யூதித் ஆகமம் - பழைய ஏற்பாடு

¹ படைவீரர் எல்லாரும் ஒலொபெர்னெஸ் வெட்டுண்ட செய்தியைக் கேள்விப்பட்டவுடனே அறிவும் ஆற்றலும் இழந்தனர்@ அஞ்சி நடுங்கினர்@ தலை தப்பியது போதும் என்று தப்பியோட முனைந்தனர்.

² எனவே, பேசவும் துணியாது, தலைக்குணிந்து நின்றனர். எபிரேயர் ஆயுதம் தாங்கியவர்களாய்த் தங்கள் மீது படையெடுத்து வருகிறார்கள் என்று கேள்விப் பட்டு, எல்லாவற்றையும் விட்டு விட்டு வயல் வெளிகள், மலைப் பாதைகள் மூலம் தப்பி ஓடினர்.

³ அவர்கள் புறமுதுகு காட்டி ஓடுவதைக் கண்ட இஸ்ராயேலர் அவர்களைப் பின் தொடர்ந்தனர், எக்காளம் ஊதியும் பெரும் கூச்சலிட்டுக் கொண்டும் மலையினின்று இறங்கி வந்தனர்.

⁴ அசீரியர் ஒற்றுமை இன்றிச் சிதறி ஓடினர். இஸ்ராயேலரோ ஒன்றாகச் சேர்ந்து அவர்களைப் பின்தொடர்ந்து, கண்ணில் பட்ட அசீரியர்கள் அனைவரையும் அழித்தொழித்தனர்.

⁵ மேலும் ஓசியாஸ் இஸ்ராயேல் நாட்டின் நகரங்கள், மாநிலங்கள் தோறும் ஆளனுப்பினான்.

⁶ ஆகையால் அந்நாட்டு மக்கள் அனைவரும் இளைஞரைத் தேர்ந்தெடுத்து, ஆயுதம் தாங்கியோராய் அவர்கள் அசீரியர்களைப் பின் தொடருமாறு அனுப்பி வைத்தனர். இவர்கள் தங்கள் நாட்டின் கடைசி எல்லை வரை அவர்களைப் பின் தொடர்ந்து சென்று அவர்களை வாளுக்கு இரையாக்கினர்.

⁷ பெத்தூலியா நகரில் எஞ்சியிருந்தோர் அசீரியருடைய கூடாரங்களில் புகுந்து, அவர்கள் விட்டுச் சென்றிருந்த பொருட்களை எல்லாம் ஏராளமாகக் கொள்ளையிட்டுச் சென்றனர்.

⁸ வெற்றி கொண்ட வீரர்கள் பெத்தூலியாவுக்குத் திரும்பின போது அசீரியருடைய பொருட்களைக் கொள்ளையிட்டுக் கொணர்ந்தனர். ஆகையால் அவர்களுடைய ஆடுமாடுகளுக்கும் மற்றப் பொருட்களுக்கும் கணக்கே இல்லை. இதனால் சிறியோர் பெரியோர் அனைவருமே செல்வர்களாயினர்.

⁹ யோவாக்கீம் என்னும் தலைமைக் குரு தம் எல்லாக் குருக்களோடும் யெருசலேமிருந்து பெத்தூலியா நகரத்திற்கு யூதித்தைச் சந்திக்க வந்தார்.

¹⁰ அவள் அவருக்கு எதிர்கொண்டு வரக்கண்டு மக்கள் எல்லாரும் ஒரே குரலாய் அவளை வாழ்த்தி, "யெருசலேமின் மகிமை நீ! இஸ்ராயேலின் மகிழ்ச்சி நீ! நம் மக்களின் பெருமையும் நீயே! ஏனென்றால் நீ செய்தது தீரச்செயல்.

¹¹ நீ கற்புடையவளாய் உன் கணவனுக்குப் பின் மற்றெந்த ஆடவனையும் அறியாத மாபத்தினியாய் இருந்தமையால் தான் நீ வலிமை பெற்றாய். ஆண்டவரே உனக்கு ஆற்றல் அளித்தவர். ஆதலால் என்றென்றும் நீ புகழப்படுவாய்" என்றனர்.

¹² இதைக் கேட்டு மக்கள் அனைவரும், "அப்படியே ஆகுக, ஆகுக!" என்று ஆர்ப்பரித்தனர்.

¹³ அசீரியருடைய சொத்துகளையெல்லாம் திரட்டிச் சேர்க்க இஸ்ராயேலருக்குக் குறைந்தது முப்பது நாள் தேவைப்பட்டது,

¹⁴ ஒலொபெர்னெசுக்குச் சொந்தமான பொன், வெள்ளி, ஆடை, மாணிக்கக் கற்கள், தட்டுமுட்டுகள் முதலியவற்றையெல்லாம் அவர்கள் யூதித்துக்குக் கொடுத்தனர்.

¹⁵ மகளிர், கன்னியர், இளைஞர் ஆகியோர் இன்னிசைக் கருவிகளை இசைக்க, மக்கள் அனைவரும் அவர்களோடு சேர்ந்து மகிழ்ச்சி கொண்டாடினர்.