சீராக் ஆகமம் - பழைய ஏற்பாடு

¹ நெருப்பைப் போல் எலியாஸ் இறைவாக்கினர் எழுந்தார். பந்தம் போல் அவருடைய வார்த்தை பற்றி எரிந்தது.

² அவர் மக்களுக்குப் பஞ்சம் வரும்படி செய்தார். அவர்கள் தங்கள் பொறாமையால் அவருக்குக் கோபம் மூட்டினார்கள். அவர்களோ சொற்பப் பேர் ஆனார்கள். ஏனென்றால், அவர்களால் ஆண்டவருடைய கட்டளைகளைச் சகிக்கக் கூடவில்லை.

³ அவர் ஆண்டவருடைய வார்த்தையால் வானத்தை மூடினார்@ வானத்தினின்று மும்முறை நெருப்பு விழச் செய்தார்.

⁴ இவ்வாறே எலியாஸ் தம்முடைய புதுமைகளால் புகழ் பெற்றார். உம்மைப் போல மகிமை பாராட்டக் கூடியவன் யார்?

⁵ ஆண்டவரான கடவுளுடைய வார்த்தையால் இறந்தவனை மரணத் தீர்ப்பினின்றும் பாதாளத்தினின்றும் எழச் செய்தீர்.

⁶ மன்னர்களைக் கெடுதிக்குள் விழத்தாட்டினீர்@ எளிதாய் அவர்கள் வல்லமையை ஒடித்தீர்@ மகிமையில் வாழ்ந்தவர்களைப் படுக்கையில் வைத்தீர்.

⁷ சீனாயில் தீர்மானத்தைக் கேட்கிறீர். ஓரேபில் பழியின் தீர்ப்புகளைக் கேட்கிறீர்.

⁸ அரசரைத் தவம் செய்யும்படி அபிஷேகம் செய்கிறீர். உமக்குப் பின் இறைவாக்கினர்கள் வரும்படி செய்கிறீர்.

⁹ நெருப்புச் சுவாலையில் நெருப்புக் குதிரைகள் பூட்டின வண்டியில் எடுத்துக் கொள்ளப்பட்டீர்.

¹⁰ ஆண்டவருடைய கோபத்தைத் தணிக்கக் காலங்களின் தீர்மானங்களில் எழுதப்பட்டீர். தந்தையின் இதயத்தைப் பிள்ளையுடன் சமாதானப்படுத்தவும், யாக்கோபின் கோத்திரங்களைத் திரும்ப ஏற்படுத்தவும் நியமிக்கப்பட்டீர்.

¹¹ உம்மைப் பார்த்தவர்கள் பேறுபெற்றோர். அவர்கள் உமது நேசத்தால் மகிமைப் படுத்தப்பட்டார்கள்.

¹² ஏனென்றால், நாம் வாழ்வில் மட்டுமே வாழ்கிறோம். சாவுக்குப் பிறகோ நம் பெயர் அதைப் போல் இராது.

¹³ எலியாஸ் சுழல் காற்றால் மூடப்பட்டார். எலிசேயுசிடத்தில் அவருடைய கருத்து நிறைவு பெற்றது. தம் காலத்தில் தலைவர்க்கு அவர் அஞ்சியவரல்லர். வல்லமையில் ஒருவனும் அவரை வென்றவனல்லன்.

¹⁴ யாதொரு வார்த்தையும் அவரை மேற்கொள்ளவில்லை. இறந்த பின்பும் அவர் பிணம் இறைவாக்கு உரைத்தது.

¹⁵ அவர் தமது வாழ்நாளில் அற்புதங்களைச் செய்தார்@ மரணத்தின் போது புதுமைகளை ஆற்றினார்.

¹⁶ இவை யாவும் பார்த்தும் மக்கள் மனந்திரும்பவில்லை. தங்கள் நாட்டினின்று துரத்தப்பட்டு உலகம் முழுதும் சிதறடிக்கப்படும் வரையிலும் அவர்கள் தங்கள் பாவங்களை விட்டவர்களல்லர்.

¹⁷ சிலர் தாவீதின் கோத்திரத்தில் அதிகாரிகளாய் விடப்பட்டார்கள்.

¹⁸ அவர்களில் சிலர் கடவுளுக்கு விருப்பமானதைச் செய்தார்கள். சிலரோ பற்பல பாவங்களைச் கட்டிக் கொண்டார்கள்.

¹⁹ எசேக்கியாஸ் தம் நகரத்தைப் பலப்படுத்தினார்@ அதன் மத்தியில் தண்ணீர் கொண்டு வந்தார்@ இரும்பினால் பாறையைப் பிளந்தார்@ தண்ணீருக்காகக் கிணறு வெட்டினார்.

²⁰ அவர் காலத்தில் சென்னாக்கெரிபு எழுந்து, ராப்சாசேனை அனுப்பினான்@ அவர்களுக்கு விரோதமாய்ப் போர் தொடுத்தான்@ சீயோனோடும் சண்டை செய்தான்@ தன் வலிமையில் செருக்குக் கொண்டான்.

²¹ அப்போது அவர்கள் இதயங்களும் கைகளும் அதிர்ந்தன. பிள்ளை பெறும் பெண்களைப் போல் அவர்கள் வாதை அடைந்தார்கள்.

²² இரக்கமுள்ள ஆண்டவரை மன்றாடினார்கள்@ கைகளை விரித்தார்கள்@ வானத்தை நோக்கித் தூக்கினார்கள். பரிசுத்த ஆண்டவரான கடவுள் அவர்கள் கூக்குரலை உடனே கேட்டார்.

²³ அவர்கள் அக்கிரமங்களை அவர் நினைத்தவரல்லர். அவர்களை அவர் பகைவர்களுக்குக் கையளிக்கவில்லை. ஆனால், புனித இறைவாக்கினரான இசையாஸ் கையால் அவர்களைத் தூய்மைப்படுத்தினார்.

²⁴ அசீரியருடைய படைகளை முறியடித்தார். ஆண்டவருடைய வானவர் அவர்களை அழித்தொழித்தார்.

²⁵ ஏனென்றால், எசெக்கியாஸ் கடவுளுக்கு விருப்பமானதைச் செய்தார்@ தம்முடைய தந்தையாகிய தாவீதைப் பின்பற்றிப் பெரிய இறைவாக்கினராகிய இசையாசால் தமக்குக் காண்பிக்கப்பட்ட வழியில் உறுதியாய் நடந்தார்.

²⁶ அவர் காலத்தில் சூரியன் பின்னால் போனது. அவர் அரசனுடைய வாழ்நாளை அதிகரித்தார்.

²⁷ மிகுந்த அறிவினால் இறுதிக் காலங்களைக் கண்டார்@ சீயோனில் துக்கமுற்றவர்களைத் தேற்றினார்@ இறுதிக் காலம் வரையிலும் வரப்போகிறவைகளையும், நிகழ்வதற்கு முந்தியே மறைந்த காரியங்களையும் வெளிப்படுத்தினார்.