யூதித் ஆகமம் - பழைய ஏற்பாடு

¹ பிறகு ஒலொபெர்னெஸ் தனது கருவூல அறையில் யூதித்தைத் தங்கச் சொல்லித் தன் சாப்பாட்டிலிருந்து அவளுக்குப் பரிமாற வேண்டுமென்று திட்டம் செய்தான்.

² யூதித் அவனை நோக்கி, "நீர் எனக்குக் கொடுக்கப் பணித்த பொருட்களை நான் உண்பது குற்றமாகும். எனவே நான் அவற்றை உண்ணாமல், நானே கொண்டு வந்துள்ளவற்றை உண்பேன்" என்றாள்.

³ அதற்கு ஒலொபெர்னெஸ், "நீ கொண்டு வந்தவை தீர்ந்து போனால் பின் நாங்கள் என்ன செய்வோம்?" என்று கேட்டான்.

⁴ அதற்கு யூதித் அவனைப் பார்த்து, "என் தலைவ, உமது உயிர்மேல் ஆணை! நான் கொண்டு வந்துள்ளது தீருமுன்பே நான் எண்ணியுள்ளதைக் கடவுள் செய்து முடிப்பார்" என்று ஆணையிட்டாள். பிறகு படைத்தலைவனின் ஊழியர்கள் அவன் சொல்லியிருந்த கூடாரத்திற்குள் அவளை அழைத்துக் கொண்டு போயினர்.

⁵ அதனுள் நுழையும் போது யூதித் மீண்டும் படைத் தலைவனை நோக்கி, "நான் இரவிலும் பொழுது புலர்வதற்கு முன்னரும் கடவுளிடம் செபிப்பதற்காக வெளியே செல்ல அனுமதி கொடும்" என்று கேட்டாள்.

⁶ அதற்கு ஒலொபெர்னெஸ் தன் வாயிற்காவலரை நோக்கி, "மூன்று நாள் வரை இந்தப் பெண் தன் விருப்பம் போல் கடவுளை மன்றாடுவதற்குப் போகவர அனுமதி கொடுக்கிறேன்" என்றான்.

⁷ யூதித்தோ இரவு தோறும் வெளியே சென்று பெத்தூலியாவின் பள்ளத்தாக்கில் இருந்த நீருற்றில் குளிப்பாள்.

⁸ பிறகு எழுந்து இஸ்ராயேலின் கடவுளான ஆண்டவரை நோக்கி, ஆண்டவரே, உம் மக்களுக்கு விடுதலை அளிக்குமாறு எனக்கு நீர் வழிகாட்ட வேண்டும் என்று மன்றாடுவாள்.

⁹ பின்னர் கூடாரத்திற்குத் திரும்பி வந்து, மாலை நேரத்தில் தான் உணவு கொள்ளும் வரையிலும் தூய்மையாக இருப்பாள்.

¹⁰ நான்காம் நாள் ஒலொபெர்னெஸ் தன் ஊழியர்களுக்கு இரவு விருந்து செய்தான். அப்பொழுது வாகாவோ என்னும் தன் அண்ணகனை நோக்கி, அந்த எபிரேய மாதை நீ போய்ப் பார். அவள் என்னோடு விரும்பி உணவு கொள்ள வேண்டும் என்று அவளுக்குப் புத்தி சொல்.

¹¹ ஏனெனில் ஒரு பெண் ஆடவனோடு சேராததால் அவனைப் பரிகசிப்பது, அசீரியரிடையே இழிசெயலாகக் கருதப்படுகிறது அன்றோ?" என்றான்.

¹² பிறகு வாகாவோ யூதித்திடம் சென்று அவளை நோக்கி, நல்ல பெண்மணியாகிய நீ என் தலைவரிடம் வந்து அவர் முன்னிலையில் மரியாதை பெறவும், அவரோடு உணவு கொள்ளவும், மது அருந்தி மகிழ்ந்திருக்கவும் அஞ்ச வேண்டாம் என்றான்.

¹³ யூதித் அவனுக்கு மறுமொழியாக. என் தலைவர் சொல்லைத் தட்ட நான் யார்?

¹⁴ அவருக்கு நல்லதும் மேன்மையானதுமாகத் தோன்றுவதை எல்லாம் நான் செய்யத் தயார்.அவருக்கு விருப்பமானதை எல்லாம் என் வாழ்நாள் முழுவதும் நான் மேன்மை வாய்ந்ததாகக் கருதுவேன் என்று சொன்னாள்.

¹⁵ பின் எழுந்து தன்னை அழகுபடுத்திக் கொண்டு கூடாரத்தினுள் புகுந்து படைத்தலைவன் முன் நின்றாள்.

¹⁶ அவளைக் கண்டதும் ஒலொபெர்னெசின் இதயம் மகிழ்ச்சியால் நிறைந்தது. ஏனெனில் அவள் மேல் அவன் மோகவெறி கொண்டிருந்தான்.

¹⁷ அவளை நோக்கி, என் அன்புக்கு உகந்த நீ உட்கார்ந்து மது அருந்திச் சிரித்து மகிழக் கடவாய் என்றான்.

¹⁸ இன்று போல் என் வாழ்நாளில் என்றுமே நான் மகிழ்வுற்றது கிடையாது@ எனவே குடிப்பேன் என் தலைவ! என்று சொல்லி,

¹⁹ யூதித் தன் பணிப் பெண் தனக்காகத் தயாரித்து வைத்திருந்தவற்றை எடுத்து அவன் முன்பாக உண்டு குடிக்கத் தொடங்கினாள்.

²⁰ ஒலொபெர்னெசும் அவள் மட்டில் மிகவும் அக்களித்து மதுவை மிதமிஞ்சிக் குடித்தான். அன்று போல் அவன் என்றுமே குடித்ததில்லை.