குறுந்தொகை - 75. மருதம் - தலைவி கூற்று
(தலைவனது வரவைப் பாணனால் அறிந்த தலைவி, "நீ பாடலிபுத்திர நகரைப் பெறுவாயாக" என்று வாழ்த்தியது.)
| நீகண் டனையோ கண்டார்க் கேட்டனையோ ஒன்று தெளிய நசையினம் மொழிமோ வெண்கோட் டியானை சோணை படியும் பொன்மலி பாடலி பெறீஇயர் யார்வாய்க் கேட்டனை காதலர் வரவே. |
5 |
| - படுமரத்து மோசிகீரனார். |
பாண! தலைவரது வரவை நீயே நின்கண்ணாற் கண்டாயோ? அன்றித் தலைவனைக் கண்டாரைக் கேட்டறிந்தாயோ? அங்ஙனம் பிறர்பால் கேட்டனையாயின் உண்மையாகிய ஒன்றை அறிய விரும்பினேம்; ஆதலின் சொல் வாயாக; சொன்னால் வெள்ளிய கொம்பையுடைய யானைகள் சோணையாற்றில் துளைந்து விளையாடும் பொன் மிக்க பாடலிபுத்திர நகரத்தை பெறு வாயாக.
முடிபு: காதலர் வரவை நீ கண்டனையோ? கேட்டனையோ? யார்வாய்க் கேட்டனை? நசையினம்; மொழிமோ; பாடலி பெறீஇயர்!
கருத்து: தலைவர் வரவை உரைத்த நினக்குச் செல்வம் பெருகுவதாகுக,
தேடல் தொடர்பான தகவல்கள்:
குறுந்தொகை - 75. மருதம் - தலைவி கூற்று, இலக்கியங்கள், தலைவி, மருதம், வரவை, குறுந்தொகை, கூற்று, கேட்டனை, யார்வாய்க், காதலர், பெறீஇயர், வாயாக, கேட்டனையோ, சங்க, எட்டுத்தொகை, பாடலிபுத்திர, நசையினம், மொழிமோ, பாடலி