குறுந்தொகை - 37. பாலை - தோழி கூற்று
(தலைவனது பிரிவை ஆற்றாத தலைவியை நோக்கி, ‘‘தலைவர் மிக்க அன்புடையர்; அவர் சென்ற பாலைநிலத்தில் களிறு தன் பிடியை அன்போடு பாதுகாத்து நிற்கும் காட்சியைக் கண்டு நின்னைப் பாதுகாக்கும் தம் கடமையை யெண்ணி விரைவில் மீள்வர்’’ என்று கூறித் தோழி ஆற்றுவித்தது.)
| நசைபெரி துடையர் நல்கலு நல்குவர் பிடிபசி களைஇய பெருங்கை வேழம் மென்சினை யாஅம் பொளிக்கும் அன்பின தோழியவர் சென்ற வாறே. |
|
| - பாலைபாடிய பெருங்கடுங்கோ. |
தோழி! தலைவர் நின்பால் விருப்பம் மிக உடையவர்; நல்குதலையும் செய்வர்; அவர் போன வழிகள் பெண்யானையினது பசியை நீக்கும்பொருட்டு பெரிய துதிக்கையையுடைய ஆண்யானை மெல்லிய கிளைகளை உடைய யாமரத்தின் பட்டையை உரித்து அதன் நீரை அப்பிடி பருகச் செய்யும் அன்பைப் புலப்படுத்தற்கு இடமாக உள்ளன.
முடிபு: நசை பெரிதுடையர்; நல்குவர்; அவர் சென்ற ஆறு அன்பின.
கருத்து: தலைவர் விரைவில் மீண்டு வருவர்.
தேடல் தொடர்பான தகவல்கள்:
குறுந்தொகை - 37. பாலை - தோழி கூற்று, தோழி, இலக்கியங்கள், கூற்று, சென்ற, பாலை, அவர், குறுந்தொகை, அன்பின, தலைவர், நல்குவர், விரைவில், எட்டுத்தொகை, சங்க