யூதித் ஆகமம் - பழைய ஏற்பாடு

¹ இவ்வாறு ஆண்டவரை வேண்டிக்கொண்ட பின், அவள் ஆண்டவருக்கு முன்பாக நெடுங்கிடையாய்க் கிடந்த இடத்திலிருந்து எழுந்தாள்.

² தன் பணிப் பெண்னை அழைத்துக் கொண்டு வீட்டினுள் சென்று மயிராடையையும் கைம்பெண்ணுக்குரிய தன் ஆடையையும் களைந்தாள்.

³ நீராடிய பின், விலையுயர்ந்த நறுமண எண்ணெய் பூசி, சீவி முடித்து, தலைப்பட்டை அணிந்து கொண்டாள். மகிழ்ச்சிக்குரிய ஆடைகளை உடுத்திக் காலணியோடு கடகம், அட்டிகை, குண்டலம், மோதிரம் முதலிய தன் எல்லா அணிகலன்களாலும் தன்னை அழகுப்படுத்திக் கொண்டாள்.

⁴ ஆண்டவர் அவளுக்கு இன்னும் அதிக அழகைக் கொடுத்தார். ஏனென்றால், இவ்வலங்காரமெல்லாம் சிற்றின்பத்தின் பொருட்டு அன்று, நல்லதொரு காரியத்தின் பொருட்டே. எனவே. அவள் நிகரற்ற வடிவழகு பூண்டவளாய் யாவர் கண்ணுக்கும் தோன்றும்படி ஆண்டவர் அவளை இத்தகைய அழகுடன் விளங்கச் செய்தார்.

⁵ யூதித் இரசக் குப்பி, எண்ணெய்ச் சிமிழ், வறுத்த தானியம், அத்திப்பழ வற்றல், அப்பம், பாற்கட்டி, , முதலியவற்றைத் தன் பணிப் பெண் கையில் கொடுத்தாள். பின் அவளோடு வெளியே புறப்பட்டுச் சென்றாள்.

⁶ அவ்விருவரும் நகர வாயிலை அடைந்தனர். அங்கே ஓசியாசும் நகரப் பெரியோர்களும் தங்களை எதிர்ப்பார்த்து நிற்கக் கண்டனர். அவர்கள் யூதித்தைக் கண்டு, அவளது பேரழகை நோக்கிப் பெரு வியப்புற்றனர்.

⁷ ஆயினும் அவளிடம் எதுவும் கேட்கவில்லை.

⁸ யெருசலேம் உன்னால் மகிமை பெறும் பொருட்டும், உன் பெயர் நீதிமான்கள், புனிதர்கள் முதலியோரின் வரிசையில் இடம் பெறும் பொருட்டும், நம் முன்னோரின் கடவுள் உனக்கு அருள் புரிந்து, உன் இதயச் சிந்தனைகளைத் தமது வலிமையால் உறுதிப்படுத்துவாராக" என்று கூறி விடை கொடுத்தனர்.

⁹ அங்கு இருந்தோர் அனைவரும், "அங்ஙனமே ஆகுக, ஆகுக!" என ஒருவாய்ப்பட மொழிந்தனர்.

¹⁰ யூதித்தோ ஆண்டவரை நோக்கி வேண்டுதல் புரிந்த வண்ணமாய்த் தன் பணிப் பெண்ணோடு நகர வாயிலைத் தாண்டிச் சென்றாள்.

¹¹ பொழுது புலரும் வேளையில் அவள் மலையினின்று இறங்கி வந்தாள். அப்பொழுது அசீரியரினின் ஒற்றர்கள் அவளுக்கு எதிரே ஓடிவந்து, அவளைப் பிடித்து, "நீ எங்கிருந்து வருகிறாய்? எங்கேப் போகிறாய்? என வினவினர்.

¹² அவள் மறுமொழியாக, "நான் எபிரேயப் பெண். நான் அவர்களை விட்டு ஓடிவந்து விட்டேன். காரணம், அவர்கள் உங்களை இழிவாக எண்ணி உங்கள் இரக்கத்தை அடையும் பொருட்டு உங்களிடம் சரணடையத் தாமே முன் வராததால் அவர்கள் உங்களுக்கு இரையாவர் என்று எனக்குத் தெரியும்.

¹³ ஆதலால், நான் எனக்குள்ளே சிந்தித்து, படைத்தலைவர் ஒலொபெர்னெஸ் முன்பாக நானே போய் எபிரேயருடைய இரகசியங்களை அவருக்கு வெளிப்படுத்தி, தம் படைவீரர்களுக்கு யாதொரு சேதமுமின்றி நகரைப் பிடித்துக் கொள்வதற்கான வழியைப் பற்றி அவருக்குத் தெரிவிக்க வந்துள்ளேன்" என்றாள்.

¹⁴ அந்த மனிதர்கள் அவள் சொன்னதைக் கேட்டு, அவள் முகத்தை உற்று நோக்கினர். அப்பொழுது யூதித்தின் ஒப்பில்லா வடிவழகைக் காண அவர்களுக்குக் கண் கூச்சமும் பெருவியப்பும் உண்டாயின.

¹⁵ பிறகு அவர்கள் யூதித்தை நோக்கி, "எங்கள் தலைவரிடம் வந்து பேசுமாறு நீ முடிவு செய்தது நல்ல காரியமே. அதனால் உன் உயிரைக் காப்பாற்றிக் கொண்டாய்.

¹⁶ நீ அவர் முன் நிற்கும் போது அஞ்ச வேண்டாம். ஏனெனில், அவர் உனக்கு நன்மை செய்வார்@ உன் மேல் மிக அன்பாய் இருப்பார் என்பது உறுதி" என்று சொல்லினர். ஒலொபெர்னெசிடம் அவளைப் பற்றி அறிவித்த பின் அவளை அவனுடைய பாசறைக்கு அழைத்துச் சென்றனர்.

¹⁷ தன் முன் வந்து நின்ற அவளைக் கண்டவுடனே ஒலொபெர்னெசின் கண்கள் மயக்கம் கொண்டன.

¹⁸ அவனுடைய அலுவலர் அவனை நோக்கி, "இவ்வளவு அழகிய பெண்கள் எபிரேயருக்குள் இருக்க, அவர்களை இழிவாய் எண்ணுவதைக் காட்டிலும், அவர்களுடைய பெண்களின் பொருட்டேனும் அவர்களோடு போர் புரிவதே நலம் என்றனர்.

¹⁹ அப்பொழுது கருஞ்சிவப்புப் பட்டால் அமைக்கப்பட்டுப் பொன், மரகதம் முதலிய விலையுயர்ந்த இரத்தினங்களால் அலங்கரிக்கப்பட்ட ஒரு பாலிகையின் கீழ் ஒலொபெர்னெஸ் அமர்ந்திருந்தான்.

²⁰ அவனைக் கண்ட யூதித் தரையில் நெடுங்கிடையாய் விழுந்து பணிந்து அவனை வணங்கிளாள். ஒலொபெர்னெஸ் தன் அண்டையில் நின்ற பணியாளர்களுக்கு உத்தரவிட, அவர்கள் யூதித்தைத் தூக்கி நிறுத்தினர்.