சீராக் ஆகமம் - பழைய ஏற்பாடு

¹ எல்லா ஞானமும் ஆண்டவராகிய கடவுளிடமிருந்து உண்டாகி, அவருடன் என்றென்றைக்கும் நித்தியமாய் இருக்கின்றது.

² கடல் மணல்களையும் மழைத்துளிகளையும், உலகத்தின் நாட்களையும் கணக்கிட்டவன் யார்? வானத்தின் உயரத்தையும் பூமியின் அகலத்தையும் பாதாளத்தின் ஆழத்தையும் அளந்தவன் யார்?

³ எல்லாவற்றிற்கும் முன்னிருந்த கடவுளின் ஞானத்தைக் கண்டுபிடித்தவன் யார்?

⁴ எல்லாவற்றிற்கும் முன் ஞானம் உண்டாக்கப்பட்டது. காலத் துவக்கத்திலிருந்து விவேகமுள்ள அறிவு இருந்தது.

⁵ வான மண்டலங்களில் வீற்றிருக்கும் கடவுளின் வார்த்தையே ஞானத்தின் ஊற்றும், அதனை அடையும் வழிகளே அவருடைய நித்திய கட்டளைகளுமாய் இருக்கின்றன.

⁶ ஞானத்தின் அடித்தளம் எவனுக்கு வெளிப்படுத்தப்பட்டது? அதன் வியத்தகு பண்புகளை அறிந்தவன் யார்?

⁷ ஞானத்தின் உணர்வு எவனுக்குத் தெரிவித்து வெளியாக்கப்பட்டது? அதன் பலவித வழிகளையும் கண்டுபிடித்தவன் யார்?

⁸ எல்லாவற்றிற்கும் மேலான, எல்லாம் வல்ல படைப்பாளர் ஒருவர் இருக்கிறார். வல்லமையுள்ள அவ்வரசர் மிகவும் அஞ்சத்தக்கவர். தமது அரியணையில் வீற்றிருந்து ஆண்டு வரும் கடவுள் அவரே.

⁹ அவரே தமது அளவில்லாப் பரிசுத்த ஆவியைக் கொண்டு அதை உண்டாக்கி, அறிவித்து வெளிப்படுத்தினார்.

¹⁰ ஏனென்றால், தமது எல்லாப் படைப்புகளிலும், எல்லா உயிரினங்களிலும் தமது விருப்பத்திற்கு ஏற்றபடி அதைப் பகிர்ந்திட்டார்@ தம்மை நேசிப்பவர்களுக்கு அதைக் கொணர்ந்தார்.

¹¹ தெய்வ பயம் மகிமையும் மகத்துவமும் களிப்பும் மகிழ்ச்சியின் முடியுமாய் இருக்கின்றது.

¹² தெய்வ பயம் இதயத்தை மகிழ்விக்கும்@ அகமகிழ்ச்சியையும் அக்களிப்பையும் நீடிய ஆயுளையும் கொடுக்கும்.

¹³ ஆண்டவருக்கு அஞ்சி நடப்பவன் தன் இறுதிக் காலத்தில் பேறு பெற்றவன் ஆவான்@ மரண நாளிலும் ஆசீர்வதிக்கப்படுவான்.

¹⁴ கடவுள்பால் உள்ள நேசமே மேன்மையுள்ள ஞானம்.

¹⁵ யார் யாருக்கு அது காணப்படுகிறதோ அவர்கள் தாங்கள் அதைக் கண்டதாலும், அதன் மாட்சிகளை அறிந்ததாலும் அதை நேசிக்கிறார்கள்.

¹⁶ ஞானத்தின் தொடக்கம் தெய்வ பயம். அது தாய் வயிற்றிலேயே பிரமாணிக்கம் உள்ளவர்களோடு உண்டாகின்றது@ நற்குணமுள்ள பெண்களோடு வளர்கின்றது@ நீதிமான்களிடத்திலும் விசுவாசிகளிடத்திலும் விளங்குகின்றது.

¹⁷ தெய்வ பயம் மறை ஒழுக்கத்தின் நூல்.

¹⁸ மறை ஒழுக்கம் இதயத்தைக் காத்து நீதியில் நிலைநிறுத்தும்@ நிறைவையும் மகிழ்ச்சியையும் கொடுக்கும்.

¹⁹ தெய்வ பயமுள்ளவன் பேறுபெற்றவனாய் வாழ்ந்து, சாகும் நேரத்தில் ஆசீர்வதிக்கப்படுவான்.

²⁰ தெய்வ பயமே ஞானத்தின் நிறைவு. அதன் கனிகளால் இது வெளிப்படும்.

²¹ ஞானமுள்ளவர்களுடைய குடும்பங்கள் அதனால் நிரப்பப்படும்@ அதன் செல்வங்களால் அவர்கள் நிறைந்த களஞ்சியங்கள் (போல்) ஆவார்கள்.

²² ஞானத்தின் முடி தெய்வ பயம். அது மன அமைதியை நிறைவாக்கும் மீட்பின் கனியாகும்.

²³ கடவுள் அதைக் கண்டு கணக்கிட்டார். அதன் செயல்கள் அவருடைய கொடைகளாய் இருக்கின்றன.

²⁴ ஞானம் அறிவுக் கலையையும், விவேகமுள்ள அறிவையும் கொடுக்கின்றது@ தன்னைச் சேர்பவர்களை மகிமையில் உயர்த்துகின்றது.

²⁵ ஞானத்தின் அடிவேர் தெய்வ பயமாகும். அதன் கிளைகள் நீடித்த ஆயுளுள்ளவை.

²⁶ ஞானத்தின் செல்வங்களோ அறிவுத் தெளிவும் மறை ஒழுக்கமுமாம். பாவிகளோ ஞானத்தை வெறுக்கிறார்கள்.

²⁷ தெய்வ பயம் பாவத்தை அகற்றுகின்றது.

²⁸ ஏனென்றால், பயமற்றவன் நீதிமானாதல் இயலாது. கோபம் அவனுக்குக் கலக்கமும் கேடுமாய் இருக்கின்றது.

²⁹ பொறுமையுடையவன் சிறிது காலத்திற்குச் சகிப்பான்@ பின்னர் மகிழ்ச்சி அடைவான்.

³⁰ நல்லறிவு சிறிது காலத்திற்கு அவன் வார்த்தைகளை மறைக்கும். பலருடைய நாவு அவன் அறிவை வெளிப்படுத்தும்.

³¹ ஞானத்தின் செல்வங்களில் ஒன்று நல்லொழுக்கத்தின் அடையாளம்.

³² பாவி கடவுளுக்கு ஊழியம் செய்வதை வெறுக்கிறான்.

³³ மகனே, நீ ஞானத்தை விரும்புவாயாகில் நீதியைக் காப்பாற்று. கடவுள் உனக்கு அதை அளிப்பார்.

³⁴ ஞானமும் நல்லொழுக்கமும் தெய்வ பயமாகும். அவை அவருக்கு விருப்பமானவை.

³⁵ விசுவாசம், சாந்தம் இவைகளைக் கொண்டு அவர் ஞானியின் செல்வங்களை நிரப்புவார்.

³⁶ தெய்வ பயத்தை விட்டுவிடாதே. கபடுள்ள இதயத்தோடு அவரை அணுகிப்போகாதே.

³⁷ மனிதர் முன்பாகக் கள்ள ஞானியாய் இராதே. உன் நாவால் அவர்களுக்குத் துன் மாதிரிகைக்கு இடம் கொடாதே.

³⁸ நீ தவறிப்போகாதபடி உன் வார்த்தைகளில் கவனமாய் இரு. உன் ஆன்மாவிற்கு அவமானம் வருவிக்காதே.

³⁹ கடவுள் உன் இரகசிய எண்ணங்களை வெளியிட்டுச் சபை முன்பாக உன்னை ஒழித்து விடுவார்.

⁴⁰ ஏனென்றால், நீ கெட்ட கருத்தோடு கடவுளை நாடினாய்@ உன் இதயம் கபடும் பொய்யும் நிறைந்ததாய் இருக்கின்றது.