குறுந்தொகை - 316. நெய்தல் - தலைவி கூற்று

ஆய்வளை ஞெகிழவு மயர்வுமெய் நிறுப்பவும் நோய்மலி வருத்தம் அன்னை யறியின் உளெனோ வாழி தோழி விளியா துரவுக்கடல் பொருத விரவுமண லடைகரை ஓரை மகளி ரோராங் காட்ட	5
வாய்ந்த லவன் துன்புறு துனைபரி ஓங்குவரல் விரிதிரை களையும் துறைவன் கொல்லோ பிறவா யினவே.
- தும்பிசேர் கீரனார்.

தோழி! கெடாமல் வலியையுடைய கடலால் அலைக்கப்பட்ட மணல் விராவிய அடைகரையினிடத்து விளையாட்டையுடைய பெண்கள் ஒரு தன்மையாக அலைக்க மெலிந்த நண்டினது வருத்தம் மிக்க விரைந்த செலவை உயர்ந்து வருதலையுடைய விரிந்த அலைஅந்நண்டைக் கொண்டு சென்று நீக்குகின்ற துறையையுடைய தலைவன் சொல்! வேறுபாடுடையனவாயின; அழகியவளைகள் நெகிழ்ந்து போகவும் அயர்வினை மெய்யின்கண்ணே நிலைக்கச் செய்யவும் துன்பமிக்க எனது வருத்தத்தை தாய் அறிவாளாயின் இனி மேலும் உயிரோடு இருப்பேனாவேனோ?

முடிபு: தோழி, துறைவன் சொல் பிற ஆயின; வருத்தம் அன்னைஅறியின் உளெனோ?     

கருத்து: தலைவன் வாராமையால் துன்புற்ற என் நிலையைத் தாய்அறியின் யான் உயிர் நீப்பேன்.