குறுந்தொகை - 399. மருதம் - தலைவி கூற்று
(வரைவு நீட்டித்த காலத்துத் தலைவி தோழியை நோக்கி, “தலைவர் உடனுறையின் நீங்கியும் பிரியின் ஒன்றியும் நிற்கின்றது பசலை” என்றுகூறியது.)
| ஊருண் கேணி யுண்டுறைக் தொக்க பாசி யற்றே பசலை காதலர் தொடுவுழித் தொடுவுழி நீங்கி விடுவுழி விடுவுழிப் பரத்த லானே. |
|
| - பரணர். |
தோழி! பசலையானது தலைவர் நம்மைத் தீண்டுந்தோறும் நம் உடலை விட்டு அகன்று பிரியுந்தோறும் பரவுதலால் ஊரினரால் உண்ணப்படும் நீரையுடையகிணற்றின் உண்ணுந் துறையினிடத்தே கூடிய பாசியைப் போன்றது.
முடிபு: பசலை, நீங்கிப் பரத்தலான் பாசியற்று.
கருத்து: பசலைநோய் மிக்கமையால் யான் வருந்துவேனாயினேன்.
தேடல் தொடர்பான தகவல்கள்:
குறுந்தொகை - 399. மருதம் - தலைவி கூற்று, இலக்கியங்கள், தலைவி, மருதம், குறுந்தொகை, கூற்று, பசலை, சங்க, எட்டுத்தொகை