரம் பேர்களைக் கொலை செய்தார்.

⁴² அவ்வாறே எங்களுக்கு முன்பாக இன்று இப்படையையும் அழித்தருளும். அவன் உம்முடைய ஆலயத்தைப் பற்றித் தெய்வ நிந்தை சொன்னானென்று மற்றவர்கள் அறியட்டும். அவன் கெட்ட எண்ணத்திற்கு ஏற்றபடி அவனைத் தண்டித்தருளும் என்று வேண்டினார்.

⁴³ ஆதார் மாதம் பதின்மூன்றாம் நாள் அவர்கள் போர்செய்தார்கள். நிக்கானோர் படை தோல்வி அடைய, அவனே முதலில் மடிந்தான்.

⁴⁴ நிக்கானோர் மடிந்ததைக் கண்ட அவன் படைவீரர் தங்கள் போர்க்கருவிகளை எறிந்து விட்டு ஓட்டம் பிடித்தார்கள்.

⁴⁵ அதார்சா முதல் காசாரா வரும் வரை அவர்களை ஒருநாள் முழுவதும் பின்தொடர்ந்து, பிறருக்கு அறிவிக்கும் படியாக அவர்களுக்குப் பின்னால் இவர்கள் எக்காளங்களை ஊதினார்கள்.

⁴⁶ சுற்றுப்பக்கத்து யூதேயா ஊர்களின் மக்களெல்லாம் புறப்பட்டு, மிக்கத் துணிவோடு அவர்களைத் தாக்கினார்கள்@ மறுபடியும் அவர்களை எதிர்த்து எல்லாரையும் கொன்றார்கள்.

⁴⁷ தப்பிப்பிழைத்தவன் ஒருவனும் இல்லை. அவர்கள் பொருட்களைக் கொள்ளை அடித்தார்கள்@ நிக்கானோர் தலையையும், அவன் அகந்தையோடு நீட்டிக் காட்டின வலக்கையையும் வெட்டி வந்து யெருசலேமுக்கு முன்பாகத் தொங்க விட்டார்கள்.

⁴⁸ மக்கள் மிக்கக் களிப்புற்று அந்த நாளை மகிழ்வுடன் கொண்டாடினர்.

⁴⁹ ஆதார் மாதம் பதின்மூன்றாம் நாளாகிய அந்நாளை ஆண்டுதோறும் கொண்டாட வேண்டுமெனத் தீர்மானித்தார்கள்.

⁵⁰ சிறிது காலம் யூதேயா நாட்டில் அமைதி நிலவியது.