புலம்பெயர் நாடக அரங்கு - வளர்ச்சியும் பிரச்சினைகளும் - நாடகக் கலைக் கட்டுரைகள்

ஏற்கனவே லண்டனில் நிலைபெற்றிருந்த இலங்கைத் தமிழர் மத்தியில் புலம்பெயர்ந்த அகதித் தமிழர்கள் வருகை அவ்வளவு உற்சாகமானதாக வரவேற்புப் பெறாத நிலையில், நாடகத்தில் ஈடுபடும் செயற்பாடுகள் புதியதாகவும், சுற்றுக் கேலிக்குரியதாகவும் நோக்கப்பட்டது.

புகலிடச் சூழலில் நேரம் = பணம்; என்ற வாய்ப்பாட்டில், பெரும்பான்மையோர் வாரோட்டம் நடத்திக் கொண்டிருக்கும்போது, வருவாய் இல்லாமல் நேரத்தைச் செலவழித்து நாடகக் கலையில் ஈடுபடுவதற்கு மிகச் சிலரையே கண்டுபிடிக்க முடியும். இப்படியாக பல்வேறு கஷ்டங்கள் மத்தியிலும் இடைவிடாது தொடர்ந்து இயங்கி தற்போது தமிழர் வாழும் நாடுகளில் பரவலாக நாடக விழாக்கள் நடத்தி வெற்றிபெற முடிந்திருக்கிறது. இவ்வளர்ச்சியை இரண்டு வகைக் காலவரையறையில் பார்க்கமுடியும்.

1. 1984-91 ஸ்தாபித காலம்

2. 1991-98 அகலித்தல் காலம்

5.2 ஸ்தாபித காலம் :

ஸ்தாபித காலத்தில் லண்டன் எல்லைக்குள், பெரும்பாலும் இலங்கையில் மேடையேற்றப்பட்ட நாடகங்களை, மீள்தயாரிப்பு செய்தும், இலங்கையில் பணியாற்றிய சில கலைஞர்களை திரும்பவும் ஒருங்கிணைத்தும் ஒரு பலமான அத்திவாரம் உருவாக்கப்பட்டது. இக்காலத்தில் 'மழை', 'பார்வையாளர்கள்', 'பசி', 'யுகதர்மம்', 'பலி', 'முகமில்லாத மனிதர்கள்', 'இடைவெளி', 'சம்பந்தம்', 'எரிகின்ற எங்கள் தேசம்' ஆகிய தயாரிப்புகள் லண்டனில் 30 மேடையேற்றங்களைக் கண்டன. எந்தவித அரச உதவிப் பணத்தையும் பெறாமல், அரசியல் அமைப்புகள் ஆளணிகளின் ஆதரவும் இல்லாமல், முற்று முழுதாக தமிழ் மக்களுடைய ஆதரவிலேயே பொருளாதார ரீதியில் கையைச் சுட்டுக் கொள்ளாமல் இந் நாடக நிகழ்ச்சிகள் நடந்தேறின. ஒத்திகை இடவசதியின்மை, தகுந்த இசைக்கலைஞர் தட்டுப்பாடு, தேர்ந்த தமிழ் ஒலி, ஒளி அமைப்பாளர்கள் இல்லாமை, விளம்பர வசதியின்மை போன்ற பல்வேறு பிரச்சினைகள் மத்தியிலும், வளர்ந்து முற்று முழுதாக நாடக விழாக்களை நடத்தும் அளவிற்கு இக்காலகட்டத்தில் வளர்ச்சி கண்டுள்ளது.

5.3 அகலித்தல் காலம் 91-98

1. வருடாந்த லண்டன் நாடக விழாக்கள்

2. தமிழர் வாழும் கீழ்காணும் ஐரோப்பிய நாடுகளில் நாடக மேடையேற்றங்கள்.

(அ) நெதர்லாந்து-08.8.1983

(ஆ) சுவிற்ஸலாந்து ஐந்து நாடகவிழா 02-10 ஏப்ரல் 94 (சூரிச், பேர்ண், பாசல், செங்காலன்)

(இ) பிரான்ஸ் 11, 12 மார்ச் 95 (2 நாள் நாடக விழா ஒஸ்லோ, பேர்கன்)

3. ஐரோப்பாவிற்கு வெளியே நடந்த நாடக விழாக்கள்

(அ) கனடா 27.08.94, 24.05.94 (ரொறொன்ரோ)

(ஆ) அவுஸ்திரேலியா மூன்று நாள் நாடகவிழா (சிட்னி, பிறிஸ்பன், மெல்பண்)

4. கூட்டுத் தயாரிப்புகள்

(அ) பிறென்ற் தமிழ்ச் சங்க மாணவர்களைக் கொண்டு சிறுவர் நாடகங்கள் 1991-98 (ஐந்து நாடகங்கள்)

(ஆ) புறூனல் பல்கலைக் கழக மாணவர்களுடன் இணைந்து நாடகத் தயாரிப்பு - 1997

(இ) சர்வதேச தமிழ் மாணவர் மன்றம் (லண்டன்) இணைந்து கவிதா நிகழ்வு 1997

5. நாடகப் பயிற்சிப் பட்டறை

சர்வதேச ரீதியில் அறியப்பட்ட Adam Damus அவர்களுடன் நாடகப்பயிற்சி.