குறுந்தொகை - 163. நெய்தல் - தலைவி கூற்று

யாரணங் குற்றனை கடலே பூழியர் சிறுதலை வெள்ளைத் தோடுபரந் தன்ன மீனார் குருகின் கானலம் பெருந்துறை வெள்வீத் தாழை திரையலை நள்ளென் கங்குலுங் கேட்குநின் குரலே.	5
- அம்மூவனார்.

கடலே! பூழி நாட்டாரது சிறிய தலையையுடைய வெள்ளாட்டின் தொகுதி பரவினாற்போன்ற மீனை உண்ணும் கொக்குகளையுடைய சோலை சூழ்ந்த பெரிய துறையினிடத்து வெள்ளிய பூவையுடைய தாழையை அலைகள் அலைக்கின்ற நடு இரவிலும் நினது ஆரவாரம் செவிப்படும்; நீ யாரால் வருத்த மடைந்தாய்?

முடிபு: கடலே, கங்குலும் நின்குரல் கேட்கும்; யார் அணங்குற்றனை?    

கருத்து: கடலே, நீ யார் பிரிவுபற்றி வருந்துகின்றாய்?