குறுந்தொகை - 111. குறிஞ்சி - தோழி கூற்று
(தலைவன் வேலிப்புறத்தானாக அவனுக்குப் புலப்படும்படி தோழி, “நின்மேனியின் வேறுபாடு கண்டு அன்னை வெறியாடத் தொடங்கினாள். அவ் வேறுபாடு நீங்குதற்குரிய வழி வெறியாடலன்றென்பதைத் தாய் அறியும் பொருட்டுத் தலைவன் இங்கே வந்து செல்லுதல் நலம்” என்று தலைவியை நோக்கிக் கூறியது.)
| மென்தோள் நெகிழ்த்த செல்லல் வேலன் வென்றி நெடுவேள் என்னும் அன்னையும் அதுவென உணரும் ஆயின் ஆயிடைக் கூழை இரும்பிடிக் கைகரந் தன்ன கேழிருந் துறுகற் கெழுமலை நாடன் |
5 |
| வல்லே வருக தோழிநம் இல்லோர் பெருநகை காணிய சிறிதே. |
|
| - தீன்மதி நாகனார். |
தோழி! நின் மெல்லிய தோளை மெலியச் செய்த துன்பம் வெறியாட்டாளன் வெற்றியையுடைய நெடிய முருகக் கடவுளால் வந்ததென்று சொல்லுவான்; நம் தாயும் அதுவென்றே நினைப்பாளாயின் அப்பொழுது குறிய கருமையான பெண் யானையினது கை மறைந்தாற் போன்றல கரிய நிறத்தையுடைய பெரிய குண்டுக்கல் பொருந்திய மலைநாட்டையுடைய தலைவன் நம் வீட்டிலுள்ளாரது பெரிய நகைக்கிடமான செய்கையைக் காணும் பொருட்டு சிறிது நேரம் இங்கே விரைந்து வந்து செல்வானாக.
முடிபு: தோழி, செல்லலை வேலன் நெடுவேளென்னும்; அன்னையும் அதுவென உணருமாயின், மலைநாடன் காணிய சிறிது வல்லே வருக.
கருத்து: தாய் நின் வேறுபாடு கண்டு வெறியெடுத்தலைத் தலைவன் அறிவானாக.
தேடல் தொடர்பான தகவல்கள்:
குறுந்தொகை - 111. குறிஞ்சி - தோழி கூற்று, தோழி, தலைவன், இலக்கியங்கள், குறுந்தொகை, குறிஞ்சி, கூற்று, வேறுபாடு, வருக, வல்லே, காணிய, சிறிது, பெரிய, நின், அதுவென, தாய், சங்க, எட்டுத்தொகை, கண்டு, இங்கே, வேலன், வந்து, அன்னையும்