1 மக்கபே ஆகமம் - பழைய ஏற்பாடு

¹ காலம் தமக்கு ஏற்றதாக இருப்பதைக் கண்ட யோனத்தாஸ் சிலரைத் தேர்ந்து கொண்டு, உரோமையரோடு உடன்படிக்கையை உறுதிப்படுத்தவும் புதுபிக்கவும் அவர்களை உரோமைக்கு அனுப்பினார்.

² அவ்வாறே ஸ்பார்த்தியருக்கும் மற்ற இடங்களுக்கும் கடிதங்கள் அனுப்பினார்.

³ அவர்கள் உரோமைக்குச் சென்று, சங்கத்தில் நுழைந்து: "தலைமைக்குரு யோனத்தாசும் யூத குலத்தாரும் உங்களோடு முன்போல நட்பும் சமாதான உடன்படிக்கையும் செய்யும்படியாக எங்களை அனுப்பினார்" என்று சொன்னார்கள்.

⁴ யூதர்கள் சமாதானமாய்த் தங்கள் நாடுசேர உதவும்படியாக அந்ததந்த இடங்களுக்கு எழுதப்பட்டிருந்த கடிதங்களை உரோமையர் அவர்களிடம் கொடுத்தார்கள்.

⁵ ஸ்பாத்தியருக்கு யோனத்தாஸ் எழுதின கடிதமாவது:

⁶ தலைமைக்குருவான யோனத்தாசும், மூத்தோரும் குருக்களும், யூத குலத்தைச் சேர்ந்த மற்றவர்களும் சகோதரரான ஸ்பார்த்தியருக்கு வாழ்த்துக் கூறுகிறோம்.

⁷ முன் உங்கள் நாட்டை ஆண்டு வந்த ஆரியுஸ் என்பவரால், நீங்கள் எங்கள் சகோதரர்களென்று எங்கள் தலைமைக்குருவான ஓனியாசுக்கு எழுதியனுப்பப்பட்டிருந்தது. இத்துடன் அனுப்பியிருக்கும் கடிதத்தைக் கொண்டு இதை நீங்கள் அறிந்துகொள்ளலாம்.

⁸ உங்களால் அனுப்பப்பட்ட மனிதனை ஓனியாஸ் மரியாதையோடு ஏற்றுக்கொண்டார்@ நட்பையும் உடன்படிக்கைகையும் பற்றி எழுதியிருந்த கடிதத்தையும் ஒப்புக்கொண்டார்.

⁹ எங்கள் கைகளிலிருக்கும் மறைநூல்களினின்று நாங்கள் ஆறுதலடைவதனால் எங்களுக்கு இவையொன்றும் தேவையில்லாதிருப்பினும்,

¹⁰ உங்களிடமிருந்து பிரிந்து போகாதபடிக்கு உங்கள் உறவையும் நட்பையும் புதுப்பிக்க வேண்டி உங்களிடம் அனுப்பினோம். ஏனென்றால், உங்களிடமிருந்து செய்தி கேள்விப்பட்டுப் பலநாளாயிற்று.

¹¹ நாங்களோ எங்கள் திருநாட்களிலும், மற்ற நல்ல நாட்களிலும் செலுத்தும் பலிகளில் இடைவிடாமல் உங்களை நினைப்பதுமல்லாமல், மற்றச் சடங்குகளிலும் சகோதரரை நினைவு கூர்கிறோம்.

¹² உங்கள் புகழ் கண்டு நாங்கள் மகிழ்ச்சி அடைகிறோம்.

¹³ எங்களைப் பற்பல துன்பங்கள் சூழ்ந்து கொண்டிருந்தன@ பல போர்கள் நடந்தன. எங்களைச் சுற்றிலுமிருக்கும் மன்னவர்கள் எங்களை எதிர்த்துச் சண்டை செய்தார்கள்.

¹⁴ இந்தப் போர்களில் உங்களுக்காவது, இன்னும் பிற தோழர்கள், நண்பர்களுக்காவது தொந்தரவு கொடுக்க எங்களுக்கு விருப்பம் இருந்ததில்லை.

¹⁵ கடவுளுடைய உதவி எங்களுக்கு இருந்தமையால், அவர் எங்களைக் காப்பாற்றினார். எங்கள் பகைவர்கள் தாழ்த்தப்பட்டார்கள்.

¹⁶ ஆதலால், அந்தியோக்கஸ் புதல்வன் நுமேனியுசையும், யாசோன் புதல்வன் அந்திப்பாத்தரையும் உரோமையரோடு முன்னிருந்த நட்பையும் சமாதானத்தையும் புதுப்பிக்க அவர்களிடம் அனுப்பியிருக்கிறோம்.

¹⁷ நமது ஒற்றுமையைப் புதுப்பிக்கும்படியான கடிதத்தையும் அவர்கள் உங்களிடம் கொடுப்பார்கள்.

¹⁸ நாங்கள் எழுதியதற்குப் பதில் எழுதும்படி கேட்டுக்கொள்கிறோம்.

¹⁹ ஓனியாசுக்கு அனுப்பப்பட்டிருந்த கடிதமாவது:

²⁰ ஸ்பார்த்தியர் மன்னர் ஆரியுஸ், தலைமைக்குரு ஓனியாசுக்கு வாழ்த்துகள் அனுப்புகிறோம்..

²¹ ஸ்பார்த்தியரும் யூதரும் சகோதரரென்றும், ஆபிரகாமின் மக்கள் என்றும் நூல்களில் காணப்படுகிறது.

²² நாம் அதனை அறிந்திருப்பதை முன்னிட்டு, நீங்கள் சமாதானத்தைப் பற்றி எழுதினால் நலமாயிருக்கும்.

²³ நாம் உங்களுக்கு எழுதுவது என்னவென்றால், நம் மந்தைகளும், நமக்குச் சொந்தமான யாவும் உங்களுடையனவாகவும், உங்களுக்குச் சொந்தமான யாவும் நம்முடையனவாகவும் இருக்கட்டும். இதை உங்களுக்கு அறிவிக்கிறோம் என்பதாம்.

²⁴ அப்பொழுது தெமெத்திரியுசின் படைத்தலைவர்கள் முன்னிருந்த சேனைகளை விட அதிகமான சேனைகளோடு தன்னை எதிர்த்துச் சண்டை போட வந்திருப்பதாக யோனத்தாஸ் கேள்விப்பட்டார்.

²⁵ யெருசலேமை விட்டுப் புறப்பட்டு, அமாதீத்தர் நாட்டில் அவர்களை எதிர்த்துச் சென்றார். ஏனென்றால், தம்முடைய நாட்டிற்குள் நுழையும்படி அவர் காத்திருக்கவில்லை.

²⁶ அவர்கள் பாளையத்துக்கு ஒற்றர்களை அனுப்பினார். இரவில் அவரைத் தாக்க எண்ணியிருக்கிறார்களென்று அவர்கள் அவருக்கு அறிவித்தார்கள்.

²⁷ பொழுது இறங்கிய போது, தம்முடையவர்கள் விழித்து இரவு முழுவதும் படைக்கருவிகளோடு தயாராய் இருக்கும்படி கட்டளையிட்டு, தம் பாளையத்தைச் சுற்றிலும் காவலரை நியமித்தார்.

²⁸ யோனத்தாஸ் தம் சேனைகளோடு சண்டைக்கு ஆயத்தமாய் இருக்கிறாரென்று பகைவர் கேள்விப்பட்டுப் பயந்து, மனக்கலக்கமுற்று, தாங்கள் பாளையம் இறங்கியிருந்த இடத்தில் நெருப்பு மூட்டிவிட்டு ஓட்டம் பிடித்தார்கள்.

²⁹ யோனத்தாசும் அவர் படைகளும் பொழுது விடியுமட்டும் அதை அறிந்தார்களில்லை. அப்போது தான் நெருப்பு வெளிச்சத்தைக் கண்டார்கள்.

³⁰ யோனத்தாஸ் அவர்களைப் பின்தொடர்ந்தும், அவர்களைப் பிடிக்க முடியவில்லை. ஏனென்றால், அவர்கள் எலேயுத்தேருஸ் நதியை ஏற்கனவே கடந்து விட்டார்கள்.

³¹ சபாதேயர் என்னப்பட்ட அராபியரிடம் யோனத்தாஸ் சென்று, அவர்களை வென்று, அவர்கள் பொருட்களைக் கொள்ளையடித்தார்.

³² பின் அவ்விடம் விட்டுத் தமஸ்கு வந்து, அந்நாடெங்கும் சென்றார்.

³³ சீமோன் புறப்பட்டு அஸ்காலோனுக்கும் அதையடுத்த கோட்டைகளுக்கும் வந்தான்@ யோப்பாவைத் தாக்கி, அதைக் கைப்பற்றினான்.

³⁴ ஏனென்றால், தெமெத்திரியுஸ் படைகளுக்கு உதவிசெய்ய அவர்கள் மனம் கொண்டிருந்தார்களென்று கேள்விப்பட்டிருந்தான்@ அதைக் காப்பதற்குக் காவலரை ஏற்படுத்தினான்.

³⁵ யோனத்தாஸ் திரும்பி வந்து, மக்களின் மூத்தோரைக் கூட்டி, யூதேயாவில் கோட்டைகள் கட்டும்படியும்,

³⁶ யெருசலேமில் மதில்கள் அமைக்கும்படியும், கோட்டைக்கும் நகரத்துக்கும் மத்தியில் உயர்ந்த மதில் எழுப்பி, அதை நகரத்தினின்று பிரித்துத் தனியாக்கி, யாதொன்றும் வாங்கவும் விற்கவும் கூடாத நிலையில் வைக்கும்படியும் தீர்மானித்தார்.

³⁷ நகரத்தைக் கட்டும்படியாக எல்லாரும் கூடினர். கிழக்கில் ஆற்றோரமாய் இருந்த சுவர் விழுந்து போயிருந்தமையால், அவர் அதைக் கட்டி எழுப்பினார். அது காப்தேத்தா என்று அழைக்கப்பட்டது.

³⁸ சீமோன் செப்பேலாவில், அதியதா நகரைக் கட்டி, வலுப்படுத்திக் கதவுகளும் பூட்டுகளும் போட்டான்.

³⁹ திரிபோன் என்பவன் ஆசியாவை ஆளவும் முடிபுனையவும், மன்னன் அந்தியோக்கஸ் என்பவனைக் கொல்லவும் எண்ணம் கொண்டிருந்த போது,

⁴⁰ யோனத்தாஸ் தன்னைத் தடுத்துத் தன்னுடன் எதிர்த்துச் சண்டை செய்வாரென்று பயந்து, அவரைப் பிடித்துக் கொல்லும்படி தேடினான்@ ஆதலால், பெத்சானுக்குப் புறப்பட்டுச் சென்றான்.

⁴¹ யோனத்தாஸ் நாற்பதினாயிரம் படை வீரரோடு அவனை எதிர்த்து கொண்டு போய் பெத்சான் சேர்ந்தார்.

⁴² தன்னை எதிர்ப்பதற்குப் பெரும்படையோடு யோனத்தாஸ் வந்திருப்பதைத் திரிபோன் கண்டு பயந்து,

⁴³ அவரை மிகுந்த மரியாதையோடு வரவேற்று, தன் நண்பரிடத்தில் அவரைப் புகழ்ந்து பேசி, அவருக்குப் பரிசளித்தான்@ தனக்குக் கீழ்ப்படிவது போலவே அவருக்கும் கீழ்ப்படிய வேண்டுமென்று தன் படைகளுக்கு உத்தரவிட்டான்.

⁴⁴ மேலும், யோனத்தாசை நோக்கி: நமக்குள் சண்டை இல்லாதபோது மக்களைத் தொல்லைப்படுத்துவானேன்?

⁴⁵ ஆதலால், அவர்களை அவர்கள் வீடுகளுக்கு அனுப்பி விட்டு, உன்னுடன் இருக்கச் சிலபேரை மட்டும் தேர்ந்து கொண்டு என்னோடு தோலெமாயிது நகரம் வா. அதையும், மற்றக் கோட்டைகளையும், படைகளையும், அலுவல் ஆற்றும் தலைவர்கள் அனைவரையும் உன்னிடம் ஒப்புவித்து விட்டு நான் திரும்பிப் போவேன்@ அதற்காகவே நான் வந்தேன் என்று கூறினான்.

⁴⁶ யோனத்தாஸ் அவனை நம்பி, அவன் சொற்படி செய்து படைகளை அனுப்பி விட்டார். அவர்களோ யூதேயா நாடு சென்றார்கள்.

⁴⁷ அவர் தம்மோடு மூவாயிரம் வீரர்களை வைத்துக் கொண்டு, இவர்களில் ஈராயிரம் வீரர்களைக் கலிலேயாவுக்குத் திரும்பிப் போகச் சொன்னார்@ எஞ்சியிருந்த ஆயிரம் வீரர்களோ அவருடன் சென்றார்கள்.

⁴⁸ யோனத்தாஸ் தோலெமாயிது நகருக்குள் நுழைந்த போது அந்நகரத்தார் கதவுகளை அடைத்து விட்டார்கள்@ அவரைப் பிடித்துக் கொண்டார்கள்@ அவருடன் வந்தவர்கள் எல்லாரையும் வாளுக்கு இரையாக்கினார்கள்.

⁴⁹ அதுவுமின்றி, யோனத்தாசுடைய நண்பரெல்லாரையும் கொல்வதற்குப் படைகளையும் குதிரை வீரரையும் கலிலேயாவுக்கும் பெரிய சமவெளிக்கும் திரிபோன் அனுப்பினான்.

⁵⁰ யோனத்தாசும் அவருடன் இருந்தவர்களும் பிடிபட்டு மாண்டார்களென்று அவர்கள் அறிந்து, தங்களுக்குத் தாங்களே துணிவு ஊட்டிக் கொண்டு, சண்டைக்குத் தயாராய் வந்தார்கள்.

⁵¹ தொடர்ந்து வந்தவர்களோ இவர்கள் தங்கள் உயிரைக் கொடுக்கத் துணிந்திருப்பதைக் கண்டு, திரும்பிப் போய் விட்டார்கள்.

⁵² பிறகு இவர்கள் அமைதியாய் யூதேயா நாடு திரும்பிச் சென்றார்கள்@ யோனத்தாசுக்காகவும் அவருடன் மாண்டவர்களுக்காகவும் பெரிதும் துக்கம் கொண்டாடினார்கள். இஸ்ராயேலும் அழுது புலம்பியது.

⁵³ இவர்களைச் சுற்றிலுமுள்ள இனத்தார் இவர்களை அழித்தொழிக்கத் தேடினார்கள்.

⁵⁴ ஏனென்றால், இவர்களை நடத்துகிறவனும் இவர்களுக்கு உதவி செய்கிறவனும் இல்லை. ஆதலால், இப்போது இவர்களுடன் நாம் சண்டை செய்து, இவர்களை ஒழித்து, மனித வரலாற்றில் இவர்கள் பெயரே அற்றுப் போகும்படி செய்தால் நலம் என்று தங்களுக்குள் கூறிக்கொண்டார்கள்.