2 மக்கபே ஆகமம் - பழைய ஏற்பாடு

¹ ஆனால், சிறிது காலம் சென்ற பின், அரசனுடைய அமைச்சனும் உறவினனும் செயலனுமான லிசியாஸ் என்பவன் நடந்த காரியங்களைப் பற்றிப் பெரிதும் வருத்தமுற்று,

² எண்பதாயிரம் காலாட் படைகளையும், எல்லாக் குதிரைப் படைகளையும் சேர்த்துக் கொண்டு யூதரை எதிர்க்க வந்தான்@ அவர்களுடைய நகரைப் பிடித்து, அதைப் புறவினத்தாருடைய உறைவிடமாக்குவதென்றும்,

³ புறவினத்தாருடைய கோயில்களைப்போலக் கடவுளின் ஆலயத்தையும் பணம் திரட்டுவதற்காக வைத்திருப்பதென்றும், ஆண்டு தோறும் குருத்துவப் பதவியை விற்பதென்றும் எண்ணி வந்தான்.

⁴ கடவுளுடைய வல்லமையை அவன் ஒருபோதும் நினைத்தவனல்லன். ஆனால், தன் மனத்தில் அகந்தை கொண்டு, திரளான காலாட்படை வீரரிலும், ஆயிரக்கணக்கான குதிரை வீரரிலும், எண்பது யானைகளிலும் தன் நம்பிக்கையை வைத்திருந்தான்.

⁵ அவன் யூதேயா நாட்டில் புகுந்து, யெருசலேமுக்கு ஐந்து மைல் தூரத்தில் குறுகிய பள்ளத்தாக்கில் இருந்த பெத்சூரா நகரை நெருங்கி, அந்தக் கோட்டையைத் தாக்கினான்.

⁶ மக்கபேயுசும் அவருடன் இருந்தவர்களும் கோட்டைகள் தாக்கப்படுவதை அறிந்து, அழுது கண்ணீர் சிந்நி, இஸ்ராயேலின் மீட்புக்காகத் தம் நல்ல தூதரை அனுப்பும் படியாக எல்லாரும் சேர்ந்து ஆண்டவரை மன்றாடினார்கள்.

⁷ மக்கபேயுஸ் தாமே முதலில் ஆயுதங்களை எடுத்துக்கொண்டு, மற்றவர்களும் தம்முடன் ஆபத்துக்குத் துணியவும், தங்கள் சகோதரருக்கு உதவி புரியவும் தூண்டினார்.

⁸ அவர்களும் அவரைப்போலத் தயக்கமின்றி நடந்து போக, வெண்ணாடை அணிந்து பொன்னாயுதங்களுடன் ஈட்டியை ஓங்கிக் கொண்டு யெருசலேமில் தங்களுக்கு முன் சென்ற ஒரு குதிரை வீரன் காணப்பட்டான்.

⁹ அப்போது எல்லாரும் இரக்கமுள்ள ஆண்டவரைப் போற்றி மனத்திடம் கொண்டார்கள்@ மனிதரை மட்டுமல்ல, கொடிய மிருகங்களையும் இரும்புச் சுவர்களையும் துளைத்து (எதிர்க்கத்) துணிந்தார்கள்.

¹⁰ விண்ணினின்று தங்களுக்கு உதவி செய்பவரும், தங்கள் மேல் இரக்கம் கொண்டவருமான ஆண்டவர் தங்களோடு இருந்தபடியால் மிகத் துணிவுடன் போனார்கள்.

¹¹ சிங்கங்களைப் போலப் பகைவர் மேல் வேகமாய்ப் பாய்ந்து, அவர்கள் காலாட்களில் பதினோராயிரம் பேர்களையும், குதிரை வீரரில் ஆயிரத்தறுநூறு பேர்களையும் விழத்தாட்டினார்கள்.

¹² எல்லாரும் ஓட்டம் பிடிக்கும் படி செய்தார்கள். அவர்களில் பலர் காயப்பட்ட ஆயுதமற்றவராய் ஓடினார்கள். லிசியாசோ வெகு வெட்கத்தோடு ஓடித் தப்பித்துக் கொண்டான்.

¹³ ஆனால், அவன் அறிவுள்ளவனானதால், தனக்கு நேரிட்ட குறையை நினைத்து, எல்லாம் வல்ல கடவுளின் உதவியை நம்பின எபிரேயரைத் தான் வெல்ல முடியாது என்று கண்டு பிடித்து, அவர்களிடம் தூதர்களை அனுப்பி,

¹⁴ நியாயமானவற்றிற்கெல்லாம் தான் இணங்குவதாகவும், அரசனை அவர்களின் நண்பனாக்க வற்புறுத்துவதாகவும் வாக்குறுதி செய்தான்.

¹⁵ பொதுநன்மையை நாடி, லிசியாசின் வேண்டுதல்களுக்கு மக்கபேயுஸ் இசைந்தார். யூதரைப் பற்றி லிசியாசுக்கு மக்கபேயுஸ் எழுதின யாவையும் அரசன் நிறைவேற்றினான்.

¹⁶ ஏனென்றால், இவ்விதம் லிசியாஸ் யூதருக்குக் கடிதம் எழுதினான்: லிசியாஸ் யூதமக்களுக்கு வாழ்த்துகள் கூறுகிறேன்.

¹⁷ உங்களால் அனுப்பப்பட்ட அருளப்பனும் அபேசலோமும் கடிதத்தைக் கொடுத்து, அதில் அடங்கியவைகளை நான் நிறைவேற்றும்படி கேட்டுக்கொண்டார்கள்.

¹⁸ அரசருக்கு அறிவிக்கக் கூடுமானதெல்லாம் தெரிவித்தேன். அவர் தம்மால் கூடுமானவைகளை அளித்தார்.

¹⁹ ஆதலால், நீங்கள் உடன்படிக்கைகளில் நம்பிக்கை வைத்திருந்தால், இனி மேல் நான் உங்களுடைய நன்மைக்காகப் பாடுபடுவேன்.

²⁰ மற்றக் காரியங்களைப் பற்றியோ, அவர்களிடமும் என்னால் அனுப்பப் பட்டிருக்கிறவர்களிடமும் வார்த்தை மூலமாய்ச் சொல்லி, உங்களிடம் பேசும்படி உத்தரவு இட்டிருக்கிறேன்.

²¹ உங்கள் நலம் நாடுகிறேன். நூற்று நாற்பத்தெட்டாம் ஆண்டு, தியோஸ்கோர் மாதம், இருபத்து நான்காம் நாள் (கொடுக்கப்பட்டது).

²² அரசனுடைய கடிதம் பின்வருமாறு எழுதப்பட்டிருந்தது: அந்தியோக்கஸ் அரசர் சகோதரன் லிசியாசுக்கு வாழ்த்துகள் கூறுகிறோம்@

²³ நம் தந்தை தேவர்களிடம் சேர்ந்த பிறகு, நமது அரசாட்சிக்கு உட்பட்டவர்களைக் கலகமில்லாமல் நடத்தவும், அவர்களுடைய காரியங்களில் கவலை எடுத்துக் கொள்ளவும் விரும்புகிறோம்.

²⁴ யூதர் நம் தந்தை காலத்தில் கிரேக்கருடைய வழக்கத்துக்கு மாற்றப்பட இசையாமல், தங்கள் வழக்கங்களையே கைக்கொள்ள விரும்புகிறார்களென்றும், ஆதலால் தங்கள் உரிமைகள் தங்களுக்கு அளிக்கப்பட வேண்டுமென்று மன்றாடுகிறார்களென்றும் கேள்விப்பட்டோம்.

²⁵ இவ்வினத்தாரும் சமாதானமாய் இருக்க நாம் விரும்பி, தீர்மானித்து, தங்கள் முன்னோருடைய வழக்கப் படியே அவர்கள் நடப்பதற்கு அவர்களுடைய கடவுள் ஆலயத்தை அவர்களுக்குத் திரும்பக் கொடுக்க முடிவு செய்துள்ளோம்.

²⁶ அவர்கள் நம்முடைய முடிவை அறிந்து மகிழ்வுடன் இருக்கவும், தங்கள் நன்மையைக் கவனிக்கவும் நீ அவர்களிடம் தூதர்களை அனுப்பி உதவி செய்வது நலம்

²⁷ யூதருக்கு அரசன் எழுதியிருந்த கடிதமாவது: அந்தியோக்கஸ் அரசர் யூத சங்கத்துக்கும் மற்ற யூதருக்கும் வாழ்த்துகள்.

²⁸ நீங்கள் நலமுடன் இருப்பதையே நாம் விரும்புகிறோம். நாமும் நலமுடன் இருக்கிறோம்.

²⁹ நம்மிடம் இருக்கும் உங்கள் இனத்தவருடன் நீங்கள் வந்து சேர விரும்புவதாக மெனேலாவுஸ் நம்மிடம் தெரிவித்தான்.

³⁰ சாந்திக்கஸ் மாதம் முப்பதாம் நாள் வரை திரும்பி வருகிறவர்களுக்கு நாம் பாதுகாப்பும் உதவியும் வழங்குகிறோம்.

³¹ யூதர்கள் முன்போலத் தங்கள் விருப்பப்படியே உண்ணவும், கட்டளைகளைக் கடைபிடிக்கவும் உத்தரவளிக்கிறோம். அறியாமையால் ஒருவன் செய்த யாதொன்றிற்காகவும் எவனும் அவனை எவ்விதத்திலேனும் தொந்தரவுசெய்ய மாட்டான்.

³² உங்களிடம் பேசும்படி மெனேலாவுசை அனுப்பியிருக்கிறோம்.

³³ உங்கள் நலம் நாடுகிறோம். நூற்று நாற்பத்தெட்டாம் ஆண்டு, சாந்திக்கஸ் மாதம், பதினைந்தாம் நாள் (கொடுக்கப்பட்டது ).

³⁴ உரோமையரும் பின்வருமாறு எழுதியனுப்பினார்கள்: உரோமையருடைய பிரதிநிதிகளாகிய குயிந்துஸ் மேம்மியுசும், தித்துஸ் மனிலியுசும், யூத மக்களுக்கு வாழ்த்துகள்.

³⁵ அரசருடைய உறவினனாகிய லிசியாஸ் உங்களுக்குக் கொடுத்தவைகளை நாங்களும் கொடுக்கிறோம்.

³⁶ அரசரிடம் அறிவிக்க அவன் தீர்மானித்தவைகளை உங்களுக்குள்ளாக விரைவில் யோசித்து, நாங்களும் உங்களுக்கு வேண்டிய முறையிலேயே தீர்மானிக்க உடனே யாரையேனும் அனுப்புங்கள். ஏனென்றால், நாங்களும் அந்தியோக்கியா போகிறோம்.

³⁷ ஆகையால், உங்கள் கருத்தை நாங்களும் அறிந்து கொள்ள உடனே பதில் எழுதுங்கள்.

³⁸ உங்கள் நலம் நாடுகிறோம். நூற்று நாற்பத்தெட்டாம் ஆண்டு, சாந்திக்கஸ் மாதம், பதினைந்தாம் நாள் (கொடுக்கப்பட்டது ).