சீராக் ஆகமம் - பழைய ஏற்பாடு

¹ மகனே, நீ கடவுளுக்கு ஊழியம் செய்யப் போகையில் நீதியிலும் அச்சத்திலும் நிலைகொண்டு, சோதனைக்குத் தப்ப உன் ஆன்மாவை ஆயத்தப்படுத்து.

² உன் இதயத்தைத் தாழ்த்தி அமைந்திரு. செவிகொடுத்து நல்லறிவின் வார்த்தைகளை ஏற்றுக்கொள். கலக்க நேரத்தில் ஆத்திரப்பட்டு யாதொன்றும் செய்யாதே.

³ ஆண்டவருடைய இரக்கத்தின் காலம் வரைக்கும் காத்திரு. அவரோடு ஒன்றித்துக் கடைசியில் உன் வாழ்க்கை பலன் கொடுக்கும்படி பொறுமையாய் இரு.

⁴ உனக்கு நேர்வன எல்லாவற்றையும் பொறுத்துக் கொள். துன்பத்தில் திடமாயும், தாழ்வில் பொறுமையாயும் இரு.

⁵ பொன்னும் வெள்ளியும் நெருப்பினால் சுத்தமாவது போல, மனிதரும் தாழ்ச்சி என்னும் உலையில் தகுதியானவர்கள் ஆகிறார்கள்.

⁶ கடவுள் பால் உன் விசுவாசத்தை வை@ அவர் உன்னைக் காப்பாற்றுவார். செவ்வழியில் சென்று, அவர்பால் உன் நம்பிக்கையை வை@ அவருக்கு அஞ்சி நட@ நெடுங்காலம் நிலை கொள்வாய்.

⁷ ஆண்டவருக்கு அஞ்சுவதால் நீங்கள் அவர் இரக்கத்தை அடைவீர்கள். நன்னெறி வழுவாதபடி அவரை மறவாதீர்கள்.

⁸ ஆண்டவருக்கு அஞ்சும் நீங்கள் அவரை விசுவசியுங்கள்@ உங்கள் சம்பாவனை வீணாகாது.

⁹ ஆண்டவருக்கு அஞ்சும் நீங்கள் அவரை நம்புங்கள்@ அவர் இரக்கம் உங்கள் மகிழ்ச்சியாகும்.

¹⁰ ஆண்டவருக்கு அஞ்சி நடப்பவர்களே, அவரை நேசியுங்கள்@ உங்கள் இதயங்கள் ஒளி பெறும்.

¹¹ மக்களே, எல்லா மனிதரையும் பாருங்கள்@ ஆண்டவரை நம்பின எவனும் கலங்கினதில்லையென்று கண்டறியுங்கள்.

¹² அவருடைய கட்டளைகளில் நிலைநின்றவன் எவன் கைவிடப்பட்டான்? அவரை மன்றாடினவன் எவன் புறக்கணிக்கப்பட்டான்?

¹³ ஆண்டவர் தயவும் இரக்கமும் உள்ளவராதலால் துன்ப நேரங்களில் பாவங்களை மன்னிப்பார்@ உண்மையாகத் தம்மைத் தேடுகிறவர்களை ஆதரிக்கிறார்.

¹⁴ கபடுள்ள இதயத்திற்கும், அக்கிரம உதடுகளுக்கும், தீச்செயல்களைச் செய்யும் கைகளுக்கும், பூமியில் இரு வழியாய் நடக்கும் பாவிக்கும் கேடாம்.

¹⁵ கடவுளை விசுவாசியாத தீநெறியாளர்க்கும் கேடாம். ஆகையினால், அவர்கள் அவரால் காப்பாற்றப்பட மாட்டார்கள்.

¹⁶ பொறுமையை இழந்தவர்களுக்கும், செவ்வழிகளை விட்டகன்றவர்களுக்கும், தீயவழிகளில் உட்பட்டவர்களுக்கும் கேடாம்.

¹⁷ ஆண்டவர் தங்களுடைய நடத்தையைச் சோதிக்கையில் அவர்கள் என்ன செய்வார்கள்?

¹⁸ தெய்வ பயமுள்ளவர்கள் ஆண்டவருடைய வார்த்தைகளை விசுவசியாமல் இரார்கள். அவரை நேசிக்கிறவர்கள் அவர் வழியில் நிலைகொள்வார்கள்.

¹⁹ தெய்வ பயமுள்ளவர்கள் அவருக்கு விருப்பமானவைகளைத் தேடுவார்கள். அவரை நேசிப்பவர்கள் அவர் கட்டளையால் நிறைவு அடைவார்கள்.

²⁰ தெய்வ பயமுள்ளவர்கள் தங்கள் இதயங்களை ஆயத்தப்படுத்துவார்கள்@

²¹ அவர் திருமுன் தங்கள் ஆன்மாக்களைத் தூய்மைப் படுத்துவார்கள். தெய்வ பயமுள்ளவர்கள் அவர் கட்டளைகளைக் கடைப்பிடிப்பார்கள்@ ஆண்டவர் தங்களைத் தீர்ப்பிடும் வரையிலும் பொறுமையாய் இருப்பார்கள்.

²² ஏனென்றால், தவம் செய்யாமல் போவோமேயாகில், மனிதருடைய கைகளில் அல்ல, ஆனால் ஆண்டவருடைய கைகளில் அகப்படுவோம் என்று சொல்லிக் கொள்வார்கள். அவர் எவ்வளவு வலிமை பொருந்தியவரோ அவ்வளவு இரக்கம் உடையவராய் இருக்கிறார்.