யூதித் ஆகமம் - பழைய ஏற்பாடு

¹ ஓசியாஸ் சொன்ன வார்த்தைகள் யூதித் என்பவளின் செவிக்கு எட்டின. யூதித்தின் தந்தை மேராரி. இவன் தந்தை இதோக்ஸ்@ இவன் தந்தை யோசேப்@ இவன் தந்தை ஓசியாஸ்@ இவன் தந்தை எலாயி@ இவன் தந்தை யம்னோர்@ இவன் தந்தை கேதேயோன்@ இவன் தந்தை இராப்பாயீம்@ இவன் தந்தை அக்கித்தோப்@ இவன் தந்தை மெல்கியாஸ்@ இவன் தந்தை ஏனான்@ இவன் தந்தை நத்தானியாஸ்@ இவன் தந்தை சலாத்தியேல்@ இவன் தந்தை சிமையோன்@ இவன் தந்தை ரூபன்.

² யூதித்தின் கணவனது பெயர் மனாசேஸ்@ இவன் வாற்கோதுமை அறுவடைக் காலத்தில் இறந்து போனான்@

³ அதாவது, வயலில் அரிக்கட்டுகளைக் கட்டுகிறவர்களைக் கண்காணித்துக் கொண்டிருக்கும் போது, கடும் வெயிலால் தாக்குண்டு தன் நகரான பெத்தூலியாவில் இறந்தான். அங்கேயே தன் முன்னோர்களின் கல்லறையில் அவன் அடக்கம் செய்யப்பட்டான்.

⁴ யூதித் கைம்பெண்ணாகி மூன்றரை ஆண்டாயிற்று.

⁵ அவள் தன் வீட்டு மெத்தையில் தனித்த ஓர் அறையைக் கட்டிக் கதவை அடைத்துக் கொண்டு அங்கேயே தன் பணிப் பெண்களுடன் வாழ்ந்து வந்தாள்.

⁶ அவள் ஓய்வு நாட்களையும் அமாவாசை நாட்களையும் இஸ்ராயேல் வீட்டாரின் திருவிழாக்களையும் தவிர, ஏனைய நாட்களிலெல்லாம் மயிராடை அணிந்து நோன்பு பூண்டிருப்பாள்.

⁷ அவளோ பார்வைக்குப் பேரழகி. அவள் கணவன் அவளுக்கு மிகுந்த செல்வத்தையும் ஏராளமான ஊழியரையும், ஆடு, மாடு முதலிய சொத்துக்களையும் விட்டுச் சென்றிருந்தான்.

⁸ அவள் மிகுந்த தெய்வ பயம் உள்ளவள். எனவே எல்லாரிடத்திலும் பேரும் புகழும் பெற்றிருந்தாள். அவளைப் பற்றி இழிவாக யாரும் பேசியது கிடையாது.

⁹ ஐந்து நாட்களுக்குப் பின் எதிரிகளுக்கு நகரைக் கையளித்து விடுவேன்" என்று ஓசியாஸ் வாக்களித்திருந்ததைக் கேள்வியுற்ற யூதித், குருக்களான காப்ரி, கார்மி என்பவர்களை அழைத்து வரச் சொன்னாள்.

¹⁰ அவர்கள் அவளிடம் வந்து சேரவே, அவள் அவர்களை நோக்கி, "ஐந்து நாட்களுக்குள் உங்களுக்கு உதவி கிடைக்காவிடில், நகரை அசீரியருக்குக் கையளிப்பதாக ஓசியாஸ் சம்மதித்தது ஏன்?

¹¹ ஆண்டவரைச் சோதிப்பதற்கு நீங்கள் யார்?

¹² இத்தகைய பேச்சு ஆண்டவரின் இரக்கத்தைப் பெறுவதற்குப் பதிலாக, அவருக்குக் கோபத்தையும் வெறுப்பையும் மூட்டி விடும் அன்றோ?

¹³ நீங்கள் ஆண்டவரின் இரக்கத்திற்குக் கெடு வைத்து உங்கள் மனம் போல் அவருக்கு நாளைக் குறிப்பது ஏன்?

¹⁴ ஆண்டவர் பொறுமையுள்ளவராய் இருக்கிறதனால், நாம் மனம் வருந்திக் கண்ணீர் சிந்தி அவரது இரக்கத்தை இரந்து மன்றாடுவதே நமது கடமை.

¹⁵ ஏனெனில் மனிதர் அச்சுறுத்துவது போல் கடவுள் மிரட்டுகிறதுமில்லை@ மனிதரைப் போல் சினம் கொள்வதுமில்லை.

¹⁶ ஆகையால் அவருக்கு முன்பாக நம்மையே தாழ்த்திப் பணிந்த இதயத்தோடு அவருக்குப் பணிவிடை செய்வோம்.

¹⁷ அவர் தமது திருவுளப்படி நமக்குத் தயைபுரிய வேண்டும் என்றும், அதனால் நம் எதிரிகளின் ஆணவத்தைக் கண்டு நமது உள்ளம் எவ்வண்ணம் கலங்கியிருக்கிறதோ அவ்வண்ணமே நமக்கு நேர்ந்துள்ள சிறுமையினின்று நமக்குப் பெருமை உண்டாகச் செய்ய வேண்டும் என்றும் அவரைப் பார்த்து அழுது மன்றாடுவோம்.

¹⁸ ஏனெனில் தங்கள் கடவுளைக் கைவிட்டு அந்நிய தெய்வங்களை வணங்கி வந்த நம் முன்னோரின் பாவ வழியை நாம் பின்பற்றியது இல்லை.

¹⁹ அந்த அக்கிரமத்தின் பொருட்டு அவர்கள் வாளுக்கும் கொள்ளைக்கும் பகைவரின் நிந்தைக்கும் ஆளானார்கள். நாமோ ஆண்டவரையன்றி வேறு கடவுளை அறிந்தோமில்லை.

²⁰ நாம் தாழ்ச்சியுடன் அவரது உதவிக்காகக் காத்திருப்போம். அவர் நமது இரத்தத்திற்காக நம் எதிரிகளை வதைத்துப் பழிவாங்குவார். நம்மை எதிர்க்கும் எல்லா இனத்தாரையும் நம் கடவுளான ஆண்டவர் சிறுமையாக்கி, ஈனப்படுத்தி விடுவார்.

²¹ எனவே, சகோதரரே, நீங்கள் மக்களுக்குள் பெரியோர்களாய் இருப்பதாலும், அவர்களது உயிர் உங்கள் கையில் இருப்பதாலும் நீங்கள் ஆறுதலான வார்த்தைகளைச் சொல்லி அவர்களைத் திடப்படுத்துங்கள். நம் முன்னோர் உண்மையாகவே தங்கள் கடவுளை வழிபட்டு வந்தனரா என்பதை நிரூபிக்கும் பொருட்டே சோதிக்கப்பட்டனர் என்று அவர்கள் அறிந்து கொள்ளட்டும்.

²² நம் தந்தை ஆபிரகாம் சோதிக்கப்பட்டும், பல துன்பங்களால் புடமிடப்பட்டும் அவர் கடவுளுக்கு நண்பரானார் என்பதை அவர்கள் நினைவில் கொள்ளட்டும்.

²³ இவ்வாறே ஈசாக்கு, யாக்கோபு, மோயீசன், இன்னும் கடவுளின் நண்பர்களான அனைவருமே பல துன்பங்களுக்கு இடையில் கடவுளுக்குப் பிரமாணிக்கமாய் ஒழுகினர்.

²⁴ தெய்வ பயத்துடன் சோதனைகளை ஏற்காது பொறுமை இழந்து, முறுமுறுத்துக் கடவுளை இகழ்ந்தவரோவெனில்,

²⁵ எதிரிகள் கையில் இறந்துப்பட்டனர்@ பாம்புகளால் கடிப்பட்டு மடிந்துபோயினர்.

²⁶ ஆகையால் நாம் படுகிற துன்பத்தைப் பற்றி நாமே நம்மைப் பழிவாங்க எண்ண வேண்டாம்.

²⁷ மாறாக நாம் படுகிற வேதனைகள் நாம் செய்துள்ள பாவங்களை விடக் குறைவு என்றும், கடவுள் தம் ஊழியர்களைத் தண்டிக்கிறது போல் நம்மைத் தண்டிப்பது நம்மை அழிப்பதற்கு அன்று நம்மைத் திருத்துவதற்கே என்றும் நம்புவோம்" என்று சொன்னாள்.

²⁸ அதைக்கேட்டு ஓசியாசும் பெரியோர்களும் அவளை நோக்கி, "நீ சொன்னது யாவும் உண்மையே. உன் சொற்களில் தவறு ஏதும் இல்லை.

²⁹ நீயோ தெய்வ பயம் உள்ள புனிதை@ ஆகையால் எங்களுக்காக இப்போது மன்றாடு" என்றனர்.

³⁰ மீண்டும், யூதித் அவர்களை நோக்கி, "நான் உங்களிடம் கூறியது கடவுளிடமிருந்து வந்ததாக நீங்கள் அறிந்துள்ளீர்கள்.

³¹ இதுபோல் நான் இனிச் செய்ய எண்ணியுள்ளதும் கடவுளிடமிருந்தே வந்துள்ளது என நீங்கள் அறிந்து கொள்ளும் பொருட்டுக் கடவுள் என் திட்டங்களை உறுதிப்படுத்துமாறு மன்றாடுங்கள்.

³² இன்றிரவு நீங்கள் நகர வாயில் அருகே நில்லுங்கள். நானோ என் பணிப் பெண்ணோடு வெளியே செல்வேன். நீங்கள் சொன்னது போல் இவ்வைந்து நாட்களுக்குள் ஆண்டவர் தம் மக்களாம் இஸ்ராயேலர் மீது இரக்கம் காட்ட வேண்டும் என்று மன்றாடுங்கள்.

³³ நான் செய்யவிருப்பதை நீங்கள் அறிய முயல வேண்டாம். பிறகு நானே உங்களுக்கு அதைப்பற்றிச் சொல்வேன். அது வரை நீங்கள் நம் கடவுளான ஆண்டவரிடம் எனக்காக வேண்டிக் கொண்டேயிருங்கள்" என்று சொன்னாள்.

³⁴ அதற்கு யூதாவின் அரசன் ஓசியாஸ் அவளை நோக்கி, "நீ சமாதானமாய்ப் போய் வா. நம் எதிரிகளைப் பழிவாங்க கடவுள் உன்னோடு இருப்பாராக!" என்று சொன்னான். பின்னர் அவர்கள் அனைவரும் தத்தம் வீடு திரும்பினர்.