அந்திமாலைச் சிறப்புச் செய் காதை - சிலப்பதிகாரம்

அஞ்செஞ் சீறடி யணிசிலம் பொழிய மென்துகில் அல்குல் மேகலை நீங்கக் கொங்கை முன்றிற் குங்கும மெழுதாள் மங்கல வணியிற் பிறிதணி மகிழாள்	50
கொடுங்குழை துறந்து வடிந்துவீழ் காதினள் திங்கள் வாண்முகம் சிறுவியர் பிரியச் செங்கயல் நெடுங்கண் அஞ்சனம் மறப்பப் பவள வாணுதல் திலகம் இழப்பத் தவள வாணகை கோவலன் இழப்ப	55
மையிருங் கூந்தல் நெய்யணி மறப்பக் கையறு நெஞ்சத்துக் கண்ணகி யன்றியும்

அழகிய சிவந்த சிறிய பாதங்களில் சிலம்புகள் அணியாதிருந்தாள்;

மெல்லிய துகிலையுடைய அல்குல் பகுதியிலே அணியும் மேகலாபரணமும் நீங்கிவிட்டது;

மார்புகளில்,குங்குமக் கலவையை அவள் பூசாதிருந்தாள்;

மங்கல அணியினையன்றிப் பிறிதோர் அணியை அவள் புட்டி மகிழவும் இல்லை;

வளைவாகிய குண்டலம் இல்லாதுபோக,வளைந்து தாழ்ந்து தோன்றின அவள் காதுகள்;

மதிப் போன்ற அவள் முகத்திலே,கலவியால் தோன்றும் சிறு வியர்வைத்துளிகளும் தோன்றவில்லை;

செம்மையான கயல்மீன் போன்ற நீண்ட கண்கள்,மையினை மறந்துவிட்டன;

பவளம்போன்ற சிவந்த ஒளிபொருந்திய நெற்றியும் திலகத்தை இழந்திருந்தது;

முத்தின் ஒளிப்பொருந்திய அவள் புன்னகையைக் கோவலன் இழந்திட்டான்;

மை போன்ற அவள் கூந்தல்,நெய் பூசுவதை மறந்தது;

செயலிழந்த நெஞ்சத்துடன்,இவ்வாறு கணவனைப் பிரிந்த கண்ணகி,அந் நிலவுக் காலத்திலே,நெஞ்சம் கலங்கி நின்றாள்.