அரங்கேற்று காதை - சிலப்பதிகாரம்

இமிழ்கடல் வரைப்பில் தமிழகம் அறியத் தமிழ்முழு தறிந்த தன்மைய னாகி வேத்தியல் பொதுவியல் என்றிரு திறத்தின் நாட்டிய நன்னூல் நன்கு கடைப்பிடித்து	40
இசையோன் வக்கிரித் திட்டதை யுணர்ந்தாங்கு அசையா மரபி னதுபட வைத்து மாற்றோர் செய்த வசைமொழி யறிந்து நாத்தொலை வில்லா நன்னூற் புலவனும்

அரவாரமுடைய கடலால் சூழப்பட்ட இவ்வுலகில் உள்ள தமிழ் மக்கள் அனைவருக்கும் தெரியுமாறு,தமிழ் மொழியின் தன்மை முழுதும் தெரிந்தவனாக புலவன் இருத்தல் வேண்டும்;

‘வேத்தியல்’, 'பொதுவியல்’, என்றிறு நாட்டிய நூல்களின் மரபுகளை நன்கறிந்து,அவற்றை கடைபிடித்து,இசை ஆசிரியரின் பண்ணின் திட்டத்தை உணர்ந்து,சிறிதும் பிறழாமல்,அத்தாளநிலையிலே பொருந்தச் சொற்களை அமைக்க வல்லவனாக இருத்தல் வேண்டும்;

மரபுகளுக்கு மாறுப்பட்டோர் செய்த வசைமொழிகளை அறிந்து,தாம் இயற்றும் கவிதனில் அவ்வசைமொழிகள் வாராமல் செய்யவல்ல நாவன்மையும்,நல்ல நூலறிவு மிக்கவனாகவும் இருத்தல் வேண்டும்;

அத்தகைய தன்மை கொண்ட புலவன் ஒருவனும் மாதவிக்கு தமிழ் ஆசிரியனாக இருந்தான்.