யூதித் ஆகமம் - பழைய ஏற்பாடு

¹ மேதியருடைய அரசன் அர்பக்சாத் பல நாடுகளைத் தன் ஆதிக்கத்திற்குள் கொணர்ந்தான். பின்னர் மிக வலுவான ஒரு நகரைக் கட்டி, அதற்கு எக்பாத்தான் என்று பெயரிட்டான்.

² சதுரமாக வெட்டப்பட்ட கற்களால் அதைக் கட்டினான். அதன் மதில்களின் அகலம் எழுபது முழம்@ உயரம் முப்பது முழம்@ அதன் கொத்தளங்களோ நூறு முழ உயரமாக இருந்தன.

³ அந்தக் கொத்தளங்கள் இருபதடிச் சம சதுரமாய் இருந்தன, அவற்றின் உயரத்திற்கு ஏற்றவாறு கதவுகள் அமைக்கப்பட்டிருந்தன.

⁴ அர்பக்சாத் தன் படை வலிமையினாலும் தேர்களின் சிறப்பினாலும் தான் ஆற்றல் படைத்தவன் என்று பெருமை பாராட்டி வந்தான்.

⁵ தனது ஆட்சியின் பன்னிரண்டாம் ஆண்டில், நினிவே மாநகரைத் தலைநகராகக் கொண்டு ஆண்டு வந்த அசீரிய அரசன். நபுக்கோதனசார் அர்பக்சாத்தோடு போர் தொடுத்தான்.

⁶ யூப்ரடீஸ், திக்ரீஸ், யாதாசோன் என்ற நதிகளின் தீரத்தில் எலிக்கியரின் அரசன் எரியோக்குக்குச் சொந்தமாயிருந்த ராகுவா என்ற பரந்த வெளியில் அவனை வென்றான்.

⁷ அதனால், நபுக்கோதனசாரின் அரசு புகழ் பெறவே, அவன் செருக்குற்றான். மேலும், சிலியா, தமாஸ்கு, லீபான் என்ற நாடுகளின் எல்லா குடிகளுக்கும்.

⁸ கார்மேல், கேதார் என்ற நாடுகளின் மக்களுக்கும், சமாரியாவிலும், யோர்தானுக்கு.

⁹ அக்கரை தொடங்கி யெருசேலம் வரையுள்ள எல்லாருக்கும், எத்தியோப்பியாவின் எல்லை வரை உள்ள எஸ்ஸே நாட்டுக் குடிகளுக்கும்.

¹⁰ தூதுவர்களை அனுப்பினான்.

¹¹ அம்மக்களோ வந்தவர்களை ஒருமுகமாய் வரவேற்று உபசரிக்காது வெறுங்கையராய் அனுப்பி வைத்தனர்.

¹² எனவே அரசன் நபுக்கோதனசார் அவ்வெல்லா நாடுகளின் மேலும் கடும் சினம் கொண்டான். "அவ்வெல்லா நாட்டவர்களையும் பழிவாங்குவேன்" என்று தன் அரியணையின் மேலும் அரசின் மேலும் ஆணையிட்டுக் கூறினான்.