கானல் வரி - சிலப்பதிகாரம்

தீங்கதிர் வாண்முகத்தாள் செவ்வாய் மணிமுறுவல் ஒவ்வா வேனும் வாங்குநீர் முத்தென்று வைகலும் மால்மகன்போல் வருதிர் ஐய வீங்கோதந் தந்து விளங்கொளிய வெண்முத்தம் விரைசூழ் கானல் பூங்கோதை கொண்டு விலைஞர்போல் மீளும் புகாரே எம்மூர்.

28

இனிய கதிர்களைப் பொழியும் திங்களைப் போல ஒளிபொருந்திய முகத்தையுடைய தலைவியின் சிவந்த வாயில் இருக்கும் அழகிய பற்களுக்கு,நீங்கள் தரும் இந்த முத்துகள் ஈடாகாதவை! எனினும் ‘முத்துகளை நீங்கள் வாங்குங்கள்’ என்று கூறி,திருமாலின் மகன் காமன் போல அன்றாடம் இங்கு வருகின்றாய் கடலே!ஐயனே! ஒலிமிகுந்த கடலின் அலைகள்,ஒளிமிக்க வெண் முத்துக்களைத் தந்து,மணம்மிகுந்த கானலிடத்தில் அவற்றுக்கு ஈடாக வணிகர்கள் போலப் பூங்கொத்தைப் பெற்று விளங்குகின்ற புகார் அல்லவா எனது ஊர்!