குறுந்தொகை - 72. குறிஞ்சி - தலைவன் கூற்று

பூவொத் தலமருந் தகைய ஏவொத்து எல்லாரும் அறிய நோய்செய் தனவே தேமொழித் திரண்ட மென்தோள் மாமலைப் பரீஇ வித்திய ஏனற் குரீஇ ஓப்புவாள் பெருமழைக் கண்ணே.	5
- மள்ளனார்.

இனிய மொழியினையும் பருத்த மெல்லிய தோளினையும் உடைய பருத்தியை இடையிலே விதைத்த தினைமுதிர்ந்த புனத்தின்கண் அத்தினையை உண்ணவரும் குருவியினங்களை ஓட்டு கின்றவளது பெரிய குளிர்ச்சியையுடைய கண்கள் பூவினை அழகில் ஒத்துச் சுழலுந் தன்மையை யுடையன; ஆயினும் கொடிய தொழிலால் அம்பினை ஒத்து நின்னைப் போன்ற யாவரும் என்னுடைய வேறுபாட்டை அறியும்படி எனக்குத் துன்பத்தை உண்டாக்கின.

முடிபு: குரீஇ ஓப்புவாள் கண் நோய் செய்தன.    

கருத்து: நான் ஒரு மலைவாணர் மகள்பால் நட்பு பூண்டு காமநோய் உற்றேன்.