1 மக்கபே ஆகமம் - பழைய ஏற்பாடு

¹ யூதேயா நாடு வந்து அதை அழித்தொழிக்கும்படியாகத் திரிபோன் என்பவன் திரளான சேனைகளைச் சேர்த்திருக்கிறான் என்று சீமோன் கேள்விப்பட்டார்.

² மக்கள் பயந்து நடுக்கமுற்றிருப்பதைக் கண்டு அவர் யெருசலேம் சென்று மக்களை ஒன்றாகச் சேர்த்து,

³ அவர்களுக்கு அவர் ஊக்கமளிக்கும் வார்த்தைகளைச் சொன்னார்: நானும் என் சகோதரரும் என் குடும்பத்தாரும் நம் கட்டளைகளுக்காகவும் கடவுள் ஆலயத்துக்காகவும் எத்தனை போர்கள் புரிந்தோமென்றும், எவ்வகைத் தொல்லைகளில் அகப்பட்டிருந்தோமென்றும் நீங்கள் அறிந்திருக்கிறீர்கள்.

⁴ இவற்றை முன்னிட்டன்றோ இஸ்ராயேலுக்காக என் சகோதரரெல்லாரும் மாண்டார்கள்@ நான் மட்டும் எஞ்சியிருக்கிறேன்.

⁵ துன்ப காலத்தில் நான் என் உயிரை ஒரு போதும் காப்பாற்றப் போவதில்லை. என் சகோதரரை விட நான் மேம்பட்டவன் அல்ல.

⁶ ஆதலால், என் இனத்தாரும், கடவுளின் ஆலயமும், நம் பிள்ளைகளும், மனைவியரும் (பட்ட துன்பங்களுக்காகப்) பழிவாங்குவேன். ஏனென்றால், புறவினத்தார் எல்லாரும் நம்மீதுள்ள பகையினால் நம்மை அழித்தொழிக்கக் கூடியிருக்கிறார்கள்.

⁷ இவற்றைக் கேட்டதும் மக்களுக்குத் துணிவு உண்டாயிற்று.

⁸ எல்லாரும் உரத்த குரலில்: உம் சகோதரராகிய யூதாசுக்கும் யோனத்தாசுக்கும் பதிலாக நீரே எங்கள் படைத் தலைவராய் இருக்கிறீர்.

⁹ நீர் எங்கள் போர்களை நடத்தும்@ நீர் கட்டளையிடுவதையெல்லாம் நாங்கள் செய்வோம் என்றார்கள்.

¹⁰ அப்போது அவர் எல்லாச் சேனைகளையும் ஒன்று சேர்த்து, யெருசலேம் சுற்று மதில்களை விரைவிலே கட்டினார்.

¹¹ அப்சலோம் புதல்வன் யோனத்தாசையும், அவனுடன் புதிய சேனைகளையும் யோப்பாவுக்கு அனுப்பினார். அவன் அதிலிருந்தவர்களை வெளியே துரத்தி விட்டு அவ்விடத்தில் தங்கியிருந்தான்.

¹² திரிபோன் தோலெமாயிதை விட்டு, காவலில் இருந்த யோனத்தாசையும் தன்னுடன் அழைத்துக் கொண்டு, திரளான சேனைகளோடு யூதேயா நாடு வரப் புறப்பட்டான்.

¹³ சீமோன் சமவெளிக்கு எதிரில் அத்துஸ் ஓரமாய்ப் பாளையம் இறங்கினார்.

¹⁴ சீமோன் தம் சகோதரர் யோனத்தாசுக்குப் பதிலாகப் படையெடுத்து வந்திருக்கிறாரென்றும், தன்னுடன் போர் செய்யப் போகிறாரென்றும் திரிபோன் அறிந்து, அவரிடம் தூதுவரை அனுப்பி:

¹⁵ உம் சகோதரர் யோனத்தாஸ் செய்து வந்த காரியங்களை முன்னிட்டு, அரசருக்குக் கொடுக்க வேண்டிய வரிக்காக அவரை நாங்கள் எங்களிடம் நிறுத்தி வைத்திருக்கிறோம்.

¹⁶ ஆதலால், இப்போது அவர் ஓடி விடாதபடிக்குப் பிணையாக நீர் நூறு வெள்ளிக் காசுகளையும், அவருடைய இரு புதல்வரையும் அனுப்பினால், அவரை விடுவிக்கிறோம் என்று சொன்னான்.

¹⁷ அவன் கபடமாய்ப் பேசுகிறானென்று சீமோன் அறிந்திருந்தும், இஸ்ராயேல் மக்களின் கோபத்துக்கும் பகைக்கும் தாம் ஆளாகாதபடி பணத்தையும் பிள்ளைகளையும் ஒப்புவிக்கும்படி கட்டளையிட்டார்.

¹⁸ அவர்கள்: பணத்தையும் பிள்ளைகளையும் அனுப்பாததால் தானே யோனத்தாஸ் மடிந்தார் என்று சொல்வார்களென்று எண்ணி,

¹⁹ பிள்ளைகளையும் நூறு வெள்ளிக் காசுகளையும் அனுப்பினார். திரிபோனோ தான் சொல்லியதை மீறி, யோனத்தாசை அனுப்பவில்லை.

²⁰ அதன் பிறகு, திரிபோன் நாட்டை அழிப்பதற்கு அதற்குள் புகுந்தான்@ அதோருக்குப் போகும் வழியாய்ச் சென்றான். அவன் சென்ற விடமெல்லாம் சீமோனும் தம் சேனைகளோடு சென்றார்.

²¹ கோட்டைக்குள் இருந்தவர்கள், திரிபோன் விரைவாய்ப் பாலைவனம் வழியாய் வந்து தங்களுக்கு உணவுப் பொருட்களை அனுப்பும்படியாக அவனிடம் தூதுவர்களை அனுப்பினார்கள்.

²² அன்று இரவே போகும்படியாகத் திரிபோன் தன் குதிரை வீரரைத் தயாராக்கினான். ஆனால், பனி மிகுதியாக இருந்தபடியால் அவன் கலாத்துக்குப் போகவில்லை.

²³ பாஸ்காமா அருகே வந்தபோது, அவன் யோனத்தாசையும் அவருடைய பிள்ளைகளையும் அவ்விடத்தில் கொன்றான்.

²⁴ பிறகு திரிபோன் தன் சொந்த நாடு சேர்ந்தான்.

²⁵ சீமோன் ஆட்களை அனுப்பித் தம் சகோதரர் யோனத்தாசின் எலும்புகளை எடுத்து வரச் செய்து, அவற்றைத் தம் முன்னோரின் நகரமாகிய மோதினில் அடக்கம் செய்தார்.

²⁶ இஸ்ராயேலர் எல்லாரும் பெருந்துக்கம் கொண்டாடினார்கள்@ அவருக்காகப் பலநாள் புலம்பினார்கள்.

²⁷ சீமோன் தம் தந்தையினுடையவும் சகோதரருடையவும் கல்லறையின் மேல் கட்டடம் ஒன்று எழுப்பி, முன்னும் பின்னும் சலவைக் கற்கள் பதித்தார்.

²⁸ தந்தைக்கும் தாய்க்கும் நான்கு சகோதரர்களுக்கும் ஒன்றுக்கு முன் ஒன்றாக ஏழு கோபுரங்களை எழுப்பினார்.

²⁹ இவைகளைச் சுற்றிலும் உயர்ந்த தூண்களை எழுப்பி, அத்தூண்களின் மேல் அவர்கள் நினைவாக போர்க் கருவிகளையும் வைத்தார். கடற்பயணம் செய்யும் யாவரும் காணும்படி போர்க்கருவிகளுக்கு அருகே கற்களில் வெட்டப்பட்ட கப்பல்களையும் அமைத்தார்.

³⁰ மோதின் நகரில் இந்நாள் வரை இருக்கும் கல்லறை அதுவே.

³¹ திரிபோன் இளம் வயதினனான அரசன் அந்தியோக்கஸ் என்பவனோடு பயணம் செய்யும்போது கபடமாய் அவனைக் கொன்று,

³² அவனுக்குப் பதிலாய் அரசாண்டு, ஆசியாவில் முடிபுனைந்து, நாடுகளில் தொல்லைகள் பல விளைவித்தான்.

³³ சீமோன் யூதேயாவில் கோட்டைகளைக் கட்டி, உயர்ந்த கோபுரங்களாலும் அகன்ற சுவர்களாலும் கதவுகளாலும் பூட்டுகளாலும் வலுப்படுத்தினார்@ கோட்டைக்குள் உணவு வகைகளையும் சேர்த்து வைத்தார்.

³⁴ திறை செலுத்துவதினின்று தம் நாட்டை விடுவிக்கும்படி கேட்க வேண்டி, சீமோன் சிலரைத் தேர்ந்தெடுத்து அவர்களைத் தெமெத்திரியுசிடம் அனுப்பினார். ஏனென்றால், திரிபோன் செய்வதெல்லாம் கொள்ளையடிக்கும் செயலேயாகும்.

³⁵ தெமெத்திரியுஸ் மன்னன் அவர்களுக்கு மறுமொழியாக:

³⁶ தெமெத்திரியுஸ் மன்னர் தலைமைக்குருவும், மன்னர்கள் நண்பருமான சீமோனுக்கும், மூத்தோருக்கும், யூத இனத்தாருக்கும் வாழ்த்துக் கூறுகிறோம்.

³⁷ நீங்கள் அனுப்பிய பொன்முடியும், குருத்தோலையும் பெற்றுக் கொண்டோம். உங்களுடன் உறுதியான சமாதான உடன்படிக்கை செய்து கொள்ளவும், உங்களுக்கு நாம் அனுப்பிய நன் கொடைகளைக் கொடுக்க மன்னரால் ஏற்படுத்தப்பட்ட தலைவர்களுக்கு எழுதவும் ஆயத்தமாயிருக்கிறோம்.

³⁸ உங்களைப் பொறுத்த மட்டில், நாம் செய்துள்ள ஏற்பாடுகள் யாவும் உறுதியாய் இருக்கட்டும், நீங்கள் கட்டிய கோட்டைகளை உங்களுக்குச் சொற்தமாக விட்டு விடுகிறோம்.

³⁹ இந்நாள் வரை நீங்கள் செய்துள்ள குற்றங்களையும் தீமைகளையும் மன்னிக்கிறோம். நீங்கள் கொடுக்க வேண்டிய முடியையும் கேட்காமல் விட்டு விடுகிறோம். இன்னும் யெருசலேமினின்று நமக்குச் சேர வேண்டிய வரி ஏதேனும் உண்டானால், அதையும் மன்னிக்கிறோம்.

⁴⁰ உங்களில் யாரேனும் நம்முடைய படைகளில் சேர்வதற்குத் தகுதியுடையவராயிருந்தால், அவர்கள் சேர்த்துக் கொள்ளப்படுவர். நம்மிடையே சமாதானம் நிலவட்டும் என்று எழுதினான்.

⁴¹ நூற்றெழுபதாம் ஆண்டு இஸ்ராயேல் மக்கள் புறவினத்தாரின் அடிமைத் தளையினின்று நீங்கினார்கள்.

⁴² அது முதல் இஸ்ராயேல் மக்கள் பலகைகளிலும் பொதுப்புத்தகங்களிலும், தலைமைக்குருவும் சிறந்த படைத்தலைவரும் யூத பிரபுவுமான சீமோன் ஆட்சி செலுத்தின முதல் ஆண்டு என்று எழுதத் தொடங்கினார்கள்.

⁴³ அந்நாட்களில் சீமோன் காசா நகரத்தை முற்றுகையிட்டு, படைகளால் அதைச் சூழ்ந்துகொண்டு, போர்ப்பொறிகளைச் செய்வித்து, நகரைச் சுற்றிவளைத்து, கோபுரமொன்றைத் தாக்கி நகரைப் பிடித்துக் கொண்டார்.

⁴⁴ போர்ப்பொறியினுள் இருந்தவர்கள் திடீரென்று நகரினுள் நுழைய நகரில் பெரிய பரபரப்பு உண்டாயிற்று.

⁴⁵ நகரில் இருந்தவர்கள் தங்கள் மனைவி மக்களோடு மதில் மேல் ஏறி, தங்கள் ஆடைகளைக் கிழித்துக் கொண்டு, தங்களோடு சமாதானம் செய்யும்படி சீமோனைக் கேட்டுக்கொண்டார்கள்:

⁴⁶ நாங்கள் செய்த தீமைகளுக்கு எங்களைத் தண்டியாமல், எங்கள் மீது இரக்கம் வையும் என்று மன்றாடினார்கள்.

⁴⁷ சீமோனும் மனம் இரங்கி, அவர்களோடு நகருக்கு வெளியே துரத்தி விட்டு, சிலைகள் வைத்திருந்த வீடுகளைத் தூய்மைப்படுத்தி முடிந்த பின்பு, ஆண்டவருக்குப் புகழ்ச்சியாக இன்னிசைகள் பாடிக் கொண்டு நகருக்குள் புகுந்தார்.

⁴⁸ அதனின்று எல்லாத் தீட்டுகளையும் நீக்கி, மறைக்கட்டளை ஒழுங்குகளை அனுசரிக்கச் செய்ய சிலரை ஏற்படுத்தினார். நகரத்திற்கு அரண் அமைத்து அதைத் தம் உறைவிடமாக்கிக் கொண்டார்.

⁴⁹ யெருசலேம் கோட்டைக்குள் இருந்தவர்கள் வெளியே வரவும், நாட்டுக்குள் புகவும், வாங்கவும் விற்கவும் தடைசெய்யப் பட்டிருந்தனர். ஆதலால்,அவர்கள் பசியினால் வருந்தினார்கள். அவர்களில் பலர் பஞ்சத்தால் மாண்டார்கள்.

⁵⁰ தங்களை விட்டு விடும்படி அவர்கள் சீமோனை மன்றாடினார்கள். அவரும் அவ்வாறே செய்தார்@ அவர்களை அவ்விடத்தினின்று துரத்தி விட்டு, கோட்டையைத் தீட்டுகளினின்றும் தூய்மைப்படுத்தினார்.

⁵¹ நூற்றெழுபத்தோராம் ஆண்டு இரண்டாம் மாதம் இருபத்து மூன்றாம் நாள் இஸ்ராயேலின் பெரும் பகைவன் ஒழிந்தமையால், நன்றிப் புகழ்ச்சியாகக் குருத்தோலைகளைப் பிடித்துக் கொண்டு, வீணை முதலிய இசைக்கருவிகள் முழங்க, இன்னிசை வாழ்த்துகள் பாடிக்கொண்டு கோட்டைக்குள் புகுந்தார்கள்.

⁵² இந்நாள் ஆண்டு தோறும் மகிழ்ச்சியாய்க் கொண்டாடப்பட வேண்டுமென்று அவர் கட்டளையிட்டார்.

⁵³ கோட்டைக்கு அருகில் இருந்த ஆலயத்தின் மலையை வலுப்படுத்தி, அதில் அவரும் அவருடன் இருந்தவர்களும் வாழலாயினர்.

⁵⁴ தம் புதல்வன் அருளப்பன் போரில் வீரம் நிறைந்தவனென்று சீமோன் கண்டு, அவனைப் படைகளுக்கெல்லாம் தலைவனாக நியமித்தார். அவன் காசாவில் வாழ்ந்தான்.