வால்காவிலிருந்து கங்கை வரை - பக்கம் 190

இருக்கும்படி கவனித்துக் கொள்ள வேண்டும். எனக்கும் சிறிது சித்திரம் எழுதத் தெரியும். சந்தர்ப்பம் கிடைக்கும் பொழுதெல்லாம் நானும் வந்து உங்களுக்குச் சிறிது உதவி செய்கிறேன்.”

    “உங்களுடைய ஆலோசனையின் பிரகாரமே காட்சிகளைத் தயாரிப்பதுதான் நல்லது. மேலும் பாத்திரங்களின் வேஷம், உடை முதலியவற்றையும் நீங்களே நிர்ணயிக்க வேண்டும். மொத்தம் எத்தனை பாத்திரங்கள்?”

    “யார், யார் மொத்தம் எத்தனை பாத்திரங்கள் என்றெல்லாம் இப்பொழுது நிச்சயமாகச் சொல்ல முடியாது. ஆனால் பாத்திரங்களின் எண்ணிக்கை குறைவாக இருப்பது நல்லது. எத்தனை இருக்கலாம்?”

    “பதினாறிலிருந்து இருபதுவரை நாங்கள் சுலபமாகத் தயார் செய்துவிட முடியும்.”

    “பாத்திரங்களின் எண்ணிக்கை பதினாறுக்குள் இருக்கும்படி பார்த்துக்கொள்கிறேன்.”

    “புரூரவாவாக நீங்கள்தான் நடிக்கவேண்டும். ஊர்வசி வேடத்திற்கு எங்கள் பிரபா பொருத்தமாக இருப்பாளல்லவா? நீங்கள்தான் இன்று அவளது நடிப்பைப் பார்த்தீர்களே.”

    “அனுபவமற்ற என் கண்களுக்கு, அவளுடைய நடிப்பிலே எந்த விதக் குற்றமும் தென்படவில்லை.”

    “பிரபாதான் ஊர்வசியாக நடிக்கவேண்டும். எங்களுடைய சபையிலே யாருக்கு எந்த வேடத்தைக் கொடுத்தாலும், அவர்கள் மறுக்கக் கூடாதென்பது நியமம்.”

    பிரபாவின் கண்களிலே சிறிது தயக்கம் காணப்பட்டது. ஆனால் அந்த வாலிபத் தலைவன், “என்ன பிரபா! சம்மதந்தானே” என்று கேட்ட போது, அவள் சிறிது தயங்கினாலும் “ஆம்” என்ற சொல்தான் அவள் வாயிலிருந்து வந்தது.

                                 

    அஸ்வகோஷ் அந்தக் கிரேக்க நாடக சபைத்தலைவன் புத்தப் பிரியனோடு அநேக கிரேக்க நாடகங்களின் பிராகிருத மொழிபெயர்ப்பைப் படித்தான். அதிலே காணப்படும் களம், அங்கம் என்ற வார்த்தைகளின் சங்கேதப் பொருள்களைப் பற்றியும் காட்சியமைப்புகளைப் பற்றியும் அவனோடு விவாதித்தான். கிரேக்க நாடகப் பாணியைப் பின்பற்றிய அஸ்வகோஷ், அந்தக் கிரேக்கக் கலையின் ஞாபகார்த்தமாக, நாடகத்திலே உபயோகிக்கப்படும் சித்திரத் திரைக்கு ‘யவனிகா’ (யவன்-கிரேக்க) என்று பெயர் வைத்தான்.

சமஸ்கிருதமும் பிராகிருதமும் கலந்த பாஷையில், இடையிடையே பாட்டுக் கலந்த வசனத்தில் நாடகத்தை எழுதி முடித்தான். அந்தக் காலத்தில், பிராகிருதமும் சமஸ்கிருதமும் நெருங்கிய தொடர்பு கொண்டிருந்தன. நகரவாசிகள் எல்லோரும் இரண்டு பாஷைகளையும் சுலபமாகப் புரிந்து கொள்வார்கள். இந்தியாவிலே முதலாவது தோன்றிய நாடகம், ‘ஊர்வசி வியோகம்.’