குறுந்தொகை - 295. மருதம் - தோழி கூற்று
(பரத்தையிற் பிரிந்துவந்த தலைவன் தோழியை வாயில் வேண்டியபொழுது அவள், “நீ பரத்தையரோடிருந்தமை தோன்ற வந்தாய்; நின்வளத்திற்குக் காரணமான தலைவியை நீத்து உறைந்தாய்” என்று கூறியது.)
| உடுத்துந் தொடுத்தும் பூண்டுஞ் செரீஇயும் தழையணிப் பொலிந்த ஆயமொடு துவன்றி விழவொடு வருதி நீயே யிதோ ஓரான் வல்சிச் சீரில் வாழ்க்கை பெருநலக் குறுமகள் வந்தென |
5 |
| இனிவிழ வாயிற் றென்னுமிவ் வூரே. | |
| - தூங்கலோரியார். |
உடையாக உடுத்துக் கொண்டும் மாலையாகத் தொடுத்தணிந்தும் குழை முதலிய அணிகலன்களாக அணிந்தும் கூந்தலின் கண்ணே செருகியும் தழையலங்காரத்தினாற் பொலிவு பெற்றபரத்தையர் கூட்டத்தோடு நெருங்கி நீ நீர்விழாவிற்குரிய அடையாளங்களோடு வாராநின்றாய்; இந்த ஊரிலுள்ளார் ஒரு பசுவினால் வரும் ஊதியத்தைக்கொண்டு உண்ணும் உணவையுடைய செல்வச் சிறப்பில்லாதஇல்வாழ்க்கை மிக்கஅழகையுடைய இளைய தலைவி இவனுக்கு வாழ்க்கைப்பட்டுப் புக்கனளாக இப்பொழுது விழாவை யுடையதாயிற்று என்று சொல்வர்.
முடிபு: துவன்றி நீ வருதி; இவ்வூர், ‘ஒரான் வல்சி வாழ்க்கை,குறுமகள் வந்தென விழவாயிற்று’ என்னும்.
கருத்து: நின் செல்வத்துக்குக் காரணமாகிய தலைவியைநீத்துறைந்தமையால் ஊரினர் பழி கூறினர்.
தேடல் தொடர்பான தகவல்கள்:
குறுந்தொகை - 295. மருதம் - தோழி கூற்று, இலக்கியங்கள், மருதம், குறுந்தொகை, தோழி, கூற்று, குறுமகள், வந்தென, வாழ்க்கை, சங்க, எட்டுத்தொகை, துவன்றி, வருதி