சீராக் ஆகமம் - பழைய ஏற்பாடு

¹ ஞானத்தின் மக்கள் நீதிமான்களின் கூட்டம். அவர்களின் பிள்ளைகள் கீழ்ப்படிதலும் நேசமுமாம்.

² பிள்ளைகளே, உங்கள் தந்தையின் அறிவுரைகளைக் கேட்டு, நீங்கள் மீட்பு அடையும் பொருட்டு அவைகளின்படி நடந்து வாருங்கள்.

³ ஏனென்றால் ஆண்டவர், பிள்ளைகள் தந்தையை மதிக்க வேண்டும் என்றும், தாயின் அதிகாரத்திற்கு உட்பட்டிருக்க வேண்டும் என்றும் நியமித்திருக்கிறார்.

⁴ கடவுளை நேசிக்கிறவன் தன் பாவங்களுக்காகப் பரிகாரம் செய்வதல்லாமலும் அவைகளை விலக்குவான்@ ஆதலால் அவன் மன்றாட்டும் கேட்கப்படும்.

⁵ தன் தாயை மதிக்கிறவன் செல்வங்களைச் சேர்த்தவன் (போல வாழ்வான்).

⁶ தன் தந்தையை மதிக்கிறவன் பிள்ளைகளால் மகிழ்ச்சி அடைவான். அவன் வேண்டுதலும் கேட்கப்படும்.

⁷ தன் தந்தையை மதிக்கிறவன் நெடுங்காலம் வாழ்வான். தன் தந்தைக்குக் கீழ்ப்படிகிறவன் தாய்க்கு உதவுவான்.

⁸ தெய்வ பயமுள்ளவன் தாய் தந்தையரை மதிக்கிறான்@ தன்னைப் பெற்றவர்களுக்குத் தலைவர்களுக்குச் செய்வது போல் ஊழியம் செய்வான்.

⁹ செயலிலும் சொல்லிலும் பொறுமையிலும் உன் தந்தைக்கு மரியாதை செய்.

¹⁰ அதனால் உனக்கு அவனுடைய ஆசி கிடைக்கும். அவன் ஆசியும் உன் வாழ்நாள் வரை உன்னோடு இருக்கும்.

¹¹ தந்தையின் ஆசி பிள்ளைகளின் குடும்பங்களை நிலை நாட்டும். தாயின் சாபமோ பிள்ளைகளுடைய குடும்பங்களின் அடித்தளத்தைப் பிடுங்கி விடும்.

¹² உன் தந்தைக்கு உண்டாகும் நிந்தைகளால் நீ பெருமை கொள்ளாதே. ஏனென்றால், அவன் துன்பம் உனக்குப் பெருமையன்று. ஏனென்றால், தந்தைக்கு உண்டாகும் மாட்சிமை பிள்ளையினுடைய மகிமை@

¹³ தந்தைக்கு உண்டாகும் நிந்தையோ பிள்ளைக்கு அவமானம்.

¹⁴ மகனே, உன் தந்தையின் முதுமையில் அவனை ஆதரி. அவன் வாழ்நாளில் அவனை மனம் நோகச் செய்யாதே.

¹⁵ அவன் அறிவு குறைந்ததாயின் மன்னித்துக் கொள். உன் விவேகத்தை முன்னிட்டு அவனை நிந்தியாதே. ஏனென்றால், தந்தைக்குக் காண்பிக்கப்படும் இரக்கம் ஒருபோதும் மறக்கப்பட மாட்டாது.

¹⁶ உன் தாயின் குற்றத்தைச் சகிப்பதனால் உனக்கு நன்மை ஏற்படும்.

¹⁷ ஏனென்றால், நீ நீதியில் நிலைநாட்டப்படுவாய்@ உன் துன்ப நாட்களில் ஆதரிக்கப்படுவாய்@ கதிரவன் முன் பனி கரைந்து போவது போல உன் பாவங்களும் கரைந்து போகும்.

¹⁸ தன் தந்தையைப் புறக்கணிப்பவன் எவ்வளவோ நிந்தைக்குரியவன். தன் தாயை மனம் நோகச் செய்கிறவன் கடவுளால் சபிக்கப்பட்டவன்.

¹⁹ மகனே, உன் செயல்களைச் சாந்த குணத்தோடு செய்வாயாகில் மனிதரால் அதிக மேன்மையாய் நேசிக்கப்படுவாய்.

²⁰ எவ்வளவுக்கு நீ பெரியவனாய் இருக்கிறாயோ அவ்வளவுக்கு அனைத்திலும் உன்னைத் தாழ்த்து. அப்போது கடவுள் முன் இரக்கத்தைக் காண்பாய்.

²¹ ஏனென்றால், கடவுள் ஒருவரே மிக வல்லமையுள்ளவர். அவர் தாழ்ச்சியுள்ளவர்களால் மாட்சிப்படுத்தப் படுகிறார்.

²² உன் நிலைக்கு மேலான காரியங்களை நீ தேடாதே. உன் ஆற்றலுக்கு அதிகமானவைகளை நீ கண்டறிய நாடாதே. ஆனால், கடவுள் உனக்குக் கற்பித்திருப்பதை எப்போதும் நினைத்துக் கொள். அவர் செயல்களில் பலவற்றைச் சோதிக்காதே.

²³ ஏனென்றால், மறைவான காரியங்களை உன் கண்களால் காணத் தேவையில்லை.

²⁴ தேவையற்ற காரியங்களைப் பற்றி வீணாய் யோசனை செய்யாதே. அவர் படைப்புகளில் பலவற்றை ஆராய ஆசை கொள்ளாதே.

²⁵ ஏனென்றால், மனித அறிவுக்கு எட்டாத காரியங்கள் பல உனக்குக் காண்பிக்கப்பட்டிருக்கின்றன.

²⁶ அவைகளின் ஆராய்ச்சி பலரை மயக்கி அவர்கள் புத்தியைக் கெடுத்தது.

²⁷ கடுமையான நெஞ்சம் இறுதிக் காலத்தில் கெடுதிக்கு உள்ளாக்கும். ஆபத்தை நேசிக்கிறவன் அதிலேயே அழிவான்.

²⁸ இரு நெறிகளில் செல்லும் மனம் வெற்றி அடையாது. தீநெறியாளனுக்கு அவைகளினால் ஆபத்து உண்டாகும்.

²⁹ அக்கிரம மனமுள்ளவன் வருந்துவான். அவன் பாவத்தின் மேல் பாவம் கட்டிக் கொள்வான்.

³⁰ அகந்தையுள்ளவர்களுடைய கூட்டத்திற்குத் திருத்தம் உண்டாகாது. ஏனென்றால், பாவம் ஒரு செடி போல அவர்கள் அறியாமலே அவர்களிடம் வேரூன்றும்.

³¹ ஞானியின் நடத்தை அவன் ஞானத்தால் அறியப்படும். நற்குணமுள்ளவனின் செவி ஞானம் உணர்த்துவதை வெகு ஆவலோடு கேட்கும்.

³² ஞானமும் அறிவுமுள்ள மனதுடையவன் பாவங்களினின்று தன்னைக் காப்பான்@ நீதியின் செயல்களால் வெற்றி அடைவான்.

³³ எரிகிற நெருப்பைத் தண்ணீர் அவிக்கின்றது.

³⁴ தருமம் பாவத்தைத் தவிர்க்கும். சம்பாவனை அளிக்கும் கடவுள் அதைக் கண்ணோக்குகிறார்@ வருங்காலத்தில் அதை நினைத்துக் கொள்கிறார். அவன் ஆபத்தில் விழும் நேரத்தில் அதைத் தனக்கு ஓர் ஆதரவாகக் காண்கிறான்.