குறுந்தொகை - 36. குறிஞ்சி - தலைவி கூற்று

துறுக லயலது மாணை மாக்கொடி துஞ்சுகளி றிவரும் குன்ற நாடன் நெஞ்சுகள னாக நீயலென் யானென நற்றோள் மணந்த ஞான்றை மற்றவன் தாவா வஞ்சின முரைத்தது	5
நோயோ தோழி நின்வயி னானே.
- பரணர்.

தோழி! உருண்டைக் கல்லின் அயலில் உள்ளதாகிய மாணை என்னும் பெரிய கொடியானது தூங்குகின்ற களிற்றின்மேல் படரும் குன்றங்களை உடைய நாட்டிற்குத் தலைவன் யான்! நின் நெஞ்சு இடமாக இருந்து பிரியே என்று எனது நல்ல தோளை அணைந்த பொழுது அத்தலைவன் கெடாத உறுதிமொழியைக் கூறியது நின் திறத்தில் வருத்தத்திற்குக் காரணமாகுமோ? ஆகாதன்றே.

முடிபு: தோழி, நாடன் மணந்த ஞான்றை அவன் வஞ்சினம் உரைத்தது நின்வயின் நோயோ?    

கருத்து: தோழி, தலைவன் வஞ்சினத்தை உரைத்து மறந்திருத்தல் எனக்குத் துன்பம் தருவது; அதனை நானே பொறுத்து ஆற்றியிருப்ப உனக்கு வருத்தம் உண்டாதற்குக் காரணமில்லை.