குறுந்தொகை - 66. முல்லை - தோழி கூற்று
(கார்காலம் வந்தபின்பும் தலைவன் வாராமையால் வருந்திய தலைவியை நோக்கி, "இப்போது பெய்யும் மழை பருவமல்லாத காலத்துப் பெய்வது; இதைக் கார்காலத்துக்குரியதென்று மயங்கிக் கொன்றை மரங்கள் மலர்ந்தன. ஆதலின் இது கார்ப்பருவமென்று நீ வருந்தற்க" என்று தோழி கூறியது.)
| மடவ மன்ற தடவுநிலைக் கொன்றை கல்பிறங் கத்தஞ் சென்றோர் கூறிய பருவம் வாரா அளவை நெரிதரக் கொம்புசேர் கொடியிணர் ஊழ்த்த வம்ப மாரியைக் காரென மதித்தே. |
5 |
| - கோவர்த்தனார். |
கற்கள் விளங்கும் பாலைநிலத்து அருவழியைக் கடந்து சென்ற தலைவர் மீண்டு வருவேனென்று சுட்டிக் கூறிய கார்ப்பருவம் வாராத காலத்திலே பருவமல்லாத காலத்துப் பெய்யும் மழையை கார் காலத்து மழையென்று கருதி நெருங்கும்படி சிறு கொம்புகளிற் சேர்ந்த ஒழுங்காகிய பூங்கொத்துக்களைப் புறப்பட விட்டன; ஆதலின் பரந்த அடியையுடைய கொன்றை மரங்கள் நிச்சயமாக பேதைமையையுடைய.
முடிபு: பருவம் வாரா அளவை வம்பமாரியைக் காரென மதித்து இணர் ஊழ்த்த; அதனாற் கொன்றை மடவ.
கருத்து: இது கார்ப்பருவம் அன்று; ஆதலின் நீ வருந்தற்க.
தேடல் தொடர்பான தகவல்கள்:
குறுந்தொகை - 66. முல்லை - தோழி கூற்று, இலக்கியங்கள், கொன்றை, தோழி, கூற்று, முல்லை, ஆதலின், குறுந்தொகை, பருவம், வாரா, ஊழ்த்த, கார்ப்பருவம், காரென, கூறிய, அளவை, மரங்கள், சங்க, எட்டுத்தொகை, பெய்யும், பருவமல்லாத, காலத்துப், வருந்தற்க