கானல் வரி - சிலப்பதிகாரம்

உண்டாரை வெல்நறா வூணொளியாப் பாக்கத்துள் உறையொன் றின்றித் தண்டாநோய் மாதர் தலைத்தருதி என்பதியாங் கறிகோம் ஐய வண்டால் திரையழிப்பக் கையான் மணல்முகத்து மதிமேல் நீண்ட புண்தோய்வேல் நீர்மல்க மாதர் கடல்தூர்க்கும் புகாரே எம்மூர்.

30

தன்னை அருந்தியவரைத் தன் போதையால் அறிவிழக்கச் செய்து அடிமையாக்கும் கள் எனும் ஊண் எங்கள் பாக்கத்தில் அழியாது நிற்கும்.அங்கே,மருந்தால் தீர்க்க முடியாத காம நோயை மகளிருக்கு நீ தருகின்றாய் என்பதைத் தலைவனே,நாங்கள் எப்படி அறிவோம்?

சிறுமியர் செய்த வண்டல் முதலியவற்றைக் கடல் அலைகள் அழித்துச் சென்றிட,கையினால் மணலை முகந்த மதிமுகத்தின் மேலுள்ள,பகைவரின் காயத்தில் தோய்த்தெடுத்த வேல்போன்ற கண்களிலே கண்ணீர் மல்க,கோபம் கொண்ட சிறுமிகள் கடலைத் தூர்த்த முயன்று மணலை வாரி இறைக்கின்ற புகார் அல்லவா எனது ஊர்!