குறுந்தொகை - 85. மருதம் - தோழி கூற்று
(தலைவனுக்குத் தூதாக வந்த பாணன், “ தலைவன் மிக்க அன்புடையன்” என்று பாராட்டியபொழுது தோழி, “இவன் சொல்லத்தான் அவரதன்பு புலப்படுகின்றது. மற்று அவர் செயலால் அறிந்திலம்” என்று கூறி வாயில் மறுத்தது.)
| யாரினும் இனியன் பேரன் பினனே உள்ளூர்க் குரீஇத் துள்ளுநடைச் சேவல் சூன்முதிர் பேடைக் கீனி லிழைஇயர் தேம்பொதிக் கொண்ட தீங்கழைக் கரும்பின் நாறா வெண்பூக் கொழுதும் |
5 |
| யாண ரூரன் பாணன் வாயே. | |
| - வடம வண்ணக்கன் தாமோதரனார். |
ஊரினுள் இருக்கும் குருவியின் துள்ளிய நடையை யுடைய ஆண்பறவையானது கருப்பம் முதிர்ந்த பெண் குருவிக்கு பொறை யுயிர்த்தற்குரிய இடத்தை அமைக்கும் பொருட்டு தேன் பொதிதலைக் கொண்ட இனிய கோலை உடைய கரும்பினது மணம் வீசாத வெள்ளிய பூவை கோதியெடுக்கும் புதுவருவாயை உடைய ஊருக்குத் தலைவன் பாணனது சொல்லின் அளவில் எல்லாரினும் இனிமையை உடையான்; தலைவியின்பாற் பெரிய அன்பினை உடையான்; உண்மையில் அங்ஙனம் இலன்.
முடிபு: ஊரன், பாணன் வாயே இனியன்; பேரன்பினன்.
கருத்து: பாணன் தலைவனைப் புகழினும் தலைவன் அன்பிலன்.
தேடல் தொடர்பான தகவல்கள்:
குறுந்தொகை - 85. மருதம் - தோழி கூற்று, பாணன், இலக்கியங்கள், தோழி, கூற்று, குறுந்தொகை, மருதம், தலைவன், உடைய, உடையான், வாயே, கொண்ட, எட்டுத்தொகை, இனியன், சங்க