குறுந்தொகை - 119. குறிஞ்சி - தலைவன் கூற்று
(இயற்கைப் புணர்ச்சி புணர்ந்து மீண்ட தலைமகனது வேறுபாடு கண்ட பாங்கன், “நினக்கு இஃது எற்றினான் ஆயிற்று?” என்றவழி, “ஓர் இளைய மகளால் ஆயிற்று” என்று தலைவன் கூறியது.)
| சிறுவெள் ளரவின் அவ்வரிக் குருளை கான யானை அணங்கி யாஅங்கு இளையள் முளைவாள் எயிற்றள் வளையுடைக் கையள்எம் அணங்கி யோளே. |
|
| - சத்திநாதனார். |
தோழி! இளமையை உடையவளும் நாணல் முளையைப் போன்ற ஒளியை உடைய பற்களை உடையவளும் வளையினை உடைய கையினளு மாகிய ஒருத்தி சிறிய வெள்ளிய பாம்பினது அழகிய கோடுகளையுடைய குட்டியானது காட்டுயானையை வருத்தினாற் போல எம்மை வருந்தச் செய்தனள்.
முடிபு: இளையள், எயிற்றள், கையள் எம் அணங்கியோள்.
கருத்து: ஓர் இளைய மகள் என்னைத் தன் அழகினால் வருத்தினாள்.
தேடல் தொடர்பான தகவல்கள்:
குறுந்தொகை - 119. குறிஞ்சி - தலைவன் கூற்று, தலைவன், இலக்கியங்கள், கூற்று, குறுந்தொகை, குறிஞ்சி, எயிற்றள், உடையவளும், உடைய, இளையள், இளைய, எட்டுத்தொகை, சங்க, அணங்கி