பாரூக் ஆகமம் - பழைய ஏற்பாடு

¹ நம் கடவுளாகிய ஆண்டவர் யூதா, இஸ்ராயேல் மக்கள் அனைவர்க்கும் நம் அரசர்களுக்கும் தலைவர்களுக்கும், இஸ்ராயேலுக்குத் தீர்ப்பு வழங்கி வந்த நம் நடுவர்களுக்கும், நமக்கும் கூட எதிராக முன்னறிவித்திருந்த தம் வார்த்தைகளை நிறைவேற்றினார்@

² யெருசலேமில் அவர் நிகழும்படி செய்த கொடிய தீமைகளைப் போல வானத்தின் கீழ் நிகழ்ந்ததே இல்லை@ இவை யாவும் மோயீசனுடைய நூலில் எழுதப்பட்டுள்ளவாறே நேர்ந்தன:

³ ஒருவன் தன் மகனுடைய சதையைப் பிடுங்கித் தின்று, இன்னொருவன் தன் மகளுடைய சதையைப் பிடுங்கித் தின்னும் அளவுக்கு நமக்கு நெருக்கடி வந்தது.

⁴ ஆண்டவர் அவர்களைப் புறவினத்தார் அனைவர் நடுவிலும் சிதறடித்து, அவர்கள் நடுவில் அவர்களைப் பாழடைந்தவர்களாகவும், இழிவான பேச்சுக்கு இலக்காகவும், நம்மைச் சுற்றிலுமுள்ள அரசுகள் எல்லாவற்றிற்கும் அவர்களை அடிமைகளாகவும் கையளித்தார்.

⁵ நம் கடவுளாகிய ஆண்டவரின் குரலொலிக்குக் கீழ்ப்படியாமல் அவருக்கு விரோதமாய்ப் பாவம் செய்ததால், நாம் உயர்த்தப்படாமல் தாழ்த்தப்பட்டோம்.

⁶ நீதி நம் கடவுளாகிய ஆண்டவருக்குரியது@ ஆனால், இன்றிருப்பது போல, நாணித் தலை குனிதல் தான் நமக்கும் நம் தந்தையர்களுக்கும் உரியது.

⁷ ஏனெனில் நமக்கு வந்து நேர்ந்த இந்தத் தீமைகள் அனைத்தையும் ஆண்டவர் ஏற்கெனவே நமக்கு அறிவித்திருந்தார்.

⁸ ஆயினும் நாம் ஒவ்வொருவரும், நாம் மூழ்கியிருந்த தீய பழக்கத்தை விட்டு மனந்திரும்பும்படி நம் கடவுளாகிய ஆண்டவரைப் பார்த்துக் கெஞ்சி மன்றாடவில்லை.

⁹ ஆண்டவர் நமக்குக் கட்டளையிட்டிருந்த செயல்களிலெல்லாம் நீதியுள்ளவராய் இருந்ததால், ஆண்டவர் இத் தீமைகளைத் தயாராய் வைத்திருந்து நம் மேல் வரச் செய்தார்.

¹⁰ ஆண்டவர் நமக்கு வெளிப்படையாய்க் கொடுத்திருந்த கற்பனைகளின்படி நடக்காமல், நாம் அவருக்குச் செவிசாய்க்க மறுத்தோம்.

¹¹ "ஆனால் இப்பொழுது இஸ்ராயேலின் கடவுளாகிய ஆண்டவரே, நீட்டிய கையாலும் மாபெரும் வல்லமையாலும் பல புதுமைகளையும் வியத்தகு செயல்களையுஞ் செய்து, புயபலத்தைக் காட்டி உம்முடைய மக்களை எகிப்து நாட்டிலிருந்து விடுதலை செய்ததன் மூலம் இன்று வரையில் உம் திருப்பெயருக்குப் புகழ்தேடிக் கொண்டவரே@

¹² எங்கள் கடவுளாகிய ஆண்டவரே, உம் பரிசுத்த கற்பனைகளுக்கெல்லாம் விரோதமாய் நாங்கள் பாவஞ் செய்தோம்@ அக்கிரமமான செயல்களைச் செய்து, அநியாயங்களைக் கட்டிக்கொண்டோம்@

¹³ புறவினத்தார் நடுவில் சிதறி வாழ்கின்ற நாங்கள் மிகச் சிலராய் விடப்பட்டிருப்பதால், எங்கள் பேரில் நீர் கொண்ட கோபத்தைத் திருப்பியருளும்.

¹⁴ ஆண்டவரே, எங்கள் வேண்டுதல்களையும் மன்றாட்டுகளையும் கேட்டருளும்@ உமது மகிமைக்காவே எங்களைக் காப்பாற்றும்@ எங்கள் நாட்டிலிருந்து எங்களை நாடுகடத்தியவர்களுக்கு நாங்கள் உகந்தவர்களாய் இருக்கும்படி செய்தருளும்@

¹⁵ இஸ்ராயேலும் இஸ்ராயேலின் இனத்தாரும் உமது திருப்பெயரையே தாங்கியிருப்பதால், நீரே கடவுளாகிய ஆண்டவர் என்பதை உலகம் முழுவதும் அறிந்துகொள்ளும்.

¹⁶ ஆண்டவரே, உம்முடைய பரிசுத்த இருப்பிடத்திலிருந்து எங்களைக் கண்ணோக்கியருளும்@ செவி தந்து எங்கள் மன்றாட்டைக் கேட்டருளும்.

¹⁷ கண் திறந்து எங்களைப் பார்த்தருளும்@ ஏனெனில் இறந்து போய்ப் பாதாளத்தில் இருக்கிறவர்கள், தங்களுடைய ஆவி உடலை விட்டுப் பிரிந்து போன பின், ஆண்டவருக்கு மகிமை தரமுடியாதே! நீதி வழியில் நடக்க முடியாதே!

¹⁸ ஆனால், தான் கட்டிக்கொண்ட பாவச் சுமையால் இளைத்துக் களைத்து, வாடி வதங்கி கண்கள் மங்கிச் சோர்வடைந்து, நாணித்திரியும் ஆன்மாவே ஆண்டவராகிய உமக்கு மகிமை தரும், நீதி நெறியில் நடக்கும்.

¹⁹ ஏனெனில் எங்கள் கடவுளாகிய ஆண்டவரே, எங்கள் தந்தையர்கள், அரசர்கள் ஆகியோரின் நீதிச்செயல்களை முன்னிட்டு, உம் திருமுன் உம்மை இறைஞ்சி உம்முடைய இரக்கத்தை நாங்கள் கொஞ்சிக் கேட்கவில்லை.

²⁰ உம்முடைய ஊழியர்களாகிய இறைவாக்கினர்களின் வாயிலாய் நீர் சொல்லியிருந்தவாறு உம்முடைய கோபத்தையும் ஆத்திரத்தையும் எங்கள் மேல் காட்டினீர்.

²¹ அந்த இறைவாக்கினர் இவ்வாறு சொல்லியிருந்தனர்: "ஆண்டவர் கூறுகிறார்: உடல் வளைந்து தலை வணங்கிப் பபிலோன் அரசனுக்குக் கீழ்ப்படிந்து வேலை செய்வீர்களாகில், உங்கள் தந்தையர்களுக்கு நாம் தந்த நாட்டில் அமைதியாய் வாழ்வீர்கள்.

²² ஆனால், பபிலோனிய அரசனுக்கு நீங்கள் ஊழியம் செய்ய வேண்டுமென்று உங்கள் கடவுளாகிய ஆண்டவர் சொல்லிய வாக்குக்கு நீங்கள் செவி சாய்க்காமல் போவீர்களாகில்,

²³ யூதாவின் பட்டணங்களிலும் யெருசலேமின் தெருக்களிலும், மகிழ்ச்சியின் முழக்கத்தையும், அக்களிப்பின் ஆரவாரத்தையும், மணவாளனின் குரலையும், மணவாட்டியின் குரலையும் ஒயப் பண்ணுவோம்@ குடியிருப்பாரற்று நாடு முழுவதும் பாலைவெளியாகிவிடும்."

²⁴ ஆனால் பபிலோன் அரசனுக்குக் கீழ்ப்படிந்திருக்கும்படி நீர் சொல்லிய வாக்குக்கு நாங்கள் செவிசாய்க்கவில்லை@ ஆதலால் உம்முடைய ஊழியர்களாகிய இறைவாக்கினர்கள் வாயிலாய் நீர் முன்பே சொல்லியிருந்த வார்த்தைகளை நிறைவேற்றி, எங்கள் அரசர்களின் எலும்புகளும், எங்கள் தந்தையர்களின் எலும்புகளும் அவை இருக்கும் இடத்தை விட்டுப் புறம்பே எறியப்படச் செய்தீர்.

²⁵ இதோ அவை கதிரவனின் வெப்பத்திலும், இரவின் குளிரிலும் எறியப்பட்டுள்ளன. அவர்களோ கொடிய வேதனைகளுக்கு இலக்காகிப் பஞ்சத்தாலும் வாளாலும் கொள்ளை நோயாலும் மடிந்தார்கள்.

²⁶ இஸ்ராயேல் வீட்டாருடையவும் யூதா வீட்டாருடையவும் அக்கிரமங்களின் காரணமாய், உமது திருப் பெயரைப் புகழ்ந்தேற்றுவதற்காகக் கட்டப்பட்ட கோயிலையும் இன்றிருக்கும் நிலைக்குக் கொண்டு வந்தீர்.

²⁷ ஆயினும் எங்கள் கடவுளாகிய ஆண்டவரே, உமது மிகுதியான பரிவும் மாபெரும் இரக்கமும் தோன்றும்படி எங்களை இவ்வாறு நடத்தினீர்.

²⁸ இஸ்ராயேல் மக்களுக்கு உமது திருச்சட்டத்தை எழுதித் தரும்படி உம்முடைய ஊழியராகிய மோயீசனுக்குக் கட்டளையிட்ட போது, அவர் வாயிலாய் நீர் சொல்லியது இதுவே:

²⁹ நீங்கள் நமது சொல்லுக்குச் செவிசாய்க்காமல் போவீர்களானால், இந்தப் பெரும் கும்பலை மிகச் சிறிதாக்கி, புறவினத்தார் நடுவிலே சிதறடிப்போம்.

³⁰ இந்த மக்கள் முரட்டுத்தனம் உள்ளவர்களானதால், இவர்கள் நமக்குச் செவிசாய்க்க மாட்டார்கள் என்பது நமக்குத் தெரியும்@ இவர்கள் அடிமைகளாய்க் கொண்டு போகப்படும் நாட்டில் தான், உள்ளத்தில் எண்ணிப் பார்த்து மனந்திரும்புவார்கள்.

³¹ அப்போது நாமே அவர்களுடைய கடவுளாகிய ஆண்டவர் என்பதை அறிந்து கொள்வார்கள்@ நாம் அவர்களுக்குப் பணியும் இதயத்தையும், கேட்கும் திறன் வாய்ந்த செவிகளையும் கொடுப்போம்.

³² அவர்கள் அடிமைப்பட்டிருக்கும் நாட்டில் நம்மைப் புகழ்வார்கள்@ நமது பெயரை நினைவுகூர்வார்கள்.

³³ நமக்கு விரோதமாய்ப் பாவஞ் செய்த தங்கள் தந்தையர்களின் நெறியை நினைவில் இருத்திக் கொண்டு, தங்கள் தீய செயல்களையும் முரட்டுத்தனத்தையும் விட்டு விடுவார்கள்.

³⁴ ஆபிரகாம், ஈசாக், யாக்கோபு இவர்களுக்கு நாம் ஆணையிட்டு வாக்குறுதி தந்த நாட்டுக்கு அவர்களை மீண்டும் கொண்டு வந்து சேர்ப்போம்@ அவர்கள் அதை ஆளுவார்கள்@ மேலும் நாம் அவர்களைப் பலுகச் செய்வோம்@ அவர்கள் எண்ணிக்கையில் குறையமாட்டார்கள்.

³⁵ அவர்களோடு முடிவில்லாக் காலத்திற்கும் மற்றுமோர் உடன்படிக்கை செய்து கொள்வோம்@ அப்போது நாம் அவர்களுக்குக் கடவுளாய் இருப்போம்@ அவர்கள் நம் மக்களாய் இருப்பார். நம் குடிமக்களான இஸ்ராயேலின் மக்களை, நாம் அவர்களுக்குக் கொடுத்த நாட்டிலிருந்து இனிமேல் அப்புறப்படுத்த மாட்டோம்."