குறுந்தொகை - 86. குறிஞ்சி - தலைவி கூற்று
(தலைவனது பிரிவைத் தலைவி ஆற்றாளெனக் கவலை உற்ற தோழியை நோக்கி, “தலைவர் என்னோடு இருந்து இன்புறுதற்கு உரிய பொழுதாகிய இக்கூதிர் யாமத்திலே தனிமைத்துன்பத்தை மிகுதிப்படுத்தும் ஆன்மணிக்குரலைக் கேட்பார் வேறு யாருளர்? நான் ஒருத்தியேயன்றோ?” என்று தலைவி கூறியது.)
| சிறைபனி உடைந்த சேயரி மழைக்கண் பொறையரு நோயொடு புலம்பலைக் கலங்கிப் பிறருங் கேட்குநர் உளர்கொல் உறைசிறந்து ஊதை தூற்றம் கூதிர் யாமத்து ஆனுளம் புலம்புதொ றுளம்பும் |
5 |
| நாநவில் கொடுமணி நல்கூர் குரலே. | |
| - வெண்கொற்றனார். |
தோழி! மழைத்துளி மிக்கு வாடைக்காற்று வீசித் தூவுகின்ற கூதிர்ப் பருவத்தின் நள்ளிரவில் எருதானது ஈ ஒலிக்குந்தோறும் அலைகின்ற நாவினால் முழங்குகின்ற கொடிய மணியின் மெல்லிய ஓசையை தடுக்கப்பட்ட நீர் உடைந்து துளித் துளியாக விழுகின்ற செம்மையான அரிகளையும் குளிர்ச்சியையுமுடைய கண்ணோடும் பொறுத்தற்கரிய காமநோயோடும் தனிமை வருத்துதலாற் கலங்கி கேட்டு வருந்துவார் என்னையன்றிப் பிறமகளிரும் உள்ளாரோ?
முடிபு: கூதிர்யாமத்து ஆன் உளம்பும் மணியின் குரலைக் கேட்குநர் பிறகும் உளர் கொல்?
கருத்து: தலைவர் உடனிருத்தற்குரிய இப்பருவத்தில் யானொருத் தியே தனிமைத் துன்பத்தை உடையேன் ஆயினேன்.
தேடல் தொடர்பான தகவல்கள்:
குறுந்தொகை - 86. குறிஞ்சி - தலைவி கூற்று, தலைவி, இலக்கியங்கள், குறிஞ்சி, குறுந்தொகை, கூற்று, மணியின், கேட்குநர், எட்டுத்தொகை, சங்க