குறுந்தொகை - 95. குறிஞ்சி - தலைவன் கூற்று

மால்வரை இழிதருந் தூவெள் அருவி கல்முகைத் ததும்பும் பன்மலர்ச் சாரல் சிறுகுடிக் குறவன் பெருந்தோட் குறுமகள் நீரோ ரன்ன சாயல் தீயோ ரன்னவென் உரனவித் தன்றே.	5
- கபிலர்.

தோழி! பெரிய மலையினிடத்து வீழும் அருவி பாறைகளின் வெடிப்புக்களில் ஒலிக்கும் பலமலரையுடைய சாரலில் உள்ள சிற்றூரிலுள்ள குறவனுடைய பெரிய தோளையுடைய சிறிய மகளினது நீரைப் போன்ற மென்மை தீயை ஒத்த என் வலியைக் கெடச் செய்தது.

முடிபு: குறுமகளது சாயல் என் உரனை அவித்தன்று.     

கருத்து: நான் ஒரு மலைவாணர் மகளைக் காமுற்றேன்.