குறுந்தொகை - 155. முல்லை - தலைவி கூற்று

முதைப்புனங் கொன்ற ஆர்கலி உழவர் விதைக்குறு வட்டி போதொடு பொதுளப் பொழுதோ தான்வந் தன்றே மெழுகான் றூதுலைப் பெய்த பகுவாய்த் தெண்மணி மரம்பயில் இறும்பி னார்ப்பச் சுரனிழிபு	5
மாலை நனிவிருந் தயர்மார் தேர்வரும் என்னும் உரைவா ராதே.
- உரோடகத்துக் காரத்தனார்.

பழங்கொல்லையை உழுத மிக்க ஆரவாரத்தையுடைய உழவர்களுடைய காலையிலே விதைக்கும் பொருட்டு விதையை எடுத்துச் சென்ற சிறிய வட்டிகள் விதைத்து விட்டு வீட்டிற்கு மீளும் பொழுது மலர்கள் நிறையும்படி மாலைப் பொழுது வந்தது அரக்காற் செய்த கருவில் அமைத்து ஊதுகின்ற கொல்லனுலையின்கண் பெய்து இயற்றிய பிளவுபட்ட வாயையுடைய தெளிந்த ஓசையையுடைய மணிகள் மரங்கள் நெருங்கி வளர்ந்த குறுங்காட்டிடத்து ஒலிக்கும்படி அருவழியைக் கடந்து மாலைக் காலத்தில் மிக விருந்து நுகரும் பொருட்டு வரும் தலைவருடைய தேர் வருகின்ற தென்று கூறும் உரை வந்திலது.

முடிபு: பொழுதோ வந்தன்று; விருந்தயர்மார் தேர் வருமென்னும் உரை வாராது.    

கருத்து: மாலைக் காலம் வரவும் தலைவர் வந்திலர்.