குறுந்தொகை - 18. குறிஞ்சி - தோழி கூற்று

வேரல் வேலி வேர்க்கோட் பலவின் சாரல் நாட செவ்வியை ஆகுமதி யார தறிந்திசி னோரே சாரல் சிறுகோட்டுப் பெரும்பழந் தூங்கி யாங்கிவள் உயிர்தவச் சிறிது காமமோ பெரிதே.	5
- கபிலர்.

சிறு மூங்கிலாகிய வாழ் வேலியை உடைய வேரிலே பழக்குலைகளை உடைய பலா மரங்கள் செறிந்த பக்கத்தை உடைய மலை நாடனே பக்க மலையில் பலாமரத்தின் சிறிய கொம்பில் பெரிய பழம் தொங்கியது போல இத்தலைவியினது உயிரானது மிகச் சிறுமையை உடையது; காமநோய் மிகப் பெரிது; அந்நிலையை அறிந்தவர் யார்? ஒருவரும் இல்லை; அவளை வரைந்து கொள்ளும் பருவத்தை உடையை ஆகுக.

முடிபு: நாட, இவள் உயிர் தவச் சிறிது; காமம் தவப் பெரிது; அஃது அறிந்திசினோர் யார்? செவ்வியை ஆகுமதி.    

கருத்து: தலைவியை நீ விரைவில் மணம் புரிந்து கொள்ள வேண்டும்.