குறுந்தொகை - 142. குறிஞ்சி - தலைவன் கூற்று
(தலைவியைப் பால் வயத்தனாகிக் கண்டு அளவளாவி நீங்குந் தலைவன், “என் உள்ளம் தலைவியினிடத்தே உள்ளது; இதனை அவள் அறிந்தனளோ, இலளோ!” எனக் கூறியது.)
| சுனைப்பூக் குற்றுத் தொடலை தைஇப் புனக்கிளி கடியும் பூங்கட் பேதை தானறிந் தனளோ இலளோ பானாட் பள்ளி யானையி னுயிர்த்தென் உள்ளம் பின்னுந் தன்னுழை யதுவே. |
5 |
| - கபிலர். |
நடு யாமத்துப் படுத்துத் துயிலுதலையுடைய யானையைப் போலப் பெருமூச்சு விட்டுக்கொண்டு எனது நெஞ்சம் நான் தலைவியைப் பிரிந்து வந்த பின்னரும் அவளிடத்திலே இருக்கின்றது; சுனையில் மலர்ந்த மலர்களைப் பறித்து மாலையைக் கட்டி தினைப் புனத்திற் கதிரை உண்ணும் பொருட்டு வீழும் கிளிகளை ஓட்டுகின்ற பூவைப் போன்ற கண்ணையுடைய பேதையாகிய அத்தலைவி இதனை அறிந்தாளோ இல்லையோ!
முடிபு: என் உள்ளம் தன்னுழையது; பேதை அறிந்தனளோ! இலளோ!
கருத்து: என் உள்ளம் தலைவியின்பால் உள்ளது.
தேடல் தொடர்பான தகவல்கள்:
குறுந்தொகை - 142. குறிஞ்சி - தலைவன் கூற்று, உள்ளம், இலக்கியங்கள், தலைவன், கூற்று, குறிஞ்சி, இலளோ, குறுந்தொகை, அறிந்தனளோ, பேதை, இதனை, தலைவியைப், எட்டுத்தொகை, சங்க, உள்ளது