குறுந்தொகை - 71. பாலை - தலைவன் கூற்று

மருந்தெனின் மருந்தே வைப்பெனின் வைப்பே அரும்பிய சுணங்கின் அம்பகட் டிளமுலைப் பெருந்தோள் நுணுகிய நுசுப்பிற் கல்கெழு கானவர் நல்குறு மகளே.
- கருவூர் ஓதஞானியார்.

நெஞ்சே! தோற்றிய தேமலையுடைய அழகிய பெருமையையுடைய இளைய நகிலையும் பெரிய தோளையும் நுண்ணிதாகிய இடையையும் உடைய கற்கள் பொருந்திய காட்டையுடையவர் பெற்ற மகள் காமநோய்க்குப் பரிகாரம் வேண்டுமென்று கருதுங்கால் எனக்குப் பரிகாரமாவாள்; போகம் நுகரச் செல்வம் வேண்டுமென்று கருதின் எனக்குச் செல்வமுமாவாள்.

முடிபு: மகள், மருந்தெனின் மருந்து; வைப்பெனின் வைப்பு.    

கருத்து: இவளைப் பிரிந்து பெறும் செல்வம் வேறொன்று இல்லை.