கானல் வரி - சிலப்பதிகாரம்

அடையல் குருகே அடையலெங் கானல் அடையல் குருகே அடையலெங் கானல் உடைதிரைநீர்ச் சேர்ப்பற் குறுநோ யுரையாய் அடையல் குருகே அடையலெங் கானல்.

46

நாரையே! என் கானலிடத்தில் வந்து நீயும் அடைந்து விடாதே !
நாரையே! என் கானலிடத்தில் வந்து நீயும் அடைந்து விடாதே !

கரையை அடித்து உடைக்கின்ற அலைகளையுடைய,கடல் சூழ்ந்த ஊரைச் சார்ந்த என் தலைவனிடம் சென்று,நான் உற்றக் காதல் நோயினை நீ அவருக்கு உணர்த்துவாயாக …

அதனால்,இப்போது என் கானலுக்குள் வந்து நீ அடைந்து விடாதே !

ஆங்கனம் பாடிய ஆயிழை பின்னரும் காந்தள் மெல்விரற் கைக்கிளை சேர்குரல் தீந்தொடைச் செவ்வழிப் பாலை இசைஎழீஇப் பாங்கினிற் பாடியோர் பண்ணுப் பெயர்த்தாள்.

47

அதுவரை பாடிய மங்கையான மாதவி;அதன் பின்னர்த் தன் மெல்லிய காந்தள் மலர் போன்ற விரல்களால்,கைக்கிளையைச் சுருதியாகக் கொண்டு இன்னிசையுடைய செவ்வழிப்பாலை என்னும் இசையை யாழிலே எழுப்பி,அதனை இசை நூல்கள் கூறிய முறைப்படி தன் குரலில் பாடினாள்.அதற்குப் பின்பு வேறொரு பண்ணையும் பாடத் தொடங்கினாள்.